Lutundaiko Kufuma “Mu Tunwa twa Twanyike”

Mu December 2009, Kije Kikatampe kya mu Russia kyaambile’mba bashinke mingilo ya Bakamonyi ba kwa Yehoba mu muzhi wa Taganrog monka mu Russia, kwangata Nzubo ya Bufumu, ne kwamba kuba’mba mabuku etu 34 aletelenga lupato. Bino byambo bebibikile pa keyala wa Bakamonyi ba kwa Yehoba wa pa Intaneti pamo na bipikichala bya Bakamonyi bapichilenga mu makatazho, kubikapo ne baana ba bacheche.

Byo papichile bañondo bacheche, Ofweshi Watangijilanga Mwingilo wa Bakamonyi ba kwa Yehoba mu Russia watambwijile kibokoshi ne nkalata kufuma ku kisemi kya Bakamonyi mu Queensland, ku Australia bamwene sawakya wa byafuukwilepo Kije. Banembele amba: “Ku Balongo, Baana betu ba Cody ne Larissa batundaikilwe bingi pa kumona lwitabilo lwamwesheshe bakwabo mu Russia kimye kyo bapichilenga mu meseko. Banemba bikachi ne makalata, kabiji twanengezha kipe muji bya bupe kyo twatumina baana baji mu muzhi wa Taganrog, kuba’mba bayuke amba kuji baana baji mu mapunzha a kwalepa bengijila Yehoba mu bukishinka babena kwibalangulukapo. Kabiji bebatumina mutende wa moba onse.”

Byo batambwijile bya bupe, baana ba mu muzhi wa Taganrog banembele makalata a kusanchila kisemi kya mu Australia. Pa kumvwa byambo bya lutundaiko “kufuma mu tunwa twa twanyike,” Kamonyi umo wingijila pa musampi wa mu Russia wanembejile Cody ne Larissa amba: “Mwakonsha kufwanyikizha byo kyatama ku bonse bakulumpe ne banyike kwibamanyika pa kintu kyo babula kuba. Balongo ne banyenga yetu mu Taganrog kafwako kyatama kyo bauba ne, pano bino, bebangata Nzubo ya Bufumu. Kino kibaletela bingi bulanda. Kikebatundaika bingi pa kuyuka’mba bakwabo baji mu byalo bingi babena kulanguluka pe abo. Twimusanchila bingi pa muchima wenu wawama wa bumpanyi.”—Sala. 8:2.

Kya kine, twi banabankazhi ba mu ntanda yonse, kabiji butemwe bo twatemwa bakwetu bwitukwasha kushinda meseko ne bintu byakatazha byo tupitamo mu bwikalo. Ba mu kije byo bakisambilenga pa kukeba kuyuka inge mabuku a Bakamonyi ba kwa Yehoba aleta lupato, baana betu bamwesheshe kuba’mba bata muchima ku bintu bibena kupitamo bakwabo ba mu byalo bingi ne kumwesha bukine bwa byambo byaambile Yesu amba: “Pa kyo kino po po bakayukila bonse amba anweba mwi bana bami ba bwanga, inge mwitemwe anwe bene na bene.”—Yoa. 13:35.

[Kipikichala pa peja 32]

Baana mu kyalo kya Russia (ku kipiko) batambwijile bya bupe kufuma ku baana ba mu kyalo kya Australia (ku kilujo)