Teshaiko Muchima!
1 Yesu wayukile’mba kimye kyo ajinga nakyo panopantanda kya kwingijilamo mwingilo wa Shanji kyakepele. (Yoa. 9:4) Onkao mambo, watesheko bingi muchima kwingila mwingilo wanji, kabiji wafunjishe ne baana banji ba bwanga nabo kwingila na kuteshako muchima. (Luka 4:42-44; 8:1; 10:2-4) Bintu bya ku mubiji byajinga bya kibiji kwi aye. (Mat. 8:20) Mu jino jishinda, wakonsheshe kupwisha mwingilo ye bamupele kwi Yehoba amba engile.—Yoa. 17:4.
2 Kimye Kyakepa: Kimye kya kusapwila mambo awama “panopantanda ponse” nakyo kyakepa bingi. (Mat. 24:14) Bungauzhi bwa mu Baibolo bumwesha’mba tubena kwikala mu kimye kyapelako. Katatakatu “babula kuyuka Lesa, ne abo babula kukokela mambo awama a Nkambo yetu Yesu ... bakamona lukabisho lwa lonaiko lwa myaka.” (2 Tesa. 1:6-9) Luno lukabisho lukekala lwa kubazhimukilatu. (Luka 21:34, 35; 1 Tesa. 5:2, 3) Bantu bafwainwa kuyuka’mba kimye kyo bajimo kyatama. Ke mwingilo wetu wa kwibakwasha kukeba lusa lwa Yehoba saka kukiji kimye.—Zefwa. 2:2, 3.
3 Kuba Byonse byo Twakonsha Kuba: Byo bayuka’mba “kimye bekikepesha kala,” bakalume ba Lesa batangizhako mwingilo wa kusapwila. (1 Ko. 7:29-31; Mat. 6:33) Bamo bekileka kukeba bunonshi bwa ku mubiji ne bintutu bikwabo pa kuba’mba bengile pabaya mu mwingilo. (Mako 10:29, 30) Bakwabo bakelwa “kwingijisha mwingilo wa Nkambo” nangwa kya kuba babena kupita mu makatazho. (1 Ko. 15:58) Bavula basapwila mambo awama ku bantu pa myaka yavula kwakubula kuleka ne. (Hebe. 10:23) Yehoba unemeka bingi bino byonse bitapisho bya kutundaika Bufumu.—Hebe. 6:10.
4 Kutesha michima yetu ku kupopwela Yehoba, mwavwangwa ne mwingilo wa kusapwila, kwitukwasha kuvulukanga juba ja Yehoba. Kwitulamawizha kuchina kulabikwa na ntanda ya kwa Satana kabiji kwitukosesha kwikala na byubilo byazhila. (2 Pe. 3:11-14) Ee kine, kuteshako muchina na kwingila mwingilo wetu kwakonsha kwitupulusha atwe bene ne boba betumvwa pamo.—1 Timo. 4:16.