MEPUZHO A MU BAIBOLO A KUMBULWA

Nanchi mambo etu akonsha kulekelwa nyi?

Kwesakana na byamba Baibolo, bantu bonse bandengamambo. Twaswana bundengamambo kufuma ku muntu mutanshi aye, Adama. Kimye kimo, tuba bintu byatama panyuma ne kwilangulusha pa byo twauba. Mwana Lesa aye Yesu Kilishitu witufwijile na mambo a bundengamambo bwetu. Na mambo a kitapisho kya bukuzhi bwanji bundengamambo bwetu bwakonsha kulekelwa. Ke bupe bwafuma kwi Lesa.—Tangai Loma 3:23, 24.

Bantu bamo balenga mambo akatampe kabiji bazhinauka amba kana Lesa wakonsha kwibalekelako mambo nangwa ne. Kyawamakotu, Mambo a Lesa aamba’mba: “Mashi a Yesu Mwananji etutokesha ku bundengamambo bonse.” (1 Yoa. 1:7) Yehoba ulekelako mambo nangwa akatampetu umvwe twamwesha kuba amba twalapila.—Tangai Isaya 1:18.

Ñanyi bintu byo twakonsha kuba pa kuba’mba mambo etu alekelwe?

Umvwe tukeba Yehoba Lesa kwitulekelako mambo, twafwainwa kufunda pe aye pa kuba’mba tuyuke mashinda anji, mikambizho yanji ne byo akeba. (Yoano 17:3) Yehoba ulekelako mambo balapila ne kupimpula byubilo byabo.—Tangai Byubilo 3:19.

Kutokesha Lesa pa muchima kechi kwakatazha ne. Yehoba wayuka bintu byo tukankalwa kuba. Wa lusa kabiji wa kifyele. Nanchi kifyele kyanji kechi kimulengela kukeba kufunda pe aye pa kuba’mba mubenga bintu bimutokesha pa muchima ne nyi?—Tangai Salamo 103:13, 14.

[Kipikichala pa peja 15]

Kutokesha Lesa pa muchima kechi kwakatazha ne