“Nga Kimye Nekitanepi?”
1 Bino byobyo twijizhañanya atweba bavula, mambo bwikalo bwetu bwatabankana namingilo yavula. Kyambiwa kuba’mba kimye kekintu kimo kyakila mukunema bingi kabiji kechi kibanda kupwane. Onkao mambo, nga kimye kyakubilamo bintu byawamisha, nabiji kutanga nekufunda Byambo bya Lesa twakonsha kwikitanapi?—Fili. 1:10.
2 Kukeba kimye kechi kyokintu kyanemane, bino kufuukula byotukeba kuba mukimye kyotuji nakyo kyokintu kikatampe. Atweba bonse twikala namaawala 168 mumulungu umo, amo muji maawala 100 otulajilamo nekwingijilamo mingilo ikwabo. Pano nga maawala akwabo ashalapo twakonsha kwiengijisha byepi bulongo? Efisesa 5:15-17 witukambizha’mba twendenga ‘kechi pamo na babula maana ne, kana pamo na ba maana; kasa tupulusha bimye [ne] kuyuka mwayila kyaswa muchima wa Nkambo.’ Kino kibena kumwesha’mba kimye kyonse twafwainwa kubilamo bintu Yehoba byoetwambila’mba byanema.
3 Yesu waesakenye moba etu naakwa Nowa. (Luka 17:26, 27) Mukyokya kimye bantu bapayankene nabyakutabataba byajuba nejuba. Nangwa byonkabyo, Nowa aye waingijishe kimye kyanji kyonse kufikilamo bwato bukatampe nekusapwila. (Hebe. 11:7; 2 Pe. 2:5) Kimye wikitaine byepi? Wikitaine kupichila mukuba kyaswa muchima wa Lesa patanshi nekumukokela kuba bintu monka “mo aubijile.”—Nte. 6:22.
4 Kika Kyotwafwainwa Kuba Patanshi? Yesu waambile’mba: “Muntu kechi akamwene bumi ku shinkwa yenka ne, poso ku byambo byonse bifuma mu kanwa ka Lesa.” (Mat. 4:4) Mulungu nemulungu, tutambwila “kajo [kakumupashi] pa bimye byafwainwa.” (Luka 12:42) Kino kikebewa kwikala namutanchi wakutanga nekufunda kimye kyonse pakuba’mba twikasheñunune konse umvwe tukeba kumwenamo mfweto yakine kine. Namambo alusanchilo lwetu lwakusanchila kajo kakumupashi, kechi twikatambulatu nobe kabukiji-bukiji nekutala-talamotu kyabyonkabya uba nobe muntu ubena kuja aku saanyema lubilone. Mukifulo kyabyobyo, lusanchilo lwitulengela kwikala nakimye kyakufunjilamo nekwiyowa bintu byakumupashi.
5 Kuja kajo kakumupashi kwakonsha kwitulengela kwikala nabumi bwamyaka nemyaka. (Yoa. 17:3) Kyo kintu kitanshi kyanema pamutanchi wetu wabintu byakuba juba nejuba. Abya twakonsha kwikalapo nakimye kyakutanga Baibolo juba nejuba nekunengezhezhanga jimo byakukafunda pakupwila kwabwina Kilishitu nyi? Ee, twakonsha. Nanchi tukatambwila, “mfweto ikatampe” ifuma mukuyuka nekuba kyaswa muchima wa Lesa.—Sala. 19:7-11.