Komeshainga Maana Enu Alumbuluka
1 Ano moba akupelako amalwa otujimo, meseko amisango nemisango abavujileko bingi kubantu ba Lesa konse konse. (2 Timo. 3:1-5) Atweba bonse twafwainwa lutundaiko pakuba’mba twikale bakosa mulwitabilo. (1 Ko. 16:13) Twakonsha kuba kino nabukwasho bwa Yehoba byotutwajijila kimye kyonse nakufunda Byambo byanji, kuketekela mupashi wanji nekwikala mujibumba janji.—Sala. 37:28; Loma 8:38, 39; Lum. 2:10.
2 Nabishinka byawama, mutwe wakuba’mba “Mu Kumfwikisha Mube Abakalamba” waambiwepo mumajashi akupwila kwiikajila kwajuba jimo kwajingako mwaka wapwa. Wafumine mu 1 Kolinda 14:20, motutanga byambo byamutumwa Paulo’mba: ‘Anwebakwetu, kechi mwikale banyike mu maana ne: pakuba mu bubi mwikale balukeke, kabiji mu maana mwikale bakoma.’ Mwalangulukilepoka paano majashi?
3 “Byoetukoseshepo!” “Bino byambo byobyo twakebelenga!” Bino byo bimo byaambilepo bantu. Muntu umo wabula Kamonyi watainwe kukupwila kwiikajila kwajuba jimo nakumona mwananji wamukazhi wamyaka yakusemwa 12 wabatizwenga waambile’mba wiatemenwe bingi ano majashi nekumona byoakonsha kufweta kisemi kyanji. Nanchi nenuwa byobyo mubena kwiumvwanyi? Twayai tuvulukepo bishinka bimo bikatampe byaambiwe mumajashi.
4 Pakuba’mba Tukomeshe Maana Alumbuluka Twafwainwa Kwikala Namaana: Mujashi jakushinkwila, jakuba’mba “Lundululeni Ukumfwikisha Kwenu Nomba,” ñanyi bintu ñambi byoakonkomwejilepo kuba’mba byobikebewa pakwingila namakatazho aano moba? Kechi kikebewa kwikalatu namaana onkane. Twafwainwa kukomesha nekubaisha maana etu otufunda mu Baibolo, kuchina’mba twakashinjiwa nabubi bwituzhokoloka. Pakuba’mba twikale naano maana kikebewa Lesa kasa abena kwitutangijila. Byonka byaubile nyimbi wa masalamo, twafwainwa kulomba Yehoba mululombelo’mba tumvwishenga mizhilo nemilaye yanji pakuba’mba tumwingijilenga namuchima yense.—Sala. 119:1, 2, 34.
5 Mujashi jalondejilepo, mukulumpe wakijiiji waambile’mba, kupichila mu Byambo nejibumba janji, Yehoba witupa ‘Byakwitukwasha Kwikala Bakoma Mukumvwisha Baibolo.’ Kumvwa bekulumbulwile’mba “bulume bwakumona mukintu nekuyuka byavwangiwamo umvwe twayuka lukwatankano lwabijimo, kuba’mba twibiyuke.” Ñanyi wakonsha kwitukwasha mukukomesha buno bulume? Yehoba wapana byabupe kubantu bakwitukwasha kukoma kumupashi. (Efi. 4:11, 12) Jibumba janji japanopantanda jitukambizha kutanga Byambo bya Lesa juba nejuba nekutanwa kukupwila kimye kyonse. (Sala. 1:2) Betufunjisha byakwingijisha Baibolo nemabuku etu abwina Kilishitu mulufunjisho lwapabunke, lwakisemi nemukunengezhezha jimo byakukafunda kukupwila nemumwingilo wamubujimi. Nanchi mubena kwingijisha bulongo luno lunengezhonyi? Abya mubena kutwajijila kimye kyonse nakutanga Baibolo nyi? Kuba kino kukebewa bingi kuchina’mba twakajimbaikwa kubyubilo byaino ntanda, mafwashonyi, butemwamaana nebyabujimbijimbi.—Kolo. 2:6-8.
