Totai Yehoba mu Kipwilo Kikatampe

1, 2. Kupwila kwa nkambi kwitupa jishuko ja mutundu ka, kabiji mu ñanyi mashinda mo twakonsha kubila kino?

¹ Pa mwaka pa mwaka kupwila kwetu kwa nkambi kwitupa kimye kyawama bingi kya kutumbijikilamo Yehoba. Ndangulukilo yetu iji nobe yoya ya kwa Davida, waambile’mba: “Amiwa nkemusanchila mu kipwilo kikatampe: Nkemutota mu bantu bavujisha.” (Sala. 35:18) Pa Kupwila kwa Nkambi kwa “Kukokela Lesa” kubena kwiya, twakonsha kumwesha byepi’mba twi bantu bakwatankana ba kutota Yehoba?

² Jishinda jimo jo twakonsha kubilamo kino ke kupichila mu byubilo byetu. Bena mpunzha bamo paikejile kupwila kwa nkambi baambile’mba: “Na mambo a kupwila kwenu kwa nkambi ko mwikala nako, tubula mabumba akwabo a bupopweshi akeba kusonkela ino mpunzha kwiya na kumona Bakamonyi ba kwa Yehoba byo bapwila, mambo baji na lunengezho lwalumbuluka.” Kupichila mu mwekanyikilo yetu, kukwatankana, ne mu byubilo byetu, atweba bonse pa muntu pa muntu tulengela lutakaiko lwa uno mutundu lwafwainwatu kuya kwi Lesa wetu kubayilako.—1 Pe. 2:12.

3, 4. Nga kwipelula kuketukwasha byepi kuvwala mvwajilo yafwainwa ba mwingilo wa bwina Kilishitu, kimye kyo tubena kupwila ne panyuma ya bipungu?

³ Mwekanyikilo Yetu: Kikebewa kwipelula pa kuba’mba tuvwale ne kumwekana mu jishinda jileta lutotelo kwi Yehoba. (1 Timo. 2:9) Buku wa Isukulu lya Butumikishi pa peja 132, waamba’mba: “Muntu wipelula kechi uba bintu bya kutuntwisha bakwabo ne, kabiji kechi ukeba’mba bakwabo ba mumonenga ne.” Mu byalo byavula bya kuvwala byabula kufwainwa bibavulemo bingi. Nangwa byonkabyo, Yehoba usanta bingi pa kwibikako ko tuba kwa kumwimenako bulongo. (Byubilo 15:14) Pa mpunzha iji yonse paikela kupwila kwa nkambi, ayo mpunzha ikala ke “kipwilo kikatampe” pa moba onse asatu a kupwila kwa nkambi. Onkao mambo, byo tupwila kwi Yehoba, twafwainwa kuvwala mvwajilo ileta munema ku muntu Wakila mu kulengwa konse.—1 Moba. 29:11.

⁴ Kabiji twafwainwa kuteshako muchima ku mwekanyikilo yetu panyuma ya kipungu kya kupelako pa juba ne juba. Nangwa kya kuba twakonsha kukeba kuvwala bivwalo byo twatemwa kimye kya kukokoloka nangwa kimye kyo twaya na kuja kajo mu lesitilanti, kyanema bingi kumona’mba mvwajilo ne mwekanyikilo yetu ibena kumwesha’mba “twi ba kunemeka Lesa.” (1 Timo. 2:10) Mvwajilo yawama kechi iyukanyikilwa ku bivwala bantu bavula mu ntanda ne. (1 Yoa. 2:16, 17) Mabuku etu a bwina Kilishitu aji na bya kumwenako byawama bingi bya banabalume ne banabakazhi bavwala mvwajilo ya mushingi pa bimye byapusana pusana. Kuvwala mabaaji etu kimye kya kupwila kuketukwasha kuvulukanga’mba twi ba mwingilo wa bwina Kilishitu pa bimye byonse.—2 Ko. 6:3, 4.

5, 6. Twakonsha kumwesha byepi mushingi ku tebulu wa Yehoba wa ku mupashi?

⁵ Nemekai Tebulu wa Yehoba: Nkambo Mfumu wa kulengwa konse witwanshikila kijiilo. (Isa. 25:6; 1 Ko. 10:21) Umvwe tunemekesha kifulo kyetu ku tebulu wa Yehoba wa ku mupashi, kikonkwanyi kyetu kikekala kya kutanwako moba onse asatu a kupwila kwa nkambi. Nanchi mwanengezhezha jimo kwa kukafikila, ñendelo, ne kulombako moba ku nkito nyi? Nanchi mwanengezha kimye kya kwinengezhelamo ne kya kwendelamo kuba’mba mukafike bukiji pa kupwila ne kutana pa kwikala, kwisambako na balongo benu, kabiji ne kukwatankena nabo pamo kumutota Yehoba mu lwimbo wa kushinkwila ne lulombelo nyi?—Sala. 147:1.

⁶ Kunemeka tebulu wa Yehoba kuketulengela kutesha muchima ku pologalamu ne kubula kwambatu kyambeambe na bakwetu, kuja, nangwa kwendauka. Kupichila mu jibumba ja kalume wa kishinka ne wa maana, Yehoba ubena kwitunengezhezha kajo ka ku mupashi ko tukeba pa kino kimye. (Mat. 24:45) Kafwako nangwa umo wa mwi atweba ukeba kupuswako ne. Bansemi bafwainwa kwikala na baana babo kabiji ne kwibakwasha kumwenamo pakatampe.—Mpitu. 31:12.

