Nanchi Mubena Kukoma Kufika ku Kimino kya Kilishitu Nyi?

1, 2. Ñanyi kikonkwanyi kyafwainwa kwibikila mwina Kilishitu yense? Ambai kya kumwenako.

MWANAMUKAZHI uba byepi inge ubena kukeba kupota bipangwa byawama pa kisankanyi? Javula kechi utala pa kubaya kwa kipangwa nangwa kupeela kwa mutengo ne. Bino, ukeba byawama, byo baapa katataka kabiji byapya bulongo. Ukeba bipangwa byapya, ko kuba’mba byakoma.

² Panyuma ya kuba muntu wafunda pe Yehoba ne kufuukulapo kubatizhiwa, bulunda bwanji ne Lesa butwajijila kukoma. Kikonkwanyi kyanji ke kukeba kwikala mwina Kilishitu wakoma. Kuno kukoma kechi kulumbulula kukoma kwa mu myaka ya kusemwa ne. Kulumbulula kukoma ku mupashi, ko kuba’mba kwikala mulunda wa kine ne Yehoba. Mutumwa Paulo wakebelenga bena Kilishitu ba mu Efisesa kukoma. Wibatundaikile kwikala bakwatankana mu lwitabilo ne kutwajijila kufunda pe Yesu pa kuba’mba bakekale “nobe muntu wakoma wafika ku kimino kya Kilishitu.”—Efisesa 4:13.

3. Bajinga mu kipwilo kya bena Efisesa bepasha byepi na bantu ba Yehoba lelo jino?

³ Paulo wanembele nkalata ku kipwilo kya bena Efisesa saka papita myaka yavula kufuma po kyalengejilwe. Bavula bajinga mu kino kipwilo babanjile mu bukine, ko kuba’mba bajinga bena Kilishitu bakoma. Pano bino, mwajinga bamo bafwainwe kukosesha bulunda bwabo ne Yehoba. Po pamotu ne lelo jino, balongo ne banyenga bavula baingijila Yehoba pa myaka yavula kabiji baikala ke bena Kilishitu bakoma. Nangwa byonkabyo, bamo mu kipwilo bakyangye kukoma. Kya kumwenako, kuji bavula babatizhiwa pa mwaka pa mwaka, onkao mambo, bakebewa kukoma. Nga anweba kiji byepi?—Kolose 2:6, 7.

MWINA KILISHITU WAKONSHA KUKOMA BYEPI?

4, 5. Mu ñanyi jishinda bena Kilishitu bakoma mo bapusena pusena, bino ñanyi bintu bipasha byo baji nabyo? (Monai kipikichala kitanshi.)

⁴ Inge mwatajisha bipangwa byapya pa kisankanyi, mukamona’mba kechi byaesakana kubaya ne. Nangwa byonkabyo, byonse bikala na bintu bimo bilengela’mba muyuke amba byapya. Byo biji ne bena Kilishitu bakoma. Kechi baesakana ne. Bafuma mu byalo byapusana pusana ne nkomeno yapusana pusana. Bapusana myaka ya kusemwa ne bintu byo batemwa ne byo babula kutemwa. Pano bino, bena Kilishitu bonse bakoma baji na byubilo bipasha bibayukisha’mba bakoma. Ñanyi byubilo bimo byonkabye?

⁵ Mwina Kilishitu wakoma uba byaubanga Yesu ne kulondela “bulongo mu ngayo yanji.” (1 Petelo 2:21) Yesu waambile’mba kyanema bingi muntu kutemwa Yehoba na muchima wanji yense, mweo wanji yense ne na maana anji onse ne kutemwa mukwabo byonka byo etemwa aye mwine. (Mateo 22:37-39) Mwina Kilishitu wakoma wesekesha bingi kumvwina luno lujimuno. Bwikalo bwanji bumwesha’mba bulunda bwanji ne Yehoba ne kutemwa bakwabo kyo kintu kyanema kwi aye.

6, 7. (a) Ñanyi byubilo bikwabo biyukisha mwina Kilishitu wakoma? (b) Ñanyi mepuzho o twakonsha kwishikisha?