6 Twafwainwa Kufunjisha Maana Etu Alumbuluka: Mujashi janji jitanshi jakuba’mba, “Lindeni Bumupashi Ukupitila mu Kukansho Kulingulula Kwenu,” ñambi mwenyi walumbulwile’mba bantu baino ntanda kechi bakonsha kupusanya kyawama nekyatamane. (Isa. 5:20, 21) Mambo akuba bakana kukokela mizhilo yaoloka ya Lesa. Bino, atweba twafunda kumupashi mujibumba ja Yehoba tukokela mizhilo ya Lesa itukwasha mumingilo yetu nemubyubilo byetu. Onkao mambo, tuyuka kyawama kyaitabilwa kumeso a Yehoba mwayila kyaswa muchima wanji walumbuluka.—Loma 12:2.
7 Pakuba’mba tuchinuzhuke ndangulukilo yaluwankana yaino ntanda nebifumamo byatama, twafwainwa kutwajijila nakufunda maana alumbuluka. Twakonsha kwiafunda byepi? Byonka byokyanembwa mu Bahebelu 5:12-14, mutumwa Paulo wakonkomwejile pabuneme bwakubula kutomatu “mukaka.” Twafwainwa kuja kajo kakosa kakumupashi, nabiji kotubena kufunda mu Ukusesema kwa kwa Esaya, Mulufunjisho Lwabuku Pakipwilo. Kabiji twafwainwa kwingijisha byotubena kufunda mubwikalo bwetu. Umvwe ketube byobyo, tushiinwa pamambo abukine bwamafunde nemizhilo ya Yehoba. Kino kitufunjisha kwikala namaana akuyuka kyawama nekyatama.
8 Kyatamakotu kekyakuba’mba bamo bakoka kumupashi. Mamboka? Kechi bata muchima kubintu byawama nebyaoloka kumeso a Yehoba ne. Kyafumamo, bateleka kumawaileshi nekutamba mapologalamu pa televizhonyi amwesha bintu byakanyiwa mu Binembelo, kuteleka kunyimbo yatama nangwa bintu bikwabotu byatama. Umvwe satwingila namaana, tukachinuzhuka kusambula byubilo byatama, byuba bantu bakosama kabiji babi.—Mana. 13:20; Nga. 5:7; 1 Timo. 6:20, 21.
9 Banyike Bafwainwa ‘Kwikala Balukeke ku Bubi’: Jino jashi jajinga nambaji ibiji yashinkamene pakukosesha banyike kwikala namaana alumbuluka. Bañambi baambile kuba’mba ‘kwikala ‘balukeke ku bubi’ kulumbulula kwikala babilubi, kokuba’mba kwikala nobe balukeke kubintu byonse byabipa kumeso a Yehoba. (1 Ko. 14:20) Atweba bonse betukoseshe kumona bulongo byotwingijisha kimye kyetu kuchina’mba twaketumpa mubyubilo byatama. (Efi. 5:15-17) Betukoseshe kubala kimye kyotwingijisha mukutanga bintu bibula kwitukwasha kukoma mukumvwa bintu byakumupashi. Mwauba byobyonyi? Nanchi mwatana’mbaka? Kununga pakutanga Baibolo juba nejuba, twajijilai nakutanga nemabuku etupa jibumba. Kino kikakwasha bonse, nebanyike pamo, ‘kwikala namilangwe.’—Mana. 4:7-9.
10 “Mwenenimo mu Kubomfya Ifishinte fya mu Baibolo mu Kuba no Kumfwikisha”: Uno yewajinga mutwe wajashi japeleleko pakupwila kwiikajila kwajuba jimo. Ñambi mwenyi walumbulwile’mba Yehoba ye Nsulo yamaana apana bumi, akila maana abantu bonse. Akikilangulukaipotu kwikala najishuko jakufunda maana a Yehoba! Wiapana kuboba beakeba mubukishinka nekwialomba mulwitabilo. (Mana. 2:3-5, 9; 28:5) Nanchi mubena kwingijisha bulongo kino kyoetupanyi?