7. Betulomba kuba ka pa kimye kya pachaile, kabiji mambo ka?

⁷ Betulomba kuba’mba tukasendele jimo kajo ka kuja pachaile kukila kufuma pa mpunzha ya kupwila ne kuya na kukeba kajo kungi. Pa kupwila kwajingako mwaka wapwa kyawamine bingi pa kumona’mba bavula balondejile uno mukambizho. Kabiji byo kikawamapo inge kya kuba bonse bauba byonkabyo ne uno mwaka! (Hebe. 13:17) Luno lunengezho lupana kimye kyawama bingi kya kupwanañena pamo na balongo betu kabiji ne kubayishako buumo ne mutende uletela Yehoba munema.—Sala. 133:1.

8, 9. Kupwila kwa nkambi kwitupa ñanyi mashuko akwabo a kutotelamo Yehoba?

⁸ Kusapwila Busapwishi bwa Kushukilwa: Kimye kyo tubena kuya ne kufuma ku kupwila kwa nkambi, twikala na mashuko avula bingi a kutota Yehoba na byatunwa byetu. (Hebe. 13:15) Kikale tubena kuja kajo mu lesitilanti nangwa tubena kwisamba na wa mwingilo mu hotela, twayai tumonepo mashinda mwa kusapwila. Milanguluko ne michima yetu ikayula na bya buneme bya ku mupashi bikafuma pa kupwila. Twayai tubuleko bakwetu bo tutana kya kubazhimukila bino bintu byawama.—1 Pe. 3:15.

⁹ Tubena kupembela na lusekelo jino jishuko ja kutotelamo Yehoba “monka mu bipwilo.” (Sala. 26:12) Twayai atweba bonse pamo tukatote Yehoba pa Kupwila kwa Nkambi kwa “Kukokela Lesa.”

[Kitenguluzha pa peja 5]

Bya Kuvululako bya Kupwila kwa Nkambi

◼ Bimye Bikatendekelangamo Pologalamu: Pa moba onse asatu, pologalamu ukatendekanga na kimye kya 8:45. Sa kwakishala maminiti acheche kipungu saka kikyangye kutendeka, cheyamani ukekela jimo pa pulatifomu aku nyimbo ya Bufumu ya kutendekelapo saka imbiwa. Atweba bonse twafwainwa kwikela jimo pa kikye kimye kuba’mba kupwila kukatatule na mushingi. Pa juba jitanshi ne ja bubiji, pologalamu ukapwanga pa 16:05 kabiji pa juba ja busatu ukapwa pa 15:30.

◼ Kusunga pa Kwikala: Mwakonsha kusungilatu bantu pa kwikala bo mwayiya nabo mu motoka umo nangwa bo mwikala nabo nzubo imo.

◼ Bupe: Pataiwa mali avula bingi pa kuba’mba kupwila kwa nkambi kunengezhiwe. Twakonsha kumwesha lusanchilo lwetu kupichila mu kupana bupe bwa kwitemenwa bwa mwingilo wa ntanda yonse pa Nzubo yetu ya Bufumu nangwa pa kupwila kwa nkambi. Cheki iji yonse yapanwa pa kupwila kwa nkambi yafwainwa kupanwa ku “Watch Tower.”

◼ Kajo ka Pachaile: Mwane mukasendele jimo kajo ka pachaile kukila kusha mpunzha po mwapwila ne kuya na kukeba kajo kungi. Mwakonsha kwingijisha kipe kyaesakana kya kusendelamo kajo kyo mwakonsha kubika munshi ya kipona kyenu. Kechi kyaswishiwa kusendela kajo mu bipe bikatampe, bipe bibena kumwesha biji mukachi, ne kusenda maalwa ku kupwila ne.

◼ Kulekoda: Bijimba kechi byafwainwa kusomekwa ku biñambañamba bya kwambilamo bya pa kupwila ne, byafwainwa kwingijishiwatu mu jishinda ja kubula kulabika bakwenu.

◼ Kukopa Bipikichala: Umvwe mubena kukopa bipikichala kimye kya bipungu, kwingijisha kamela ibyasha ne.

◼ Mapeja ne Maselula Foni: Mwafwainwa kwibichuna kuba’mba bibulenga kulubankanya bakwenu.

◼ Mapuso ne Bintu Bikwabo bya Kubazhimukila: Umvwe muntu wakolelwa pa kupwila kwa nkambi, mwane monañanai na asha uji pepi usakuya bukiji bukiji ku Dipatimenti ya Bukwasho bwa Bukiji Bukiji kuba’mba wamwingilo ujiko amone kubaya kwa kyokyo kikola ne kupana bukwasho.

◼ Yukai’mba: Pa kupitapo ñondo umo nangwa babiji panyuma ya Kupwila kwa Nkambi kwa “Kukokela Lesa,” ingijishaipo maminiti 15 kufika ku 20 pa Kupwila kwa Mwingilo (mwakonsha kwingijisha kimye kiji pa lubaji lwa bibena kukebewa pa kipwilo) kupituluka mu bishinka bya kupwila kwa nkambi byo batana basapwishi kuba’mba bibena kwibakwasha bingi mu mwingilo wa mu bujimi. Luno lubaji lwiikajila lwa Kupwila kwa Mwingilo luketupa jishuko ja kulumbulwilamo byo tubena kwingijisha bintu byo twafunjile pa kupwila kwa nkambi kabiji ne byo bitukwasha kulengela mwingilo wetu kwingijiwa bulongo.