Mubena Kukebewa Bingi Kuba’mba Mukwashañanenga
1 “Twimusanchila bingi pa bintu byonse byo mwitubila. Mingilo yenu kine itukwasha bingi.” Bino byambo byalumbulula bulongo lusanchilo lwetu lo tusanchila bakulumpe mu kipwilo ne bankwasho betu. Jibumba ja Lesa byo jibena kuya na kubayilako, balongo bafikapo babena kukebewa kwingila mu bipwilo pepi nobe 100,000 mwaya ntanda yonse. Umvwe mwi mulongo wabatizwa, mubena kukebewa bingi kuba’mba mukwashañanenga.
2 ‘Kukeba Mwingilo’: Mwakonsha kukeba byepi mingilo ikwabo ya ku mupashi? (1 Timo. 3:1) Kintu kyanema ke kupichila mu kwikala bakumwenako bawama mu mbaji yonse ya bwikalo bwenu. (1 Timo. 4:12; Titu. 2:6-8; 1 Pe. 5:3) Ingilainga pabaya mu mwingilo wa kusapwila, ne kukwasha bakwenu nabo kuba kintutu kimo. (2 Timo. 4:5) Kwashainga bakwenu ba mu lwitabilo. (Loma 12:13) Teshaiko muchima na kufunda Mambo a Lesa, ne kwikala “mwayila lufunjisho.” (Titu. 1:9; 1 Timo. 4:13) Teshaiko muchima kwingila na ngovu mingilo yo mwapewa ku bakulumpe mu kipwilo. (1 Timo. 3:10) Umvwe mwi mutwe wa kisemi, ‘lamainga bulongo ba mu nzubo yenu.’—1 Timo. 3:4, 5, 12.
3 Pa kuba’mba mutongolwe kwikala nkwasho nangwa mukulumpe mu kipwilo, kikebewa kwingila na ngovu ne kwikala na muchima wa kwipana. (1 Timo. 5:17) Onkao mambo, byo mubena kukanamina mingilo, tai muchima kwingijila bakwenu mu kwipelula. (Mat. 20:25-28; Yoa. 13:3-5, 12-17) Langulukai byajinga muchima wa kwa Timoti, ne kumulonda. (Fili. 2:20-22) Byonka byo ajinga, ne anweba lekai byubilo byenu byawama bimulengele kutelwa bulongo. (Byubilo 16:1, 2) Byo musa kwikalanga na byubilo bya ku mupashi bikebewa kuba’mba mwingile mingilo ikwabo ne kulondela lujimuno luji lonse lo bemujimunako bakwenu kuba’mba mununguluke, ‘kuya palutwe kwenu kukamweka ku bonse.’—1 Timo. 4:15.
4 Anweba Bansemi, Funjishai Baana Benu Kuba’mba Bakwashañanenga: Baana bakonsha kufunda bya kukwashañana kufumatu ku bulukeke. Bafunjishai bya kutelekesha pa kupwila, kusapwila, ne kwikala na byubilo byawama pa Nzubo ya Bufumu ne ku sukulu. Bafunjishai bya kwingijila bakwabo, nabiji kukwashañana mu kuwamisha Nzubo ya Bufumu, kukwasha bakikulumpe, ne bikwabotu. Balekai bomvwe lusekelo luji mu kupana. (Byubilo 20:35) Lufunjisho lwa uno mutundu lwakonsha kwibalengela kwikala bapainiya, bankwasho nangwa bakulumpe mu kipwilo kulutwe na lwendo.