LUFUNJISHO 55
Kwashainga Kipwilo mo Muji
Mwaya ntanda yonse, bantu bavula babena kupopwela Yehoba na lusekelo mu bipwilo byavula bingi. Batemwa mikambizho ne mizhilo yo batambwila kabiji bebikako bingi kutundaika kipwilo mu mashinda apusana pusana. Nanchi ne anweba byo byo mubena kuba mu kipwilo mo muji nyi?
1. Ñanyi mashinda amo o mwakonsha kwingijishishamo kimye ne ngovu yenu kukwasha kipwilo?
Atweba bonse twafwainwa kukwashanga kipwilo mo tuji. Nanchi mu kipwilo kyenu mujipo bantu bakoma nangwa balemana nyi? Nanchi mwakonsha kwibasendako ku kupwila nyi? Nangwa mwakonsha kwibakwashako mingilo imo nabiji kwibapotelako bya kuja, bintu byo bakeba nangwa kwibakwashako kuwamisha nzubo yabo nyi? (Tangai Yakoba 1:27.) Twafwainwa kwipana kuya na kuwamishanga pa Nzubo ya Bufumu ne kwiilama bulongo. Kafwako wafwainwa kwitukanjikizha kwingila ino mingilo ne. Kutemwa Lesa ne balongo ne banyenga yetu ko kwitulengela “kwipana [atweba bene] na muchima yense.”—Salamo 110:3.
Bakamonyi babatizhiwa bakonsha kukwasha kipwilo mu mashinda apusana pusana. Balongo bafikizha bikebewa bya mu Baibolo bebatongola kwikala bankwasho nangwa bakulumpe mu kipwilo kuba’mba bakwashe kipwilo. Balongo ne banyenga bonse bakonsha kwingilako bupainiya ne kutundaika mwingilo wa kusapwila. Bakamonyi bamo babena kukwashako mwingilo wa kushimika mazubo a Bufumu nangwa kuya na kwingijila ku bipwilo kwakepa basapwishi.
2. Twakonsha kwingijisha byepi mali etu ne bintu byetu kukwashishamo kipwilo?
Twakonsha “[kunemeka] Yehoba na bintu byawamisha byo [tuji] nabyo.” (Byambo bya Maana 3:9) Twafwainwa kupananga mali ne bintutu bikwabo na muchima yense kutundaikilamo kipwilo ne mwingilo wa kusapwila ntanda yonse. (Tangai 2 Kolinda 9:7.) Mali o tupana beengijisha kukwashishamo balongo ne banyenga bapita mu bya malwa. Kimye kyonse bavula ‘batulapo bya bupe bimo’ bya kupana. (Tangai 1 Kolinda 16:2.) Twakonsha kupana ano mali kwingijisha tubokoshi twikala mu mazubo etu a Bufumu nangwa kwiatumina pa keyala wetu wa donate.jw.org. Tumwesha byo twatemwa Yehoba na byo twingijisha mali etu ne bintu byetu kukwashishamo kipwilo.
FUNJILAIPO BIKWABO
Langulukaipo mashinda amo o mwakonsha kukwashishamo kipwilo kyenu.
3. Twafwainwa kwingijishanga bintu byetu
Yehoba ne Yesu batemwa bantu bapana na muchima yense. Yesu wasanchijile mwanamukazhi wafwilwa wajingatu na tumali tucheche. Nangwa byonkabyo, uno mwanamukazhi witupaine kwi Yehoba. Tangai Luka 21:1-4, ne kwisamba ano mepuzho:
Nanchi twafwainwa kupana mali avula pa kuba’mba tutokeshe Yehoba ku muchima nyi?
Yehoba ne Yesu bomvwa byepi ku muchima inge twapana na muchima yense?
Pa kuba’mba muyuke mali o tupana byo beengijisha, tambai VIDYO. Kepo mwisambe buno bwipuzho:
Nanchi mali o tupana beengijisha byepi mu bipwilo mwaya ntanda yonse?
4. Twikale na muchima wa kwipana
Kala bapopweshi ba Yehoba baingilanga bingi kuwamisha pa mapunzha po bapopwelanga Yehoba. Uno mwingilo wavwangilemo byavula kechi kupanatu mali ne. Tangai 2 Byambo bya Moba 34:9-11, ne kwisamba buno bwipuzho:
Mwina Isalela yense waubanga byepi pa kuba’mba nzubo ya Yehoba nangwa mpunzha pa kupopwela pamwekenga bulongo?
Pa kuba’mba mumone Bakamonyi ba kwa Yehoba byo balondela byaubanga bantu bo banemba mu Baibolo, tambai VIDYO. Kepo mwisambe ano mepuzho:
Mambo ka o kyawamina kulamanga bulongo nzubo yetu ya Bufumu ne kuwamisha pafwafwafwa?
Ñanyi mashinda amo o mwakonsha kukwashishamo kipwilo?
5. Balongo ibikaingako kufikilamo kwingilako mingilo ikwabo mu kipwilo
Binembelo byatundaika banabalume bena Kilishitu kukanamina mingilo ne kwingila papelela bulume bwabo pa kuba’mba bakwashe kipwilo. Pa kuba’mba mumone byo mwafwainwa kuba, tambai VIDYO. Kepo mwisambe buno bwipuzho.
Mu vidyo ye mwatamba, Ryan waubile byepi pa kuba’mba afikilemo bulongo kwingila mingilo ya kukwasha kipwilo?
Baibolo walumbulula bintu byafwainwa kulengela balongo kufikilamo kwikala bankwasho ne bakulumpe mu kipwilo. Tangai 1 Timoti 3:1-13, ne kwisamba ano mepuzho:
BANTU BAMO BEPUZHA’MBA: “Nanchi Bakamonyi ba kwa Yehoba bafumya kwepi mali o bengijisha mu mwingilo wabo?”
Mwakonsha kwibakumbula’mba ka?
ÑANYI BISHINKA BYO MWAFUNDA?
Yehoba usanta bingi pa byo mwibikako kutundaika kipwilo kwingijisha kimye kyenu, ngovu yenu ne bintu byenu.
Mepuzho a kupitulukamo
Twakonsha kwingijisha byepi kimye ne ngovu yetu kukwashishamo kipwilo?
Twakonsha kwingijisha byepi mali etu ne bintu byetu kukwashishamo kipwilo?
Ñanyi mashinda akwabo o mwakonsha kwingijisha kukwashishamo kipwilo?
KEBAI BISHINKA BIKWABO
Monai ene mambo Lesa o abujila kukeba bapopweshi banji kupana bya bujikumi.
“Nanchi Baibolo Waambapo’mba ka pa Kupana bya Bujikumi?” (Kibaaba kiji pa jw.org)
Baibolo waamba pa mingilo yafwainwa kwingila banabalume babatizhiwa. Pano ibyepi inge mwanamukazhi wabatizhiwa watendeka kukanamina ino mingilo?
“Kuyuka Biji Bumutwe mu Kipwilo” (Kyamba kya Usopa kya, February 2021)
Monai balongo Bakamonyi babula moyo byo bepana kutwajila bakwabo bapopweshi mabuku alumbulula Baibolo.
Monai byuba Bakamonyi ba kwa Yehoba pa kupana mali a kukwasha mwingilo wetu kupusanako na byuba bupopweshi bukwabo.
“Mali o Mwingijisha mu Mwingilo Wenu Afuma Pi?” (Kibaaba kiji pa jw.org)