Mapesho Afuma Mukusanchila Butemwe bwa Yehoba—Lubaji 2
1 Ñondo wapwa muuno mutwe, twisambile pamashinda ana motwakonsha kumweshesha lusanchilo mumwingilo pabutemwe bwitutemwa Yehoba. (1 Yoa. 4:9-11) Pano twanungapo mashinda akwabo atanu akubilamo byobyo. Etuletela bingi lusekelo kimye kyotwingila nangovu kukwasha bakwetu kumupashi.
2 Busapwishi Bwakushukilwa: Jino kejishinda jimo jawama bingi jakutainamo bantu baji nanzala nekilaka kyabololoke nekwibatambika mabuku akonsha kwibakwasha. Kyawama bingi ‘kupulushako bimye’ nekusapwila pabimye byonse neyense yetwatana. (Efi. 5:16) Twafwainwa kuchinchika pakuba’mba tusapwile busapwishi bwauno mutundu. Onkao mambo, umvwe satusanchila butemwe bwitutemwa Lesa nebikeba bantu, tukasapwilanga kimye kyonse kyotwashukilwa kuba byobyo.—2 Timo. 1:7, 8.
3 Mishonale umo wafwetelwe bingi pakutatula mwisambo namuntu mukwabo mobaikejile mumotoka palwendo. Uno muntu wamwesheshe lusekelo lwakukeba kufunda. Wamufwakashijile nekutatula lufunjisho lwa Baibolo. Awe mwanamulume waishile mubukine kabiji wailenga bingi palutwe nekwikala kemukulumpe mukipwilo!
4 Kunemba Makalata: Kimye kimo tukankalwa kuya kunzubo nenzubo mambo akukolwa-kolwa. Twafwainwa kunemba makalata, kusapwila busapwishi bucheche munkalata kubantu botwayuka, aba bafwisha batemwe babo, nangwa boba botwabujile kutana panzubo munyaunda yetu. Munkalata twakonsha kubikamo netalakiti yotwamona kuba’mba yafwainwa pakyokyo kimye iji nabyambo byamu Baibolo byakonsha kusangajika nekutundaika yetwatumina kwitunembela umvwe waikala namepuzho. Ingijishai keyala wenu nangwa wapa Nzubo ya Bufumu yakwimubwezhezhamo; kange mwingijishe yaofweshi wamusampine.
5 Busapwishi Bwapafoni: Jino kejishinda jawama bingi jakwambilamo nabantu botubula kumonañana nabo mumwingilo wetu wakunzubo nenzubo. Umvwe twijingijisha namaana, lusa, kujimuka nekuyuka mwakwambila, twakonsha kutanamo byawama. Mwingilo Wetu wa Bufumu wa February 2001, peja 4, mapalagalafu 5 ne 6 waamba pamapesho afuma mukuba kino.
6 Nyenga umo byoasapwijilenga pafoni, washikishe wamukazhi kana wakilangulukapo kala pabwikalo bwanji bwakulutwe nebwakisemi kyanji. Wamukazhi wakumbwile’mba ee. Waambile’mba namambo akupelelwa, wikalatu bunke bwanji panzubo. Namambo abutemwe bwakine kine bwamwesheshe nyenga, uno mwanamukazhi waitabile kumonañana nanji pakisankane kiji pepi. Kyafuminemo, uno mwanamukazhi waswile kufunda Baibolo!
7 Kutambwila Benyi: Umvwe twatemwa bakwetu, tukatala-talanga nekumona ñanyi mwenyi waiya kotupwila nekumutambwila bulongo amba ekale wakasuluka. (Loma 15:7) Mulengelai kumona kuba’mba uji pakachi kaboba baji nalusekelo lwakine kine mubumupashi bwanji. Butemwe bwetu bwakine kine nekukeba kumufunjisha Baibolo byakonsha kumukwasha kutambula bukwasho bwetu.
8 Byubilo Byetu Byawama: Byubilo byetu byawama biwamisha bukine. (Titu. 2:10) Umvwe bantu bakukyalo kebambe bintu byawama peatweba Bakamonyi bakwa Yehoba, baleta munema nelutakaiko kwi Lesa wetu. (1 Pe. 2:12) Kino nakyo kyakonsha kukwasha bakwetu kutatula kwenda mujishinda jabumi.
9 Mamboka omwabula kupitulukila muano mashinda atanu akumwesheshamo lusanchilo pabutemwe bukatampe bwitutemwa Yehoba nekutendeka kwiengijisha? (1 Yoa. 4:16) Mukuba bino, kashika mukamwenamo mapesho avula bingi.