⁶ Butemwe ke kyubilo kimo pa byubilo byavula bimwesha’mba mwina Kilishitu wakoma. (Ngalatiya 5:22, 23) Umwesha ne kukooka muchima, kwikanya ne kutekanya. Abino byubilo byakonsha kumukwasha kubula kuzhingila inge ubena kupita mu makatazho, ne kuchinchika ne kubula kulefulwa inge bintu byo aketekejilenga byabula kumweka. Mu lufunjisho lwanji lwa pa bunke, mwina Kilishitu wakoma ukebakeba mafunde a mu Baibolo amukwasha kuyuka byawama ne byatama. Kabiji inge walondela jiwi janji ja mu muchima jo afunjisha bulongo mwayila Baibolo, wakonsha kufuukula byawama. Mwina Kilishitu wakoma wipelula, onkao mambo, waketekela’mba lutangijilo lwa Yehoba ne mafunde anji awama kukila byo alanguluka.a (Monai tubyambo twa munshi.) Usapwila mambo awama na mukoyo kabiji wingila papelela bulume bwanji kukwasha kipwilo kukwatankana.

⁷ Nangwa kya kuba twaingijila Yehoba myaka yavula, atweba bonse twafwainwa kwishikisha’mba: ‘Nanchi kujipo lupimpu lo nakonsha kuba pa kuba’mba ndondelenga bulongo Yesu nyi? Nanchi kujipo mo nakonsha kuwamishako nyi?’

“KAJO KAKOSA KO KA BANTU BAKOMA”

8. Ñanyi bintu bimwesha’mba Yesu wayukile bulongo ne kumvwisha byamba Baibolo?

⁸ Yesu Kilishitu wayukile bulongo Binembelo ne kumvwisha mo byatala. Nangwatu byo ajinga na myaka 12, waingijishe Binembelo pa kwisamba na bafunjishi mu nzubo ya Lesa. “Aba bonse bamutelekelenga bakuminyenga bingi maana anji ne mikumbu yanji.” (Luka 2:46, 47) Palutwe kacheche, kimye kyo asapwijilenga, waingijishe bulongo Mambo a Lesa pa kuzhindamikapo balwanyi banji.—Mateo 22:41-46.

9. (a) Ñanyi mutanchi wa lufunjisho wafwainwa kwikala na mwina Kilishitu wakoma? (b) Mambo ka o tufunjila Baibolo?

⁹ Muntu ukeba kwikala mwina Kilishitu wakoma ulondela byaubanga Yesu kabiji weseka papelela bulume bwanji kumvwisha byamba Baibolo. Kimye kyonse ukebakeba bukine bwazhika bwa mu Binembelo, mambo wayuka’mba “kajo kakosa ko ka bantu bakoma.” (Bahebelu 5:14) Mwina Kilishitu wakoma ukeba ‘kuyuka bulongo’ Baibolo. (Efisesa 4:13) Onkao mambo, ishikishai’mba: ‘Nanchi ntanga Baibolo moba onse nyi? Nanchi nji na mutanchi wa lufunjisho lwa pa bunke nyi? Nanchi ngikala na kupopwela kwa kisemi mulungu ne mulungu nyi?’ Inge mubena kufunda Baibolo, kebainga mafunde akonsha kwimukwasha kuyuka bilanguluka Yehoba ne byo omvwa. Kepo ne kwingijisha ano mafunde byo mubena kufuukula bya kuba. Kuba bino kukemukwasha kutwajijila kufwenya kwipi ne Yehoba.

10. Mwina Kilishitu wakoma umona byepi mizhilo ne mafunde a Lesa?

¹⁰ Kuji byavula byafwainwa kuba mwina Kilishitu wakoma kukila kuyukatu byamba Baibolo. Wafwainwa kutemwa mizhilo ya Lesa ne mafunde anji. Kepo ne kumwesha buno butemwe kupichila mu kuba kyaswa muchima wa Yehoba kukila kuba byo akeba aye mwine. Kabiji upimpula ne bwikalo, ndangulukilo ne byubilo byanji. Kya kumwenako, ulondela Yesu ne kuvwala bumuntu bupya, “bwalengelwe monka mwayila kyaswa muchima wa Lesa mu bololoke ne mu bukishinka bwa kine.” (Tangai Efisesa 4:22-24.) Kyanema bingi kuvuluka’mba Lesa waingijishe mupashi wanji wazhila kutangijila banembele Baibolo. Onkao mambo, inge mwina Kilishitu ubena kufunda Baibolo, mupashi wazhila wa Lesa umukwasha kukoma mu maana, kukomesha butemwe ne kukomesha bulunda bwanji ne Yehoba.

