BWELAINGA KU BANTU
LUFUNJISHO 7
Kuleka Kukwasha Bantu Ne
vJifunde: “Bafunjishenga ne kusapwila mambo awama . . . kwa kubula kuleka.”—Byu. 5:42.
Byaubanga Paulo
1. Tambai VIDYO, nangwa tangai Byubilo 19:8-10. Apa bino mwisambe ano mepuzho:
Twayuka byepi kuba’mba Paulo watwajijiletu na kusapwila mambo awama nangwa kya kuba bamo bakananga?
Bimye binga Paulo byo abwelanga na kufunjisha bano bantu, kabiji waingijile uno mwingilo myaka inga?
Ñanyi Bintu byo Twafunjilako kwi Paulo?
2. Twafwainwa kwibikako ne kwingijishanga kimye kyetu bulongo pa kuba’mba tubwelenga ku bantu ne kutendeka kwibafunjisha Baibolo.
Ubainga Byaubanga Paulo
3. Fwakeshainga bantu pa kimye kyo batanwapo. Iipuzhai’mba: ‘Ñanyi kimye kyafwainwa kabiji kwepi ko nakonsha kutaaina uno muntu? Ñanyi juba jo atanwa pa nzubo ne kimye pa kuba’mba nkesambe nanji?’ Mufwakeshai nangwa kya kuba anweba muji na bya kuba bikwabo pa jojo juba.
4. Umvwañanai juba ja kubwelako. Inge mwapwisha kwisamba na muntu, mwipuzhai juba ne kimye jo mwafwainwa kubwelako jikwabo. Inge mwaumvwañana mpunzha kwa kusambakena ne kimye, bwelaiko kyonka kimye kyo mwilayile.
5. Kumuzhinauka ne. Kange mulangulukenga’mba uno muntu kechi watemwa bukine na mambo a kuba’mba kechi mumutaana pa nzubo ne. Kampe wapayankanatu. (1 Ko. 13:4, 7) Inge kechi utanwatanwa pa nzubo ne, mwafwainwa kutwajijilatu na kuyapo, pano bino saka mwingijisha bulongo kimye kyenu.—1 Ko. 9:26.