11 Twakoseshiwe kufunda kuyuka mafunde pakutanga Baibolo. (2 Timo. 3:16, 17) Afundai bulongo pakuba’mba mumvwishe bulongo Yehoba byoabena kwamba. Ikalai nakimye kyakulanguluka-languluka paano mafunde nekwialama mumilangwe nemichima yenu. Kino kikemulengela kwikala namaana akuba bintu bulongo pakufuukula byomukeba kuba mubwikalo bwenu. (Yosh. 1:8) Twayai tumonepo byubilo byuba bamo nekumona mafunde amu Baibolo byoakonsha kwitukwasha kwingila bulongo.
12 ‘Nanchi nafwainwa kuvwalanga musango umo wamvwajilo nemwekelonyi?’ Mvwajilo nemwekelo yatama iji muino ntanda imwesha mupashi wabunsatuki. Mupashi wayewo mutundu ulengela bantu kuvwala byabula kufwainwa nebya busaji nangwa bibindankanya muchima. Ñanyi mafunde amu Baibolo akonsha kwitukwasha kushinda mvwajilo yauno mutundu? Umvwe tuji namaana tukalangulukanga pajifunde jamu 1 Timoti 2:9, 10, kuvwala “na butekanye ... , byafwainwa [bantu] betela’mba, twi ba kunemeka Lesa.” Mafunde akwabo otwakonsha kwingijisha keoa atongolwa mu 2 Kolinda 6:3 ne Kolose 3:18, 20.
13 ‘Nanchi nakonsha kuba byepi pakuba’mba kisemi kyami kikale kyakwatankana?’ Kwisamba bulongo mukisemi kyanema bingi. Yakoba 1:19 itubula’mba: “Bantu bonse bapelawizhe kumvwa, babande kwamba, babande kuba bukaji.” Bamukisemi bafwainwa kuteleka kubibena kwamba bakwabo nekwisamba bene nabene, mambo misambo mukisemi lolumvwañano. Nangwatu kyakuba kyotubena kwamba kyakine, umvwe twikyamba mubukaji, mukwilundumika nangwa mumisula, kyakonsha kukozha mukwenu kumuchima mukifulo kyakumusekesha. Onkao mambo, umvwe twibalume, bakazhi, bansemi nangwa baana, ñambilo yetu yafwainwa ‘kwikala na bupe moba onse, yalungwa na mukele.’—Kolo. 4:6.
14 ‘Nanchi natemwisha bintu byakumubijinyi?’ Kutemwisha bintu byakumubiji kelukatazho lwantanda yonse lukobankanya bwikalo bwamuntu. Kechi kukwasha muntu kwikala nalusekelo lwakine kinene. (Sapwi. 5:10; Luka 12:15; 1 Timo. 6:9, 10) Pakwitukwasha kuchinuzhuka kuponena mulweseko lwakutemwisha bintu byakumubiji, Yesu wafunjishe jino jifunde jikatampe’mba: Ikalai najiso jijitu. Bwikalo bwapela, kwakubula kwikala nabintu byavujisha bwavwangamo kuta muchima kubintu bya Bufumu, nekubika bintu bikwabo pakifulo kyabubiji.—Mat. 6:22, 23, 33.
15 Mulanguluko Wetu Byoafwainwa Kwikala: Byambo bya Lesa yonsulo yamafunde akine kine aoloka akwitukwasha kufuukula kuba bintu bulongo. Twafwainwa kufunda ano mafunde, kwialanguluka-langulukapo nekumvwisha byakwiengijisha mubwikalo bwetu. Onkao mambo, mu ‘kufunda maana alumbuluka a kupima ne kuyuka byawama ne byatama,’ tukamwenamo mfweto kabiji tukanemekanga Yehoba.—Hebe. 5:14.