TUNDAIKAINGA LUKWATANKANO

11. Yesu byo ajinga pano pa ntanda, waikalanga na bantu ba mutundu ka?

¹¹ Yesu wajinga muntu walumbuluka. Pano bino, Yesu byo ajinga pano pa ntanda, waikalanga na bantu bambulwa kulumbuluka. Bansemi banji ne bankasanji bonse bajinga bambulwa kulumbuluka. Nangwatu baana ba bwanga ba kwa Yesu bamwesheshenga byubilo nabiji bwitote ne kwitemwa. Kya kumwenako, bufuku saka akyangye kufwa, baana banji ba bwanga bepachikilenga “pa mambo a wajinga mukulumpe pe abo.” (Luka 22:24) Nangwa kya kuba milanguluko yabo kechi yawamine ne, Yesu wayukile’mba katatakatu baana banji ba bwanga bakekale bena Kilishitu bakoma ne kulenga kipwilo kyakwatankana. Bonkabwa bufuku, Yesu wibalombejileko amba bakwatankane. Walombele Shanji wa mwiulu amba bonse bekale ke umo, “byonkatu anweba Tata byo muji ne amiwa, ne amiwa byo nji ne anweba.” Kabiji wanungilepo amba: “Pa kuba’mba bekale ke umo byonka byo tuji anweba ne amiwa.”—Yoano 17:21, 22.

12, 13. (a) Byo tuji bena Kilishitu, ñanyi kintu kyo tukeba kuba? (b) Mulongo umo wafunjile byepi kutundaika lukwatankano?

¹² Mwina Kilishitu wakoma utundaika lukwatankano mu kipwilo. (Tangai Efisesa 4:1-6, 15, 16.) Byo tuji bena Kilishitu, kyo tukeba ke ‘kunungakana pamo,’ ko kuba’mba kwingijila pamo saka twakwatankana. Pa kuba’mba mwina Kilishitu akwatankane na bakwabo, wafwainwa kwipelula. Onkao mambo, nangwa kya kuba bakwabo balubankanya na mambo a bumbulwa kulumbuluka, mwina Kilishitu wakoma wibikako kutundaika lukwatankano mu kipwilo. Onkao mambo, ishikishai’mba: ‘Nguba byepi inge kya kuba mulongo nangwa nyenga walubankanya? Ñumvwa byepi inge kya kuba muntu umo wankozha ku muchima? Nanchi ndeka kwisamba nanji nyi? Inyi ngeseka kubwezha mutende pakachi ketu?’ Mwina Kilishitu wakoma ukeba kupwisha lukatazho kukila kuletela bakwabo makatazho.

¹³ Langulukai pa byaubile Uwe. Kala wazhingilanga na mambo a bumbulwa kulumbuluka bwa balongo ne banyenga. Kepo afuukwilepo kufunda pa bwikalo bwa kwa Davida mu Baibolo ne mu buku wa Insight on the Scriptures. Mambo ka o afunjijile pe Davida? Mambo Davida naye wajinga na makatazho na bakalume ba Lesa bamo. Kya kumwenako, Mfumu Saulo wakebelenga kwipaya Davida, bantu bamo bakebelenga kumwasa mabwe kabiji ne mukazhanji wamulengulwile. (1 Samwela 19:9-11; 30:1-6; 2 Samwela 6:14-22) Bino nangwa kya kuba bakwabo bamubilenga bino bintu byatama, Davida watwajijile kutemwa Yehoba ne kumuketekela. Kabiji Davida wajinga na lusa. Uwe naye wamwene kuba’mba wafwainwa kuba byaubile Davida. Byo atangilenga Baibolo, wafunjile kuba’mba wafwainwe kwalulako ndangulukilo yanji pa byo amonanga bumbulwa kulumbuluka bwa balongo banji. Wafwainwe kufunda kulubako ku byalubankanyanga bakwabo ne kutundaika lukwatankano mu kipwilo. Nanchi ne anweba byo byo muba nyi?

