Nanchi Moba Onse a Kukokoloka Atokesha Lesa ku Muchima Nyi?

Yehoba ukeba’mba tusangalalenga mu bwikalo bwetu ne kwikalapo na tubimye twa kukokoloka. Nanchi moba onse a kukokoloka atokesha Lesa ku muchima nyi? Tumwesha byepi amba twatemwa Yehoba na byo tuba na moba a kukokoloka?

1. Mambo ka moba avula a kukokoloka o abujila kutokesha Yehoba ku muchima?

Mwakonsha kukumya bingi kuyuka’mba moba avula a kukokoloka kechi aimena pa byaamba Baibolo ne. Pakuba aimena pa bisho bya bantu babulanga kupopwela Lesa. Ano moba afuma ku bupopweshi bwa bubela. Kabiji akwatankana na kupopwela mipashi nangwa aimena pa lufunjisho lwa kuba’mba mweo kechi ufwa ne. Moba amo a kukokoloka aimena pa bingelekezha ne kukinka manungo mwi lesa wa jishuko. (Isaya 65:11) Yehoba wajimunako bantu banji kuba’mba: “Abanai nabo . . . kabiji kange mukwate ku kintu kya muzhilo ne.”​—2 Kolinda 6:17.a

2. Yehoba umvwa byepi ku muchima na bisho bitumbijika bantu?

Yehoba witujimwina jimo pa kuba’mba tubule kufwa mu kitewa kya ‘kuketekela mu bantu.’ (Tangai Yelemiya 17:5.) Moba amo a kukokoloka beengijisha kunemekelamo bandamabyalo ne bashilikale. Moba akwabo beengijisha kuvuluka juba jo batambwijilemo bwana bwa bene. (1 Yoano 5:21) Kabiji moba akwabo a kukokoloka beengijisha kutundaikilamo bya bumulwilantanda. Pano Yehoba umvwa byepi ku muchima inge ke tupane munema ku bantu nangwa ku bintu, kikatakata kupana munema ku bantu babula kuba kyaswa muchima wanji?

3. Ñanyi bintu byakonsha kulengela Yehoba kushikwa moba amo a kukokoloka?

Baibolo wakanya “kutomatoma binyu, kusangalala kubi ne kupendwapendwa.” (1 Petelo 4:3) Mu moba amo a kukokoloka, bantu bevwanga mu bintu byabula kufwainwa ne kuba bulalelale. Pa kuba’mba tutwajijile kwikala balunda ne Yehoba, twafwainwa kuchinuzhuka bintu byonse byatama.

FUNJILAIPO BIKWABO

4. Kanai bya kisangajimbwe byashikwa Yehoba

Tangai Efisesa 5:10, ne kwisamba ano mepuzho:

• Ñanyi bintu byo mwafwainwa kulangulukangapo saka mukyangye kufuukupo kuvuluka juba ja kukokoloka?

• Ñanyi moba a kukokoloka ayukanyikwa bingi kabiji avuluka bantu ku mpunzha ko mwikala?

• Nanchi ano moba a kukokoloka atokesha Yehoba ku muchima nyi?

Nanchi mwakilangulukapo kala Lesa byo aambapo pa kuvuluka moba a kusemwa nyi? Kafwapo Baibolo po aamba’mba bapopweshi ba Yehoba bavulukanga moba a kusemwa ne. Pakuba Baibolo waamba pa kuvuluka moba a kusemwa kubiji kwaubile bantu babulanga kupopwela Lesa. Tangai Ntendekelo 40:20-22 ne Mateo 14:6-10. Kepo mwisambe ano mepuzho:

• Ñanyi bintu byamwekele pa kuvuluka moba a kusemwa o baambapo mu bino binembelo bibiji?

• Kwesekana na ano mashimikila a mu Baibolo, Yehoba umvwa byepi ku muchima na bantu bavuluka moba a kusemwa?

Kabiji mwakonsha kwiipuzha’mba: ‘Nanchi kimukola ku muchima Yehoba inge kamvuluke moba a kusemwa nangwa kwivwanga mu bya kisangajimbwetu bikwabo byakanya Baibolo nyi?’ Tangai Kulupuka 32:1-8. Kabiji tambai VIDYO ne kwisamba ano mepuzho.

VIDYO: Moba a Kukokoloka ne bya Kisangajimbwe Bifichisha Lesa ku Muchima (5:07)

• Mambo ka o twafwainwa kubilanga bintu bitokesha Yehoba ku muchima?

• Twafwainwa kuyuka byepi amba byo tubena kuba bibena kumutokesha ku muchima?

