Ketekelai Yehoba Kwimukosesha
1 Kuji bishinka byavula bitulengela kuketekela Yehoba. Kusapwila mambo awama “panopantanda ponse” kemwingilo wakatazha bingi. (Mat. 24:14) Kimye kyonse monka twalwila nabumbulwakoloka bwetu. (Loma 7:21-23) Kabiji, ‘tulwa ... na bamfumu [bakila bulume bwabantu] ba ino mfishi ya pano panshi.’ (Efi. 6:11, 12) Kwakubula nangwa kuzhinaukatune, tukeba bukwasho. Yehoba wakonsha kwitukosesha byepi?
2 Lulombelo: Yehoba upana mupashi wanji wazhila kyatutu kubakalume banji bamulomba. (Luka 11:13) Nanchi mufwabo bulume bwakusapwila kunzubo nenzubo, mumukwakwa nangwa pafoninyi? Muchina kusapwila busapwishi bwakushukilwa? Nanchi misula yabantu munyaunda yenu imulefwila kizaku kyenunyi? Ibyepi umvwe bemukanjikizha’mba musankilepo lwitabilo lwenu nangwa bulumbuluke bwenu? Ketekelai Yehoba nekulomba bulume bwanji.—Fili. 4:13.
3 Lufunjisho Lwapabunke: Byonka byotwikala bakosa namambo akuja kajo kakumubiji, byobyo tukoseshiwa nekumupashi umvwe kimye kyonse saka tuja Byambo bya Lesa nebiji mumabuku a ‘kalume wa kishinka ne wa maana.’ (Mat. 4:4; 24:45) Stanley Jones byobamwipwizhe kyamulengejile kwikala nabulume bwakuchinchika pamyaka yavula mukaleya ku China kwakubula Baibolo ne, wakumbwile’mba: “Twakonsha kukosa mulwitabilo. Bino pakuba’mba tukose patanshi twafwainwa kufunda. Umvwe nekufundane kuba twaikala nabulume bwakwitukosesha mukachi ketune.”
4 Kutanwanga Kukupwila: Pakupwila kwabwina Kilishitu mumyaka-kitota kitanshi, ba Yudasa ne Silasa ‘bakwashishenga balongo na byambo byavula, ne kwibakosesha michima yabo.’ (Byu. 15:32) Byonkabyo nelelo jino, bintu byotumvwa pakupwila bitubaishila lusanchilo lwetu lwakusanchila Yehoba, kukomesha lwitabilo lwetu nekwitutundaika kwingila mwingilo. Kupwila kwitulengela kupwañana pamo na ‘bakwetu bengila neatweba na mambo a bufumu bwa Lesa betukosesha muchima.’—Kolo. 4:11.
5 Tukebewa bukwasho bwakwitukwasha mubino “bimye byakatazha.” (2 Timo. 3:1) Kuboba bakoseshiwa kwi Yehoba, betubula’mba: “Bakatumbuka ne kuya mwiulu nobe bampungu; bakanyemanga ne kukoka ne; bakendaendangatu ne kupungila ne.”—Isa. 40:31.