Isambainga Nabantu!
1 Pakwingila mwingilo wetu wakusapwila nekulenga baana babwanga, twafwainwa kwisamba nabantu. (Mat. 24:14; 28:19, 20) Kwisamba kwakonsha kushupa nangwatu nabalunda netu. Pano kika kyakonsha kwitukwasha kwisamba mambo awama nabantu botwabula kuyuka?
2 Kwashai Mwina Nzubo Kwimumona’mba Mwibalunda: Esekai kwikala byonka biji bobo bomwatana mumwingilo. Namambo akuba ano moba ntanda yaswaswala, kine bamo bakonsha kuzhinauka, nangwatu kumvwa moyo pakumona bantu bobabula kuyuka. Kyakonsha kukatazha bingi pakuba’mba mwisambe. Mwakonsha kuba byepi kuba’mba aba bomwamonañana nabo kimye kitanshi babule kuba moyo? Satukyangye nekwambapo kyambo nangwa kimotune, jishinda jimo jakwisambilamo kemwekelo yetu yawama bulongo. Mvwajilo yetu yawama nemwekelo yamushingi ilengela boba botutana kubula kuba moyo.—1 Timo. 2:9, 10.
3 Jishinda jikwabo jakonsha kwitukwasha kwisambilamo nabantu kekwamba mumeso anteka. Kino kikwashako bantu botwatana kukasuluka nekukeba kuteleka. Kino kikebewa kunengezha bulongo. Umvwe twayuka byotusakuya nakwamba, kitulengela kwisamba mumeso anteka. Kabiji umvwe twatekanya, kilengela bantu kukeba kumvwa mambo etu awama. Mwanamukazhi umo kimye kyamufwakashijile Kamonyi umo waambile’mba: “Kyonkivuluka neluno palusekelo loammwesheshe kyajinga kutekanya. Nasangalele bingi.” Kino kyokyalengejile yewa mwanamukazhi kutambwila mambo awama.
4 Byubilo Byakonsha Kukebula Bantu Kwituteleka: Twafwainwa kutemwa bantu. (Fili. 2:4) Jishinda jimo jotwafwainwa kubilamo kino kekumona’mba kechi tubena kuba satulolobwelatune. Mambo muntu ubena kwisamba namukwabo uteleka. Umvwe twapana kimye kubanteleki betu kwamba byobakeba satuteleka kubyobabena kwamba, bakonsha kuyuka’mba nanchi mwibatemwa. Onkao mambo, umvwe banteleki benu kebambe, kechi mupelawizhetu ponkapo kwibachibikizha nabyambo byenu byomwaji kunengezhezha jimo kuba’mba byomusakwambane. Umvwe kyafwainwa batakaikai, mweseke nekwamba pabyonka byobabena kwamba. Umvwe kwamba kwabo kwanemenena pakintu kimo kyobakeba kuyuka, pimpulai ñambilo yenu mwisambe pakyonkakyo kintu kyobakeba.
5 Kutekanya nekwikala namuchima wipelula kulengela misambo kwenda bulongo. (Mana. 11:2; Byu. 20:19) Bantu baishilenga kwi Yesu mambo wajinga “kimote ne kukoka pa muchima.” (Mat. 11:29) Bantu kechi batemwa muntu wilundumikane. Kokuba’mba, nangwa kyakuba twayuka namba tuji nabukine, kechi twafwainwa kuminatu popolo amba kanatu kikyene.
6 Pano ibyepi umvwe muntu ubena kwamba bintu byapusana nabifunjisha Baibolo? Abya twafwainwa kumololakonyi? Ee mukupita kwakimye, bino kechi ponkapotu pakimye kitanshi kyotwamonañana nanjine. Javula kyawama kwamba pabintu byoayuka awo muntu yetubena kwisamba nanji saka tukyangye kutendeka kwisamba nanji pamafunjisho a Baibolo, akonsha kumukatazha kwiaswa. Kino kikebewa kutekanya nekuyuka mwakwambila. Paulo wajinga wakumwenako wawama mukino kimye asapwijilenga bamitonyi bamukochi yamu Aleopagusa.—Byu. 17:18, 22-31.
7 Kyakila pabyonse, kwikala na butemwe bwakine kuketukwasha kwikala bamisambo ikwasha bantu. Byonka byajinga Yesu, neatweba twafwainwa kubila lusa bantu ‘basubakana nekupelelwa, pamo no mikooko yakubula kafunga.’ (Mat. 9:36) Kino kitutundaika kwibasapwila mambo awama nekwibakwasha kwenda mujishinda jiya kubumi. Mambo etu kemambo abutemwe, onkao mambo twayai tutwajijile kwiamba kubantu mubutemwe. Umvwe ketube bino, tulonda Yehoba Lesa ne Yesu Kilishitu, abo bayukisha Byakwisamba kukila bilengwa byonse.