Kuyuka bya kisangajimbwe bifichisha Lesa ku muchima

• Nanchi byaimena pa bintu byabula mu Baibolo nyi? Pa kuba’mba muyuke byaishileko bino bya kisangajimbwe, kebakebai bishinka.

• Nanchi ano moba a kukokoloka apana munema ku bantu, bipamo nangwa kunemeka kyalo nyi? Atweba tunemeka Yehoba kukila bintu byonse. Kabiji twamuketekela mambo ye yenkatu ukafumyapo makatazho onse pano pa ntanda.

• Nanchi bisho ne byuba bantu byapusenamo na byaamba Baibolo nyi? Twafwainwa kutwajijila kwikala ba butooto mu muchima ne mu milanguluko.

5. Kwashai bantu kunemeka bintu byo mwaitabilamo

VIDYO: Lumbululai byo Mwaitabilamo mu Jishinda Jawama (2:01)

Tangai Mateo 7:12, ne kwisamba ano mepuzho:

• Kwesakana na kino kyepelo, ñanyi wafwainwa kufuukwilako ba mu kisemi babula kuyuka Lesa inge bakonsha kuvulukanga moba a kukokoloka nangwa ne?

• Ñanyi kintu kyo mwafwainwa kuba kikamwesha’mba mwata muchima, kutemwa ne kunemeka kisemi kyenu nangwa kya kuba anweba kechi mwivwanga mu kuvuluka moba a kukokoloka pamo nabo ne?

6. Yehoba ukeba atweba kwikala na lusekelo

Yehoba ukeba’mba twikalengapo na tubimye twa kusangalela pamo na kisemi kyetu ne balunda netu. Tangai Musapwishi 8:15, ne kwisamba buno bwipuzho:

• Kino kyepelo kyamwesha byepi amba Yehoba ukeba atweba kwikala na lusekelo mu bwikalo bwetu?

Yehoba ukeba bantu banji kwikalangapo na tubimye twa kusangalela pamo na bakwabo. Tambai VIDYO mumone byo kikala pa kushonkena kwetu kukatampe.

VIDYO: Babena Kwipa bya Bupe pa Kushonkena Kukatampe (5:40)

Tangai Ngalatiya 6:10, ne kwisamba ano mepuzho:

• Nanchi twafwainwa ‘kubilanga byawama’ bakwetu pa moba a kukokolokatu nyi?

• Kyepi kyafwainwa kwimuletela lusekelo, nanchi kupana bintu pa juba ja kukokoloka na mambo a kwimukanjizha nyi? Inyi kupana bintu kwa kubula kwimubuula’mba panai?

• Bimye bimo Bakamonyi bavula banengezhezha baana babo bintu byawama ne kwibapa bya bupe. Inge muji na baana, ñanyi bintu bimo byo mwafwainwa kwibobila?

ÑANYI BISHINKA BYO MWAFUNDA?

Yehoba ukeba’mba twikalengapo na tubimye twa kusangalela pamo na kisemi kyetu ne balunda netu. Pano bino, ukeba’mba tuchinuzhukenga moba a kukokoloka abula kumutokesha ku muchima.

Mepuzho a kupitulukamo

• Ñanyi mepuzho o mwafwainwa kwiipuzha afwainwa kwimukwasha kuyuka inge bya kisangajimbwe byo mukeba kwivwangamo bitokesha Yehoba ku muchima nagwa ne?

• Twakonsha kukwasha byepi ba mu ba kisemi kyetu ne balunda netu kuyuka ene mambo o tubujila kuvuluka moba a kukokoloka?

• Mwayuka byepi kuba’mba Yehoba ukeba atweba kwikala na lusekelo ne kwikalapo na tubimye twa kusangalelanga pamo?

KEBAI BISHINKA BIKWABO

Yukai moba amo a kukokoloka abula kuvuluka bena Kilishitu.

“Mambo ka Bakamonyi ba kwa Yehoba o Babujila Kusekelelako Moba a Kukookoloka?” (Kibaaba kiji pa jw.org)

Monai bishinka bina bitulengela kushiinwa’mba kuvuluka moba a kusemwa kechi kutokesha Lesa ku muchima ne.

“Mambo ka Bakamonyi ba kwa Yehoba o Babujila Kusekelela Moba a Kusemwa?” (Kibaaba kiji pa jw.org)

Monai banyike batemwa Yehoba byo bamutokesha pa muchima kimye kya kusekelela moba a kukookoloka.

Mwanema Bingi kwi Yehoba (11:35)

Bena Kilishitu bavula kechi bavuluka kiminshiminshi ne. Bomvwa byepi ku muchima pa byo bafuukulapo?

“Bataaine Bintu Byawama” (Kyamba kya Usopa, December 1, 2012)