Bantu Batanga Magazini Etu Bepuzha’mba . . .
Nanchi Bena Kilishitu Bakishinka Bonse Baya Mwiulu nyi?
▪ Bantu bavula batangapo kala byambo bya kwa Yesu bya lutekenesho bya kuba’mba: “Lesa byo ebatemwisha ba panopantanda, wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.” (Yoano 3:16) Nanchi Yesu walumbulwile kuba’mba bapopweshi bonse bakishinka ba kwa Shanji, aye Yehoba Lesa, bakaya mwiulu na kwiyowa bumi bwa myaka nyi?
Akimonai byambo bya kwa Yesu bilengela bantu kulangulukapo bya kuba’mba: “Ka paji muntu wakanjijilemo mwiulu ne, poso yenka waikijile mwiulu, ye Mwana muntu, yenka aye uji mwiulu.” (Yoano 3:13) Kino kibena kulumbulula kuba’mba bapopweshi bakishinka ba kala, nabiji Nowa, Abalahama, Mosesa ne Davida kechi bayile mwiulu ne. (Byubilo 2:34) Pano nanchi bano bonse bayile pi? Mu kwipipishatu twakonsha kwamba’mba: Bantu bakishinka bajingako kala baji mu bilende, bafwa, kafwako kyo bayuka ne, babena kupembelela kusangulwa.—Musapwishi 9:5, 6; Byubilo 24:15.
Yesu ye wajinga mutanshi kwamba’mba bantu bamo bakaya mwiulu inge bafwa. Waambijile batumwa banji amba ukebamwena kuntu mwiulu. (Yoano 14:2, 3) Bantu ba Lesa kyo kimye kitanshi kyo baumvwinepo bino byambo. Mukupita kwa kimye, mutumwa Paulo walumbulwile amba panyuma ya lufu lwa kwa Yesu ne kusangulwa kuya mwiulu, Yesu ‘washinkwijile baana banji ba bwanga jishinda, jo jipya jo jumi’—jino jishinda kafwako muntu nangwa umo wakiyilemo ne.—Bahebelu 10:19, 20.
Nanchi kino kilumbulula’mba kufuma kyokya kimye kufika ne luno bantu bakishinka bonse baya mwiulu nyi? Ine, lusanguko lwa kuya mwiulu ke lwa bantu bamotu bo bapa uno mwingilo. Bufuku bwapeleleko kwikala pamo, Yesu waambijile batumwa banji amba, ‘bakekala pa matanda na kuchiba mambo,’ mu Bufumu bwanji bwa mwiulu. Onkao mambo, kulama pamo ne Yesu mwiulu ye ukekala mwingilo wabo.—Luka 22:28-30.
Kununga pa batumwa, bantu bakwabo nabo bafwainwe kwibapa mwingilo wawama bingi. Mu kimwesho mutumwa Yoano wamwene Yesu saka aji na jibumba ja basangwilwe ne kuya mwiulu bo balumbulula’mba “ke bufumu ne bañanga; kabiji bakekala mu bufumu panopantanda.” (Lumwekesho 3:21; 5:10) Bano bantu bajinga banga? Byonka byo kikala mu kafulumende yense, kwikalatu bantu bacheche balama. Ne buno Bufumu bwa mwiulu nabo byo byo buji. Yesu, Mwana mukooko wa Lesa, ulama pamo ne bakalama bakwabo 144,000, “bakujilwe mu bantu.”—Lumwekesho 14:1, 4, 5.
Kya kine, ba 144,000 ke ka kibelengelo kacheche umvwe twikesakanya ku bakalume bonse bakishinka bajingako kala ne bajiko lelo jino. Bino kino ke kishinka mambo ba 144,000 basangulwa kuya mwiulu na kwingila mwingilo wazhila ye bebapa. Umvwe mukeba kushimika nzubo, abya mwakonsha kwambila basendwe ba bya buntungi bonse baji mu mpunzha yenu kwiya na kwimushimikila nzubo nyi? Ine. Mwakonsha kwambilatu bonka babena kukebewa. Mu jishinda jimotu, kechi bantu bonse bakishinka basalwa na Lesa kwingila uno mwingilo wiikajila wa kulama na Kilishitu mwiulu ne.
Buno Bufumu bwa mwiulu bukafikizha nkebelo Lesa yo ajinga nayo pa kulenga bantu. Yesu ne bakalama bakwabo 144,000 bakatangijilanga mwingilo wa kuwamisha ntanda yonse ne kwiyalula ke paladisa, bantu bakishinka bakukankalwa kubala mo bakekalanga na lusekelo myaka ne myaka. (Isaya 45:18; Lumwekesho 21:3, 4) Pa bano pakekala ne bantu baji mu kivuluko kya Lesa bakasangulwa.—Yoano 5:28, 29.
Mupopweshi wa Yehoba wakishinka yense, wa kala nangwa wa mu ano moba wakonsha kutambwila kya bupe kyawama kya bumi bwa myaka ne myaka. (Loma 6:23) Bantu bachechetu bo bakatambula bumi bwa kuya mwiulu na kwingila mwingilo wiikajila, kabiji bantu bavula bakatambula bumi bwa myaka ne myaka mu paladisa pano pa ntanda.