Anweba ‘Lesa Kine Mwaswishishaka ano Malwa Kubiwa?’
RICARDO ukivuluka neluno saaikala namukazhanji Maria mukibamba mwikala bantu babena kupembelela kumonañana nadokotala.a Bonse bubiji bwabo kafwapo wajinga nangovu yakutanga byambo byajinga papepala byabyoapiminwe Maria ne. Bino Ricardo washinkwile enivulupu, kabiji bukiji-bukiji bonse bubiji bwabo bafikenejiletu kutala pasawakya yoanembele dokotala. Bamwene kyambo kya “kansa”, kabiji bonse babiji batendekele kujila byobalangulukile kino kyambo mokyatala.
Ricardo ukivuluka’mba “Dokotala wajinga bingi nalusa,” bino “kyamwekele nobe wayukile byokitukatezhe mambo wakoseleko nakwitwambila’mba ketekelai mwi Lesa.”
Dokotala Saakyangye kutendeka kumubuka nabiñambañamba bingijisha mintetenga yamalaichine, wamwene’mba kipamba kyakukulu kwakukilujo kwakwa Maria kyakankelwe kwikala pamo. Byoapiminwe jikwabo bataine kuba’mba kansa yafika nekubongo. Byopapichiletu mulungu umo yebamubukijilengamo, babwelele bekileka nekwikileka. Maria wabelele kyakine kine nebyopapichiletu bañondo babiji wafwile. Ricardo waambile’mba, “Nasekejile bingi namba lumanamo lwanji lwapwa” kabiji wanungilepo kwamba’mba “nangwa byonkabyo, namutongele bingi kyakuba neamiwa neumvwine namba kyawamatu nekufwa. Javula namujijiilenga Lesa namba: ‘Mamboka omwaswishisha ano malwa kubiwa?’”
Umvwe Malwa Amweka, Pepuzhiwa Mepuzho Avula Bingi
Byonka byokyajinga kwi Ricardo, bantu bavula kuzhokoloka ntanda yonse babena kumanama bingi. Javula bayanjilamo keboba babula kulengapotu nangwa mambone. Akilangulukai bulanda buji pakumanama mumakondo abula kupwa bantu obabena kulwa. Nangwa akilangulukai bulanda buji naboba bobakanjikizha kwibalaala, baana babena kukabishiwa, malwañano amunzubo, nebubitu bukwabo buba bantu. Mwapita bwikalo bwabantu bonse, kechi pamwekapo’mba nshiji nelukabisho lobabena kwiubila banabalume nebanabakazhi mulwabo lukapopotelane. (Musapwishi. 4:1-3) Kabiji kuji nebabena kumanama nabyamalwa biponakotu bine nebabena kumanama nabinyenge, milanguluko, kubikapotu nenamalwazhi. Kwakubula nekuzhinaukatune, kyokine kintu bavula kyobepwizha’mba, “Nga mamboka nanchi Lesa oaswishisha lumanamo lwauno mutundu?”
Nangwatu bantu baitabila mubupopweshi kechi kibapelela kuyuka mwakubila nalumanamone. Neanwebatu mwakonsha kwizhinausha paene mambo aye Lesa wabutemwe kabiji wabulume bonse oaswishisha lumanamo. Kutana mukumbu waumvwanyika wajino jipuzho jakatazha kyanema bingi mambo kitukwasha kubula kukatazhiwa mumilanguluko nekukosesha bulunda bwetu na Lesa. Baibolo yakumbula. Mwane akilangulukaipo Baibolo byoyaamba kwesakana nabyokyaambiwapo mukibaba kyalondelapo.
[Tubyambo twa mushi]
a Mazhina apimpulwa.
[Bipikichala pa peja 3]
Dokotala wakoseleko nakwitwambila’mba ketekelai mwi Lesa