Lushimuno lwa Kubula Byambo
1 Bilengwa bya Yehoba bishimuna byavula bingi kwa kubula byambo pa mambo a byubilo byanji bibula kumweka. (Sala. 19:1-3; Loma 1:20) Mu jishinda jimotu, byubilo byetu byawama, byubilo bya bwina Kilishitu, kabiji ne mwekelo yetu yawama, bishimuna kwa kubula byambo. (1 Pe. 2:12; 3:1-4) Atweba bonse pa muntu pa muntu twafwainwa kwikala ‘ba kulengela lufunjisho lwa Lesa, Mupulushi wetu, kumwekana bulongo mu bintu byonse’ kupichila mu byubilo byo tumwesha.—Titu. 2:10.
2 Kyakonsheka byepi ku bantu bambulwakoloka kuwamisha mafunjisho a Baibolo? Kino kyakonshekatu kupichila mu lutangijilo lwa Mambo a Lesa ne bulume bwa mupashi wanji wazhila. (Sala. 119:105; 143:10) Mambo a Lesa o “omi , ne kwingila engila, kabiji atwisha kukila mapoko onse atwa kubiji.” (Hebe. 4:12) Atwela mukachi ka michima yetu ne kwitulengela kuvwala bumuntu bupya. (Kolo. 3:9, 10) Mupashi wazhila witulengela kwikala na bipangwa byawama bingi, nabiji lusa, buwame, bukimote, ne kwikanya. (Nga. 5:22, 23) Abya atweba bonse pa muntu pa muntu tubena kuswisha mupashi ne Mambo a Lesa kwingila mu bwikalo bwetu nyi?—Efi. 4:30; 1 Tesa. 2:13.
3 Bantu Bamona: Inge ke tulondela mizhilo ya Yehoba ne kwibikako kumwesha bipangwa byanji, bantu betumona. Akimonai kya kumwenako, kya mwanamulume umo ye basekanga ku bakwabo mo baingijilanga na mambo a kwipipa. Nyenga mo baingijilanga mu ofweshi umo aye wamunemekanga ne kumupa mushingi. Akino kyalengejile uno mwanamulume kushikisha nyenga kyamulengejile kupusanako na bakwabo bonse. Wamulumbulwijile amba kya mulengejile kwikala na mushingi ke na mambo a kulondela mafunde a mu Baibolo mu bwikalo bwanji. Kabiji wa mubujileko ne luketekelo lwawama lwa Bufumu. Uno mwanamulume watendekele kufunda Baibolo kabiji mukuya kwa kimye wanungulukile kya kuba wabatizwa ne kubatizwa. Byo abwelele kwabo, balongo banji basangalele bingi pa kumona byubilo byanji byawama kabiji kino kyalengejile bavula kutambwila bukine.
4 Kikale tuji ku nkito, ku sukulu, nangwa kimye kyo tuji na balongo nangwa na bakwetu, twakonsha kulengela bantu bavula kutumbijika Lesa na mambo a byubilo byetu byawama ne busapwishi bwetu.—Mat. 5:16.