Ñanyi Bintu Baana byo Bafwainwa Kufunda pe Lesa?

“Binembelo byonse byanembelwe na lutangijilo lwa mupashi wa Lesa kabiji byo byawamina kwibafunjisha bantu, kwibakajipila, kwibolola ne kwibajimuna mu bololoke.”—2 TIMOTI 3:16.

BAANA bakebewa kwibafunjisha bukine pe Lesa. Kwepi ko bafwainwa kufunda buno bukine? Kufuma mu Baibolo, buku wa bupopweshi ye banemeka ku bantu mwaya ntanda yonse.

Baibolo uji nobe nkalata yafuma kwi Lesa. Mu ino nkalata, Lesa wasolola byo aji ne kupana lutangijilo lwa byubilo byawama ku baana banji bonse, banyike ne bakulumpe. Monai mafunjisho amo aji mu Baibolo ne baana byo bakonsha kufunjilako.

Ñanyi bintu Lesa byo akeba’mba tuyuke pe aye?

◼ Baibolo byo Afunjisha: “Anweba yenka, wa jizhina ja Yehoba, Yenu Mwine Wakila wa panopantanda ponse.”—Salamo 83:18.

Kyo tufunjilako: Lesa ke Muntu wa kine kabiji uji na jizhina.

◼ Baibolo byo Afunjisha: “Yehoba ukebakeba mu michima ya bonse ne kuyuka byonse byo bafukula ne kulanguluka. Umvwe obewa wamukeba ukamutana.”—1 Byambo bya Moba 28:9.

Kyo tufunjilako: Lesa wituta muchima atweba bonse, kuvwangakotu ne baana babacheche. (Salamo 10:14; 146:9) Kabiji ukeba atweba kufunda pe aye.

◼ Baibolo byo Afunjisha: “Kechi mukayanjishe . . . mwana wanshiwa ne. Inge mwibayanjisha, ke banjijile, kine nkomvwa kujila kwabo.”—Kulupuka 22:22-24.

Kyo tufunjilako: Yehoba umvwa ne milombelo ya banyike. Twakonsha kulomba kwi Lesa kimye kyonse ne kumubula byo tubena kulanguluka ne byo tubena kwiumvwa.

◼ Baibolo byo Afunjisha: “Baalulukile jibiji ne kumweseka Lesa, Ne kumuzhingijisha yenkaye Wazhila wa Isalela.”—Salamo 78:41.

Kyo tufunjilako: Ñambilo yetu ne byubilo byetu byakonsha kufichisha Yehoba ku muchima nangwa kumutokesha ku muchima, onkao mambo, twafwainwa kulangulukila jimo saka tukyangye kwamba ne kuba kintu.

Twafwainwa kuba byepi na bantu ba bikoba byapusana na byetu?

◼ Baibolo byo Afunjisha: “Lesa kechi uji na misalululo ne, bino mu bisaka byonse muntu wakamwa Lesa ne kuba byaoloka ye witabilwa kwi aye”—Byubilo 10:34, 35.

Kyo tufunjilako: Inge Lesa utambwila bantu bankomeno yapusana pusana, ne atweba kechi twafwainwa kwikala na misalululo ya bantu na mambo a kikoba nangwa mwekanyikilo yabo ne.

◼ Baibolo byo Afunjisha: “Inengezhainga kimye kyonse mwa kwibakumbwila bonse bemwipuzha pa mambo a luketekelo lo muji nalo, bino saka muba kino na kukoka muchima ne na mushingi.”—1 Petelo 3:15

Kyo tufunjilako: Pa kwisamba bya bupopweshi, twafwainwa kwamba na kusumininwa bino saka twatekanya. Twafwainwa ne kunemeka boba baitabila mu bintu byo twabula kwitabilamo.

Twafwainwa kuba byepi na ba mu kisemi?

◼ Baibolo byo Afunjisha: “Anweba baana, saka mukokela bansemi benu mu bintu byonse, mambo kino kitokesha Nkambo ku muchima.”—Kolose 3:20.

Kyo tufunjilako: Umvwe baana baikala na lukokelo, kimwesha’mba batemwa bansemi babo kabiji bakeba kutokesha Lesa ku muchima.

◼ Baibolo byo Afunjisha: “Saka mwitekenya anwe bene na bene ne kwilekelako mambo umvwe umo uji na mambo na mukwabo. Byonkatu Yehoba byo emulekejileko mambo, ne anweba byo byo mwafwainwa kubanga.”—Kolose 3:13.

Kyo tufunjilako: Bantu bakwabo, kuvwangakotu ne ba mu kisemi, bimye bimo bakonsha kwitufichisha ku muchima. Bino inge tukeba Lesa kwitulekelako mambo, twafwainwa kulekelangako bakwetu mambo.—Mateo 6:14, 15.

Mambo ka o twafwainwa kwikela bakishinka ne lusa?

◼ Baibolo byo Afunjisha: “Byo mwaleka kwamba bubela, iambilainga bukine anwe bene na bene.”—Efisesa 4:25.

Kyo tufunjilako: Inge ke twambe bya kine, ko kuba’mba tubena kulondela Lesa ne kumuletela lusekelo. Pano inge twaikala na kisela kya kubepa, ko kuba’mba tubena kulondela mulwanyi wa Lesa aye Diabola, “shanja bubela.”—Yoano 8:44; Titusa 1:2.

◼ Baibolo byo Afunjisha: “Ubilainga bakwenu byonka byo mukeba’mba bemubile.”—Mateo 7:12, Baibolo wa “Contemporary English Version.”

Kyo tufunjilako: Twafwainwa kulangulukilangako bakwetu pa byo beumvwa, byo balanguluka ne bikeba kisemi kyetu ne ba mu kimasamasa kyetu. Umvwe ‘twaubila bakwetu lusa,’ nabo bakonsha kwitubila lusa.—1 Petelo 3:8; Luka 6:38.

Byonka byaamba bino byakumwenako, mafunjisho a mu Baibolo akonsha kukwasha baana kwikala na muchima wa kusanta, mushingi ne pa kukoma bakonsha kwikala bakulumpe balangulukilako bakwabo. Pano bañanyi bafwainwa kufunjisha baana ano mafunjisho?