SALAI BALUNDA BOBA KYASWA MUCHIMA WA LESA

14. Yesu wasajile byepi balunda nanji?

¹⁴ Yesu Kilishitu wakasulukijile bantu bonse. Banabalume ne banabakazhi, banyike ne bakulumpe nangwatu baana, bakasulukanga kuya kwi Yesu. Bino wasajile bulongo bantu ba kwikala balunda nanji. Waambijile batumwa banji amba: “Anweba mwi balunda nami umvwe saka muba byo mbena kwimukambizha.” (Yoano 15:14) Yesu wasajile balunda nanji mu bantu bamulondelanga mu bukishinka kabiji batemenwe Yehoba ne kumwingijila. Nanchi ne anweba musala balunda batemwa Yehoba na muchima yense nyi? Mambo ka kino o kyanemena?

15. Bena Kilishitu banyike bakonsha kumwenamo byepi mu kwikala balunda na bena Kilishitu bakoma?

¹⁵ Bipangwa byavula bipya bulongo inge biji pa mute. Byo biji ne butemwe bwa balongo ne banyenga, bwakonsha kwimulengela kwikala mwina Kilishitu wakoma. Nanchi mwi mwanyike ubena kukeba kufuukula bya kuba mu bwikalo nyi? Umvwe ibyo, mwafwainwa kusala balunda baingijila Yehoba pa myaka yavula kabiji batundaika lukwatankano mu kipwilo. Kampepo bapichilepo mu makatazho mu bwikalo bwabo ne kuchinchika saka bengijila Yehoba. Bakonsha kwimukwasha kusala bya kuba byawama mu bwikalo. Inge saka mupwanañana nabo, bakonsha kwimukwasha kufuukulapo bulongo bya kuba ne kwikala mwina Kilishitu wakoma.—Tangai Bahebelu 5:14.

16. Bakikulumpe mu kipwilo bakwashishe byepi nsongwakazhi umo byo akijinga mwanyike?

¹⁶ Helga uvuluka’mba mu mwaka wanji wa kupelako pa sukulu, bavula bo afundanga nabo baambanga pa bintu byo bakoba mu bwikalo bwabo. Bavula bakebanga kuya ku yunivesiti pa kuba’mba bakengilenga nkito yawama. Nangwa byonkabyo, Helga wisambile na balunda nanji bakoma mu kipwilo. Waamba’mba: “Bavula bajinga bakulumpe pe amiwa, kabiji bankwashishe bingi. Bantundaikile kutendeka mwingilo wa kimye kyonse. Onkao mambo, naingijile myaka itanu mu bupainiya. Luno byo papita myaka yavula, nji bingi na lusekelo na mambo a kuba natele muchima pa kwingijila Yehoba kufumatu ku bwanyike. Kechi nelangulusha pa kuba bino ne.”

17, 18. Twakonsha kwingijila byepi Yehoba bulongo?

¹⁷ Inge saka tulondela Yesu, tukekala bena Kilishitu bakoma. Tukafwenya kwipi ne Yehoba kabiji tukakebeshanga kumwingijila. Muntu wakonsha kwingijila bulongo Yehoba inge wakoma ku mupashi. Yesu watundaikile baana banji ba bwanga amba: “Kyeya kyenu kimweke ku bantu bonse, kuba’mba bamone mingilo yenu yawama ne kutumbijika Shenu wa mwiulu.”—Mateo 5:16.

¹⁸ Twafunda mwina Kilishitu wakoma byo akonsha kutundaika bulongo kipwilo. Kabiji mwina Kilishitu umwesha’mba wakoma kupichila ne mu byo engijisha jiwi janji ja mu muchima. Jiwi jetu ja mu muchima jakonsha kwitukwasha byepi kufuukula bintu na maana? Kabiji twakonsha kunemeka byepi jiwi ja mu muchima ja bakwetu? Tukakumbula ano mepuzho mu mutwe walondelapo.