Kukepeshako Kukaya ne Kukokoloka
1 Mu ano moba akatazha, atweba bonse twafwainwa kuyuka mwakubila bintu pa kimye ne pa kimye. Kukaya kumo kechi kwatama ne. Bino, kutesha muchima ku kukaya, kukokoloka ne kwisambila mukoyo na balunda netu kulengela muntu kwikala na kimye kicheche kya kuba bintu bya ku mupashi. Twafwainwa kukepeshako kukaya ne kukokoloka. (Mat. 5:3) Twafwainwa kwikukepeshako byepi? Twafwainwa kuba bino umvwe twalondela lujimuno luji pa Efisesa 5:15-17.
2 Yukai pa Kupelela: Paulo wanembele’mba bena Kilishitu bafwainwa ‘kutajijisha bulongo’ byo boba mu bwikalo bwabo. Kukepeshako bya kuba, kukepeshako kukokoloka, ne kwikanya, ko kukebewa pa kuba’mba tumonepo kimye kya kubilamo bintu bikebewa. Kyawama bingi kulangulukishapo bulongo pa byo twingijisha kimye kyetu kya kukokoloka. Kukaya kwafwainwa kwitulengela kumvwa bulongo, kechi kwitulengela kwiumvwa nobe tubena konaunatu kimye kyetu nangwa kwitukokeshatu zubulu ne. Umvwe panyuma ya kukaya ketwiumvwe nobe tubena konaunatu kimye ne kwiumvwa kutama, twafwainwa kwikukepeshako ne kumona byo twafwainwa kwingijisha kimye kyetu.
3 Jimukai: Paulo witujimwineko’mba ‘kasa tupulusha bimye’ mwakubila bintu byanema mu bwikalo, kechi kwikala “bakosama” ne. Bena Kilishitu bepana kechi bafwainwa kwalula kukaya ne kukokoloka kwikala kintu kikatampe mu bwikalo bwabo ne. Nangwa kya kuba kukokoloka ne kukaya byakonsha kwitukosesha ku mubiji, bulume bwa Lesa bo bwitukosesha ku mupashi. (Isa. 40:29-31) Tutambwila mupashi wanji pa kwingila mingilo ya teokalasi—kufunda Baibolo, kutanwa ku kupwila ne kuya mu mwingilo wa mu bujimi, kechi tumutambwila mu kukaya ne.
4 Yukai Bintu Byanema byo Mwafwainwa Kuba Patanshi: Paulo wabujile bena Kilishitu ‘kuyuka mwayila kyaswa muchima wa Nkambo.’ Yesu wafunjishe kuba’mba mingilo yetu yafwainwa kukwatankana na Bufumu bwa Lesa mambo bo bwafwainwa kwikala kintu kitanshi mu bwikalo bwetu. (Mat. 6:33) Kyanema bingi patanshi kuba bintu byakonsha kwitukwasha kwikala mwayila kwipana kwetu kwi Yehoba. Apa bino twamonapo kimye kya kukaya ne kukokoloka. Umvwe twauba byobyo, kukaya kuketuletela buwame ne kusangalala.—Sapwi. 5:12.