Ambainga Mambo a Lukumo lwa Yehoba
1 Nyimbi wa masalamo waambile’mba: ‘Imbai kwi Yehoba, anweba bantu ba mu ntanda yonse. . . . Ambishai mu mikoka ya bantu mambo a lukumo lwanji, ne mu mitundu yonse mambo a mingilo yanji ya kukumya.’ Kimye kyo tulanguluka pa bintu byauba Yehoba, byo abena kuba, kabiji ne bintu byo aketubila, tutundaikwa kwamba mambo a lukumo lwanji!—Sala. 96:1, 3.
2 Mu Mwingilo Wetu: Bakamonyi ba kwa Yehoba baji na jishuko ja kwamba pa jizhina ja Lesa kabiji ne kwijitumbijika mu ntanda yonse. (Mala. 1:11) Byo kyapusanapo na bantangi ba Kilishitendomu, bafumyamo jizhina ja Lesa mu ma Baibolo abo! Mwingilo wa kuyukanyikisha jizhina ja Lesa ubena kukebewa kwingijiwa bukiji bukiji, mambo bantu bafwainwa kwita pa jizhina janji mu bukishinka pa kuba’mba bakapuluke malwa akatampe abena kwiya. (Loma 10:13-15) Nangwa byonkabyo, pa kuba’mba bantu bonse panopantanda bekale mutende, bafwainwa patanshi kuzhijika jizhina ja Lesa. Ee kine, mingilo yonse ya Lesa yayila monka mwayila jizhina janji.
3 “Yehoba ye mukatampe, ye wa kutotwa bingi.” Bino pa kuba’mba bantu ‘bapane kwi Yehoba lukumo lwafwainwa jizhina janji,’ bafwainwa kumuyukisha bulongo. (Sala. 96:4, 8) Nangwa byonkabyo, bamo bakana amba Lesa kafwako. (Sala. 14:1) Bakwabo bamba’mba ufwabo bulume, nangwa amba kechi uta muchima ku bwikalo bwa bantu ne. Kimye kyo tukwasha bantu bakishinka kuyuka maana alumbuluka pe Mulenga wetu, nkebelo yanji, ne byubilo byanji byawama, tupana lukumo kwi Yehoba.
4 Byubilo Byetu: Kwikela mwayila mizhilo ya Yehoba yaoloka kumwesha’mba tumunemeka. Byubilo byetu byawama kechi bilubwanyika ne. (1 Pe. 2:12) Kya kumwenako, butooto ne mwekelo yetu yawama byakonsha kulengela bantu kwamba bintu byawama pe atweba, kino kitupa jishuko ja kwamba pa byo kyawamina kwikela mwayila mafunde atanwa mu Mambo a Lesa. (1 Timo. 2: 9, 10) Byo kituwaminapo umvwe bantu ‘bamona mingilo yetu yawama, ne kumutumbijika shetu uji mwiulu’!—Mat. 5:16.
5 Kupichila mu byo twamba ne byo tuba, twayai tutumbijikenga Lesa wetu pa juba pa juba, ne kutambulwila lwito lwawama lwa kuba’mba: “Imbai kwi Yehoba, takaikai jizhina janji. Sapwilai mambo a lupulukilo lwanji pa juba, pa juba.”—Sala. 96:2.