Bamwesha kya Kumwenako kya Bukishinka

¹ Mwingilo mukwabo wa kimye kyonse watendekele mu 1937, wajinga wa bupainiya bwiikajila. Banabalume ne banabakazhi bayuka bulongo bya kwingila mingilo ya bwina Kilishitu, bepaine na muchima yense kuya na kwingijila kuji konse kwibatumine jibumba. Pa myaka yavula yapitapo, bapainiya beikajila batwajijila kumwesha kya kumwenako kya bukishinka kyo twafwainwa kulondela.—Hebe. 6:12.

² Batangijilenga: Ku ntatwilotu ya mwingilo wabo, bapainiya beikajila batwajilenga mwingilo wa kusapwila palutwe kupichila mu kwingijisha bijimba bya malekodi ku bena mazubo. Kabiji baingijishenga ne maselechi o balekondelapo byambo bya mu Baibolo kwikala pa kwisambila mwisambo wa mu Baibolo kimye kya kubwelako ku bena mazubo. Kino kyaubiwanga mu mizhi ikatampe amo mwajinga kala ne bipwilo. Mu kuya kwa moba, bapainiya beikajila bebatuminenga ku mapunzha kwajinga kukajilwa kukatampe kwa basapwishi ba Bufumu. Batwajijile kubwelako ku bantu bonse bamwesheshenga lusekelo ku mambo a Bufumu kabiji ne kutendeka kufunjisha mafunjisho a Baibolo. Na mambo a mukoyo wabo wa kwingila, bipwilo bya bukumo byavula byalengelwe. Kusapwila kwabo kwa na mukoyo ko kwalengela kukomenako bingi mu jibumba ko tubena kumona ano moba. (Isa. 60:22) Bapainiya beikajila batwajijila na kwingila mwingilo wanema wa kusampanya mambo awama ku “bilengwa byonse bya muno munshi.”—Kolo. 1:23.

³ Bafwainwa Kulondelwa: Bapainiya bamo beikajila baingila myaka yavula bingi mu mwingilo wa kimye kyonse. Pa myaka yapitapo, abano banabalume ne banabakazhi bakishinka bapita mu bintu byapusana pusana byawamisha lwitabilo lwabo. (1 Pe. 1:6, 7) Bepainenga kusankilapo kukeba bintu bya ku mubiji pa kubatu amba baye na kwingijila ku mapuzha kuji kukajilwa kwiikajila. Bamo kino kimye bakoma kabiji bendatu na kubelabela, nangwa kampe babena kutalañana na makatazho akwabo a mu bwikalo. (2 Ko. 4:16, 17) Bino, batwajijila ‘kupanga bipangwa mu bukote bwabo.’ (Sala. 92:14) Baketekelatu mwi Yehoba kabiji batambwila bibusa byanji.—Sala. 34:8; Mana. 10:22.

⁴ Bapainiya beikajila kine twafwainwa kwibasanchilanga na muchima yense. Umvwe muji na jishuko ja kwikala na bapainiya beikajila mu kipwilo kyenu, monaipo kimye kya kwisamba nabo pa kuba’mba mumwenemo mu bintu byo bapitamo. Basanchilai pa mwingilo wabo wa kusapwila mu bukishinka. Koseshiwai na mambo a kya kumwenako kyabo kya kwikala bashikimana. Aba bonse balondela lwitabilo lwabo bakonsha nabo kumona mapesho a Yehoba ne bibusa byanji mambo “aba boba bya kishinka bo banji bo amwenamo lusekelo.”—Mana. 12:22.