Kupwila kwa Kijiiji Kubena Kwiya

Mu bino “bimye byakatazha,” tukeba maana a Lesa kuba’mba twitabilwe kwi aye. (2 Timo. 3:1) Kupwila kwa kijiiji kwa mwaka wa mwingilo wa 2005 kuketupa lujimuno lwawama bingi ne kwitutundaika, byo kukambanga pa kishina kyaamba’mba “Tangijilwainga na ‘Maana Afuma Mwiulu.’”—Yako. 3:17.

Jashi jitanshi ja kushilañana jaamba’mba “Kumweshanga ‘Maana Afuma Mwiulu’ mu Bwikalo Bwetu,” jiketukwasha kuyuka byo kilumbulula kwikala na byubilo byawama, mutende, kukoka muchima, ne kwikala bapela kusashilwa nangwa’mba kukokela. Apa bino mukulumpe wa kijiiji akambe pa mbaji ikwabo isatu ya maana afuma kwi Lesa. Mukulumpe wa nkambi ukapezhako juba jitanshi na kwamba pa bena Kilishitu ba mwingilo byo benengezha kwamba maana a Lesa nangwa kya kuba bebamona ku bantu bamo amba ‘kechi bafunda ne, bantutu.’—Byubilo 4:13.

Pa juba ja bubiji, jashi ja kushilañana jiji na mutwe waamba’mba, “Londalondainga Bintu Bikomeshañana” jiketukwasha kuyuka ne kuchinuzhuka bintu byakonsha kwitonauna ku mupashi. Kabiji jiketubula ne byo twakonsha kukosesha bakwetu pa kupwila kwa kipwilo, mu mwingilo wa mu bujimi, ne mu kisemi. Jashi ja mvula bantu jiji na mutwe waamba’mba, “Maana a Lesa byo Etukwasha,” jikabaisha lusanchilo lwetu lwa mfweto yo tumwenamo mu kwingijisha mafunde a Lesa mu bwikalo bwetu. Jashi ja kapelampako jiji na mutwe waamba’mba, “Kulondela Maana a Lesa Kwituzhikijila,” jikakosesha mulanguluko wetu wa kwalukila kwi Yehoba kuba’mba etupe maana mu ano moba a kupelako.

Kintu kikatampe kyubiwa pa kupwila konse ke lubatizhilo lwa baana ba bwanga bakatataka. Sukulu ya Mwingilo wa Teokalasi ne Lufunjisho lwa Kyamba kya Usopa kya mulungu nabyo bikambiwapo. Yehoba ukeba atweba bonse kumwenamo mu maana o apana. Tukafunjishiwa bingi ku mupashi na lujimuno ne lutundaiko lubena kwitupembelela pa kupwila kwetu kwa kijiiji.—Mana. 3:13-18.