Kange Mubenga ‘Bintu Byatu’ Ne
1 Jishinda jimo ja kumvwañenamo lelo jino ke ja kwitumina makalata pa Intaneti. Nangwa kya kuba kijitu bulongo kubulako ba mu kisemi kyetu ne balunda netu bintu bitumwekejile nangwa milanguluko yetu, ‘bintu’ ka ‘byatu’ byakonsha kufuma mu kwingijisha Intaneti kutama?—Mana. 12:11.
2 Lujimuno pa bya Kwingijisha Intaneti: Bamo balanguluka’mba umvwe batambwila bintu byakatataka pa Intaneti ko kuba’mba babena kwendela pamo na jibumba ja Yehoba. Kino kyakonsha kuvwangamo byamwekele, bintu byubiwa pa Betele, masawakya a bya malwa nangwa lumanyiko, kabiji ne bintutu bikwabo bya bufyamfya byambiwa ku Sukulu wa Mwingilo wa Bufumu. Bakwabo nabo kampe na mambo a kwikala na muchima wa kanswatu, bakebesha bingi kwikala batanshi kubulako bakwabo pa mambo a bintu byakatataka.
3 Bimye bimo, bintu byo bamba bebitwalatu mungi nangwa kuvwangamotu ne bubela. Nangwa kampe na mambo a kukeba kusangajika nangwa kukumisha bakwabo, bamo bambila mu jishinda ja kulengela bakwabo kwibilangulukila mungi. Aba baji na muchima wa kupelawizha kwamba bintu bya uno mutundu, javula kechi bekala na bishinka byonse ne. (Mana. 29:20) Bantu bamo nangwa kya kuba mu jishimikila jo babena kubulako bakwabo muji bintu bya kukumisha, abo bebitwalatu mu kuseka. Masawakya a uno mutundu a bubela byo “bishimi byatu,” bibula kumwesha munema wa kine wa kunemeka Lesa.—1 Timo. 4:6, 7.
4 Umvwe mwatuma bintu bya bubela, anweba yenka mwibituma yenu mukekapilamo, umvwe bantu batwalwa mungi. Davida byo atambwijile mawi a bubela a kuba’mba baana banji bonse bafwa, ‘watabawile bivwalo byanji’ na mambo a kukatazhiwa kwa muchima. Pano bino, kishinka kyajinga kya kuba’mba mwananji umotu ye wafwile. Ee ibyo kuba’mba kino kintu kyamuletejile bingi bulanda, pano bino buno bubela bwanungilweko bwalengejile muchima kususubala. (2 Sam. 13:30-33) Onkao mambo, kechi twafwainwa kuba kintu kyakonsha kutwala mungi nangwa kulefula balongo betu ne.
5 Jishinda Lesa jo Engijisha: Vulukainga kuba’mba ‘kalume wa kishinka ne wa maana,’ jo jishinda Shetu wa mwiulu jo engijisha kwambilamo bintu. Uno “kalume” ye wapewa mutembo wa kuyuka bintu bya kubula bapopweshi ba Lesa, kabiji ne kuyuka ‘kimye kyafwainwa’ kubujilamo bonse. Kano kajo ka ku mupashi kanengezhiwa kupichila mu jibumba ja Lesa. Kimye kyonse twafwainwa kukinka manungo mu jishinda Lesa jo engijisha kwambilamo bintu byaketekelwa, kechi mu bantu batuma makalata pa Intaneti ne.—Mat. 24:45.
6 Makeyala a pa Intaneti: Tuji na Keyala wa pa Intaneti wa Bakamonyi ba kwa Yehoba wa: www.watchtower.org. Uno keyala momutuminwa mabulañano ku bantu bonse. Kechi kibena kukebewa muntu mwine bunke bwanji, kabungwe nangwa kipwilo kulenga keyala ungi wa pa Intaneti kwikala wa Bakamonyi ba kwa Yehoba ne. Bamo batuma byambo biji mu mabuku etu ne binembelo byonse bijimo ne byambo bya mu mabuku akwabo, kabiji batuma ne maautulaini a majashi a kupwila kwa nkambi kupichila mu kubula bobo bo batumina kupanako kangwee. Kikale mu kuba bino mwavwangiwa kuba busulu nangwa ne, kisela kya kunembulula ne kusampanya mabuku a Bakamonyi ba kwa Yehoba pa Intaneti, ke kuzhilulula mizhilo yaamba pa kunembulula mabuku kwa kubula kutambula lūsa ku bene benao. Nangwa kya kuba bamo bakonsha kulanguluka’mba kuba bino ke kukwasha balongo, kechi kyaswishiwa ne, kabiji bonse boba bino bafwainwa kwikileka.
7 Yukainga Bintu Bitayishatu Kimye: Atweba bonse twafwainwa kumonanga byo twingijisha kimye kyetu. Baibolo witukambizha’mba: ‘Tajijishai bulongo byo mwenda, kechi pamo na babula maana ne, kana pamo na ba maana; kasa mupulusha bimye, mambo ano moba atama.’ (Efi. 5:15, 16) Akilangulukai pa makatazho aji mu bya kulengalenga. Nangwa kya kuba kijitu bulongo kwingijisha makompyuta ne biñambañambatu bikwabo bingijisha malaichi, bino bintu byakonsha kwikala bitewa umvwe ketubule kutajijisha bulongo byo twingijisha kimye kyetu.—1 Ko. 7:29, 31.
8 Atweba bonse pa muntu pa muntu twafwainwa kwishikisha’mba: ‘Nanchi moba onse ngubatu monka natangila nangwa kukumbula makalata a pa Intaneti nyi? Nanchi natemwa kutumina bakwetu mafoni nangwa kwibanembela bintu bya kukaishakaishatu nyi? (1 Timo. 5:13) Nanchi ngubatu monka nachinaikila pa makeyala apa Intaneti kwa kubula ne kine kintu kyo mbena kukeba nangwa kuchinaika chinaika televizhonyi kukeba masiteshonyi angi nyi? Nanchi makayo a pa kompyuta atendeka kumbwezhezha panyuma lufunjisho lwami lwa pa bunke lwa Mambo a Lesa nyi?’ Bino bintu byakonsha konauna bumupashi bwetu.—Mana. 12:11.
9 Kulanguluka bulongo ne kwikala batekanya pa kwingijisha minkinyi ya kumvwañenamo kukalengela milangwe yetu kuyula na “bya bunonshi byapusana-pusana bya buneme ne byanengela.”—Mana. 24:4.