Mwingilo Wetu—Ke Mwingilo Umwesha Kifyele
1 Yesu wamwene’mba bantu bavula batelekelenga ku mambo anji, ‘basubakene ne kupelelwa pamo nobe mikooko ya kubula kafunga.’ (Mat. 9:36) Na lusa ne na butemwe, wibafunjishe mafunde a Yehoba, kwibatekenesha, kabiji ne kwibanengezhezha bintu mu kifyele byo bakajilwenga bya ku mupashi. Kimye kyo tulanguluka pa mashinda anji, tufunda kulanguluka ne kwiumvwa byonka byajinga Yesu. Kabiji ne kyubilo kyanji kya kifyele kimweka kimye kyo twingila mu mwingilo wetu.
2 Akitulumanaiko pacheche ne kulanguluka Yesu byo aubilepo pa bantu basubakene bamusolomokele amba ebakwashe. (Luka 5:12, 13; 8:43-48) Walangulukilangako aba bajinga mu kukajilwa kukatampe. (Mako 7:31-35) Wayukile biumvwanga bantu kabiji ne kumwesha kwibata muchima. Kechi wakwashanga bantu kupichila mu kutala ku bilungi ne. (Luka 7:36-40) Ee kine, Yesu mu bololoke wamwesheshe kifyele kya kine kya Lesa wetu.
3 “Wibobile Lusa”: Yesu kechi waingilanga mwingilo wanji na mambo a kuba’mba ye wajinga mutembo wanji ne. Ke na mambotu a kuba’mba ‘wibomvwijile bantu lusa.’ (Mako 6:34) Mu jishinda jimotu, ne lelo jino kechi tusapwilatu mambo ne, bino tukeba kupulusha bumi bwa bantu bwanema. Langulukaingapo ene mambo bantu kyo bakumbwila mu jojo jishinda. Mambo ka o basusuchila nangwa kutabankena? Nanchi bebalekelela nangwa kuluwikwa ku bantangi babupopweshi bwa bubela nyi? Kuta muchima kwetu kwa kine bantu kwakonsha kwibalengela kuteleka ku mambo awama.—2 Ko. 6:4, 6.
4 Kifyele kitekenesha bingi muchima. Kya kumwenako: Wamukazhi umo wajinga mu lukatazho lukatampe bingi lwa kufwisha mwananji wamukazhi wa bañondo basatu. Kimye Bakamonyi babiji kyo bakonkonsheshe ku kinzhilo, wibambijile kutwela mu nzubo na mulanguluko wa kukana byonse byo bamwambijilenga pa ene mambo Lesa o aswishisha bantu kuyanda. Nangwa byonkabyo, palutwe kacheche uno mwanamukazhi waambile’mba: “Batelekelenga bingi na kifyele kikatampe, kabiji kimye kyo bayilenga, naumvwine bingi bulongo, onkao mambo naswile kuba’mba bakeye ne jikwabo.” Nanchi mwibikako kumwesha kifyele ku muntu uji yense ye mutana mu mwingilo nyi?
5 Kwikala na kifyele kuketukwasha kutekenesha bantu kya kine kine. Kuba bino kwitulengela kupa lukumo “Shanja bya lusa,” aye Yehoba.—2 Ko. 1:3.