Awake! Wiikajila ye Tukashanga mu September

¹ Pepi na muntu yense umvwa bingi bulongo bimba bañonyi kabiji ne bimweka juba umvwe ke jizhike. Nangwa byonkabyo, bantu bavula bakankalwa kuyuka’mba Shetu wa mwiulu wa butemwe ye walengele bino bintu. Tukekala na jishuko janema bingi ja kusapwila bintu byalenga Yehoba kupichila mu kusampanya Awake! wiikajila. (Isa. 40:28; 43:10) Awake! wa September waamba bingi pa mutwe wa kuba’mba “Nanchi Mulenga ko Aji Nyi?” (Is There a Creator?)

² Mu Nyaunda: Inge kyakonsheka, nengezhai kwingijila pamo na kipwilo mu busapwishi bwa ku nzubo ne nzubo pa Bibelushi byonse. Nangwa byonkabyo, mwakonsha ne kushila bantu ino magazini iikajila pa bimye bikwabo mukachi ka mulungu. Bafunjishi ne bantutu bakwabo bengila mingilo ya bufunjishi bakonsha kumutemwa bingi uno Awake! Onkao mambo, mwakonsha kunengezha lunengezho lwiikajila lwa kuya na kumona bano bantu baji mu nyaunda yenu.

³ Umvwe bamwesha lusekelo, bashilai bwipuzho bo mukakumbula kimye kyo mukabwelako jikwabo. Kya kumwenako, mwakonsha kwipuzha bwipuzho bwa mambo ene Mulenga wa butemwe o aswishisha buyanji. Apa bino, pa kimye kyo mu kabwelako, mwakonsha kumumwesha kitango 1 nangwa kitango 11 kiji mu buku wa Baibolo Ufunjisha. Nangwa mwakonsha kusalapo kwipuzha bwipuzho pa mambo a Mulenga byo akebelenga panopantanda kwikala, apa bino mwisamba kitango 3 umvwe mwabwelako.

⁴ Pa Sukulu: Umvwe mufunda sukulu, mambo ka a kubujila kupana uno Awake! wiikajila kwikala bupe ku bafunjishi benu ne bakwenu baana ba sukulu? Kubikatu ino kope pa desiki wenu kwakonsha kulengela bantu kwipuzha mepuzho avula pa bintu byo twaitabilamo. Mukakonsha kwikala na jishuko ja kwingijisha byambo bijimo inge ke muzhikijile lwitabilo lwenu mu misambo ikalako mu kalasi, kabiji ne kimye kyo mubena kunemba byambo pa mitwe imo. Pa kuba’mba kikemukwasheko, ino Awake! iji na kibese kya kuba’mba “Bakyanyike bepuzha amba” pa kibaba kiji na mutwe wa kuba’mba “Nakonsha Kulamawizha Byepi Lwitabilo Lwami mu Bilengwa?” (“How Can I Defend My Belief in Creation?”)

⁵ Yehoba wafwainwa kutambula munema ne lukumo na mambo a bintu byo alenga. (Lum. 4:11) Twakonsha kunemeka Mulenga wetu ne kukwasha bantu kuba kino kupichila mu kwikala na kizaku kya kusha Awake! wa September.