Twayai Tunemeke Yehoba ne Mwananji
Byo Bakamwenamo Bonse Bakatanwa ku Kivuluko pa April 8
1 Bañanyi bapewa mushingi mukatampe mu ano moba? Ke boba bengila mingilo yanema ku bantu. Bino nangwa kiji byonkabyo, kechi javula bantu jo balabijila mingilo yabo ne. Ibyepi pa mambo a mingilo ya kine ikwasha bantu bonse? Ino yo mingilo ikatampe yo tukatapo muchima mu kimye kyo tukavulukanga Kijiilo kya Nkambo, pa kuzhika juba pa April 8, 2001.
2 Ñanyi wafwainwa kunemekwa pakatampe? Baibolo ikumbula’mba: “Mwafwainwa anweba, [Yehoba, NW] ... kutambula lukumo, ne buneme, ne bulume: mambo anweba yenu mwalengele byonse.” (Lum. 4:11) Byo aji Mulenga, Yehoba ye Nkambo kabiji ye Kalama wa mu kulengwa konse. Munema wa kumunemeka ukatwajijila myaka ne myaka!—1 Timo. 1:17.
3 Yesu Kilishitu, Mwana Lesa, waingijile mingilo yanema ikaletela bantu mapesho akabula kupwa. Kya kine, walondejilenga byuba Shanji. (Yoa. 5:19) Lukokelo lwanji lwalumbuluka ne mwingilo wanji wakishinka byamulengejile kwikala “wafwainwa kutambula bulume, ne bunonshi, ne mana, ne ngovu, ne buneme, ne lukumo, ne lutakaiko.” (Lum. 5:12) Shanji wamunemekele ne kumwikazha pa Bufumu. (Sala. 2:6-8) Ne atweba tukekala na jishuko ja kunemeka Shanji ne Mwana byo tukavulukanga Kijiilo kya Nkambo pa April 8, 2001.
4 Ke kya bulanda bingi kumona’mba bantu bamo mu bwikalo bwabo kechi bapa Yehoba ne Mwananji mushingi wafwainwa ne. Nangwatu bajinga bantu ba Lesa abo bena Isalela, pa bimye bimo kechi bapainenga mushingi wafwainwa kwi Yehoba ne. Bajinga na misula ya kine kine. (Mala. 1:6) Mushingi wa kine wikala na lukokelo lwa kishinka lwaimana pa butemwe ne lusanchilo lwa byonse bitubila Yehoba ne Mwananji. Umvwe ke tupane mushingi ne munema wa uno mutundu ne kwibasanchila mu byubilo byetu byonse, ko kuba’mba tuji na moyo wakwakamwa Yehoba ne Yesu. Kipwilo kya bwina Kilishitu byo byo kifunjisha ne kukwasha bantu kuba byonkabyo.
5 Kimye Kyafwainwa Kumwesheshamo Mushingi: Kupwila kwa Kivuluko kwikalako pa mwaka pa mwaka kwanema bingi ku bantu ba Yehoba. Onkao mambo, bonse basaka kwingijila Yehoba ne kumunemeka bafwainwa kutanwako. (Luka 22:19) Twaketekela kuba’mba kununga pa bakamonyi babambakana 6 milyonyi, bantu bakeba kufunda bukine bakatanwako bo bakavuzha kibelengelo kukila ne pa 14 milyoni. Byo jikekalapo jishuko ja kunemeka Shetu wa mwiulu! Nangwa kya kuba kuvuluka kwashinkamana pe Yesu, mushingi ne munema yetumwesha pa byoaubile utumbijika Shanji wa mutumine.—Yoa. 5:23.
6 Twafwainwa kuba byepi pa kuba’mba tutundaike kuno kupwila? Twafwainwa kukwasha bakeba kufunda bukine kumwenamo pakatampe. Basashijilai kuba’mba bakatanweko, kabiji inge kyakonsheka, bakwashai ne mu ñendelo. Lumbululai bulongo kyo kwikela jashi. Balumbululai ku bakwenu kuba’mba bebayuke. Byo bakamona ne kumvwa bikebalengela kukeba kukwatankana ne atweba mu kunemeka Yehoba.
7 Kange mupeezhe buneme bwa kuno kupwila ne. Mwana wa sukulu umo wa pa univesiti waambile’mba: “Ntanwa javula ku Kijiilo kya Nkambo ku chechi yetu, bino kino kyapusana bingi na byo tuba. Namona namba bino byo byamba Baibolo, kabiji mbena kulanguluka namba yenu mufunjisha bukine.” Watatwile kutanwa ku kupwila kimye kyonse kabiji kechi papichile ne kimyetu ne, wabatizwe.
8 Kwashai Bapya Kununguluka: Labijilai bapya bonse batanwa ku Kivuluko, kabiji bukiji-bukiji mukapitulukemo nabo mu bintu byawama byo bafunjile ne kumona. Balumbulwilai kuba’mba kwikala ne kupwila kukwabo ko bakonsha kutanwako ne kuyukilako byavula mu Baibolo. Kupitulukamo nabo mu kitango 17 mu buku wa Kuyuka pa mutwe wa kuba’mba, “Tanai Bukikizhi Pakachi ka Bantu ba kwa Lesa,” kukebakwasha kuyuka bukwasho bwavula bwa ku mupashi bupana kipwilo, abo bwakonsha kwibakwasha. Umvwe muji na vidyo nangwa paji ye mwayuka uji nayo batambishaiko ya Our Whole Association of Brothers, pa kuba’mba bene bemwene na meso buumo, lusekelo ne kubambakana kuji na bantu ba Lesa!
9 Kyanema bingi bantu bakeba kufunda bukine kwifunjila abo bene byo bakonsha kunemeka Yehoba. Balumbulwilai’mba lulombelo lufuma mukachi ka muchima lusangajika Yehoba kabiji lwitukosesha ku mupashi. (1 Yoa. 5:14) Isambai nabo mu lufunjisho 8 kufika ku 12 mu buloshuwa wa Nanchi Lesa Ukebaka ne kwibalumbulwila byubilo binemeka Yehoba. Mu kwisambila nabo pamo byaambiwapo mu buloshuwa wa Inte sha kwa Yehova Ni Bani? Finshi Basuminamo? mapeja 30 ne 31, bakoseshai kulanguluka kunemeka Yehoba kupichila mu kwingilako mwingilo wa busapwishi.
10 Kusanchila kitapisho kya kwa Yesu ne jishuko jetu ja kwingila byo tuji baana banji ba bwanga kunemeka Shetu ne kuleta mapesho ku bakwetu. Yesu walaile’mba: “Umvwe muntu uñingijila amiwa, bakamunemeka kwi Batata.”—Yoa. 12:26.