Fundainga Mambo A Lesa

Yesu Kilishitu ye Ñanyi?

Kino kibaba kyaamba pa mepuzho o mwakiipuzhapo kala kabiji bamwesha ne po mwafwainwa kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu pa ino mikumbu.

1. Yesu Kilishitu ye ñanyi?

Yesu wapuseneko na bantu bonse, waikalanga mwiulu mu bumupashi saka akyangye kusemwa pano pa ntanda. (Yoano 8:23) Ye mutanshi kulengwa kwi Lesa pa bilengwa byonse kabiji waingijileko mwingilo wa kulenga bilengwa bikwabo. Yesu ye yenkatu ye balengele kwi Yehoba mwine, kyokyo atelelwa’mba Mwana Lesa “yenkawa umo.” Kabiji wajinga wakumwambilako Lesa, kyokyo atelelwa’mba “Mambo.”—Yoano 1:1-3, 14; tangai Byambo bya Mana 8:22, 23, 30; Kolose 1:15, 16.

2. Mambo ka Yesu o aishijile pano pa ntanda?

Lesa watumine Mwananji pano pa ntanda kupichila mu kuvilwila bumi bwanji munda ya kwa Maliya. Ko kuba’mba Yesu kechi wajingapo na shanji wa buntunshi ne. (Luka 1:30-35) Yesu waishile pano pa ntanda na (1) kufunjisha bukine pe Lesa, (2) kwitushila mwakulondela pa kuba kyaswa muchima wa Lesa ne (3) kupana bumi bwanji ke kya “kukula” bavula.—Tangai Mateo 20:28; Yoano 18:37.

3. Mambo ka o tukebela bukuzhi?

Bukuzhi ke kintu kipanwa kya kukula muntu uji mu buzha. Lesa kechi wakebelenga’mba bantu bakakotenga ne kufwa ne. Lesa wamwambijile mwanamulume mutanshi amba inge akalenge mambo, ukafwa. Inge Adama wabujile kulenga mambo inge kechi tufwa ne. Nangwa kya kuba Adama kechi wafwile ponkapo ne, bino watendekele kufwa kufumatu pa juba jo asatukijile Lesa. (Ntendekelo 2:16, 17; 5:5) Adama waletelejile baana banji bundengamambo bwaleta lufu. Onkao mambo, lufu “lwakumbene” ku bantu bonse pano pa ntanda na mambo akwa Adama. Kyokyo tukebela bukuzhi.—Tangai Loma 5:12; 6:23.

4. Mambo ka Yesu o afwijile?

Ñanyi wafwainwe kupana bukuzhi bwa kwitukula ku lufu? Atweba bantu tufwa na mambo a bundengamambo bwetu. Kafwako muntu mbulwakulumbuluka wakonsha kukula bakwabo ku bundengamambo ne.—Tangai Salamo 49:7-9.

Yesu byo abujile kuswana bumbulwakulumbuluka bwa bashanji ba pano pa ntanda, ko kuba’mba kechi wafwile na mambo a bundengamambo bwanji ne, bino wafwijile bantu bandengamambo. Lesa byo atumine Mwananji kwiya na kwitufwila, kimwesha butemwe bwanji bukatampe bo atemwa bantu. Yesu naye wamwesheshe’mba witutemwa pa kukokela Bashanji ne kupana bumi bwanji na mambo a bundengamambo bwetu.—Tangai Yoano 3:16; Loma 5:18, 19.

5. Nga Yesu ubena kuba ka pa kino kimye?

Byo abukilenga bakolwa, kusangula bafwa ne kupulusha bantu bajinga mu bizumba, Yesu wamwesheshenga byo akobila bantu bonse balukokelo kulutwe. (Luka 18:35-42; Yoano 5:28, 29) Yesu byo afwile, Lesa wamusangwile mu bukilengwa kya mupashi. (1 Petelo 3:18) Yesu wakekajile ku kilujo kya Lesa na kupembelela kufikizha Yehoba byo amupele bulume bwa kwikala Mfumu wa kulama pano pa ntanda ponse. (Bahebelu 10:12, 13) Pano luno Yesu ke Mfumu ubena kulama mwiulu kabiji baana banji ba bwanga pano pa ntanda babena kubijika mbila ya mambo awama pa ntanda yonse.—Tangai Danyela 7:13, 14; Mateo 24:14.

Yesu byo aji Mfumu, katatakatu akafumyepo buyanji ne bonse bamanyika bakwabo. Bonse baji na lwitabilo mwi Yesu ne kumukokela bakekala na bumi bwa myaka mu paladisa pano pa ntanda.—Tangai Salamo 37:9-11.

Umvwe mukeba kuyukilako byavula, monai kitango 4 kya mu uno buku wa Nanchi baibolo Kine UFUNJISHAʼMBAKA? Wanembwa na Bakamonyi ba kwa Yehoba.

[Kipikichala pa peja 25]

Bonse baji na lwitabilo mwi Yesu ne kumukokela bakekala na bumi bwa myaka mu paladisa pano pa ntanda