“Ingijilai Yehoba na Lusekelo”
1. Kika kyakonsha kuletela bakalume ba Yehoba lusekelo?
1 Mutumwa Paulo wanembele’mba: “Sekelai mwi Nkambo moba onse: kabiji nkamba jibiji namba, Sekelai.” (Fili. 4:4) Mwingilo wa kusapwila mambo awama ne kukwasha bantu ba bumukooko kutendeka kupopwela Yehoba, uleta bingi lusekelo. (Luka 10:17; Byu. 15:3; 1 Tesa. 2:19) Pano twakonsha kuba byepi umvwe twatana’mba bimye bimo kechi twikala na lusekelo mu mwingilo ne?
2. Kulabijila nsulo ya mwingilo wetu kwakonsha kwituletela byepi lusekelo?
2 Mwingilo ye Twapewa kwi Lesa: Vulukai’mba mwingilo wetu wa kusapwila wafuma kwi Yehoba. Kine twashukwa bingi kwikala “ba mu mwingilo umo ne Lesa” mu kusapwila mambo a Bufumu ne kulenga baana ba bwanga. (1 Ko. 3:9) Yesu Kilishitu witutangijila mu uno mwingilo ukabula kubwezhiwapo jibiji. (Mat. 28:18-20) Bamalaika nabo bengila bingi na ngovu kabiji twingila nabo pamo mu uno mwingilo mukatampe wa kunowa ku mupashi ubena kwingijiwa. (Byu. 8:26; Lum. 14:6) Binembelo pamo ne byakumwenako bya bantu ba Yehoba, bimwesha patokatu too amba Yehoba ubena kutangijila uno mwingilo. Onkao mambo, umvwe twaya na kusapwila “twambila mwi Kilishitu konka ku meso a Lesa.” (2 Ko. 2:17) Kino kileta bingi lusekelo.
3. Lulombelo lwitukwasha byepi kutwajijila kwikala na lusekelo mu mwingilo wa Lesa?
3 Lulombelo lwanema bingi mambo lwitukwasha kutwajijila kwikala na lusekelo mu mwingilo wa Lesa. (Nga. 5:22) Byo twingilatu mwingilo mu ngovu ya Lesa, twafwainwa kumulomba mupashi wanji ye apanatu wa bupe ku boba bamulomba. (Luka 11:13; 2 Ko. 4:1, 7; Efi. 6: 18-20) Kulomba pa mambo a mwingilo wetu, kuketukwasha kutwajijila kwikala na mulanguluko wawama umvwe bantu bakana kutambwila mambo awama. Kuketukwasha kutwajijila kusapwila na kuchinchika ne na lusekelo.—Byu. 4:29-31; 5:40-42; 13:50-52.
4. Kunengezha bulongo kwitukwasha byepi kunungulula lusekelo lwetu mu busapwishi, kabiji ñanyi mashinda o twakonsha kunengezha bulongo?
4 Nengezhai Bulongo: Jishinda jimo jafwainwa kwitukwasha kunungulwilamo lusekelo lwetu mu mwingilo wa busapwishi, ke kunengezha bulongo. (1 Pe. 3:15) Kuno kunengezha kechi kukebewa kimye kyabaya ne. Kutayatu maminiti acheche kupitulukamo mu byakwamba pa kutambika magazini akatataka nangwa kupituluka mu bya kutambika buku ye mubena kukeba kushajika. Byambo byafwainwa kwingijishiwa pa kwamba biji mu buku wa Ukupelulula nangwa mu Mwingilo Wetu wa Bufumu wa kunyuma. Basapwishi ba Bufumu bamo batana kuba’mba kibakwasha bingi umvwe banemba tubyambo tucheche pa kakipepala saka batalapo jimo jimo kimye kyo babena kulumbulula kuba’mba twibavululengamo bishinka. Kino kibakwasha kubula kuzakama kabiji kibakosesha kusapwila saka bachinchika.
5. Lusekelo lwituletela byepi mfweto atweba bene ne bakwetu?
5 Lusekelo lwituletela mfweto yavula bingi. Kwikala ba lusekelo kulengela byambo byo twamba mu mwingilo kwikala bya lumwengemwenge. Lusekelo lwitulengela kuchinchika. (Ne. 8:10; Hebe. 12:2, NW) Kyakila pa byonse, kwingila mwingilo wetu na lusekelo kuleta lukumo kwi Yehoba. Onkao mambo, twayai ‘twingijile Yehoba na lusekelo.’—Sala. 100:2.