Ibikilai Kikonkwanyi kya Kufunjisha Lufunjisho lwa Baibolo
1 “Inunai meso enu, mumone majimi, byo atoka kala afwainwa kunowa.” (Yoa. 4:35) Abye byambo byaambile Yesu Kilishitu, bingila ne ku bamwingilo wa bwina Kilishitu lelo jino.
2 Bantu ba michima yakishinka bakeba kufunjishiwa mashinda a Yehoba ne luno bakitanwa. Kino kyayukanyikilwa ku kibelengelo kya mafunjisho a Baibolo afika ku 240,839 afunjishiwe kabiji ne baana ba bwanga bakatataka babatizwe bafika ku 9,349 mu mwaka wa mwingilo wa 2007 muno mu Zambia. Umvwe mubena kukeba kufunjisha lufunjisho lwa Baibolo, mwakonsha kuba byepi?
3 Ibikilai Kikonkwanyi: Kintu kitanshi, ibikilai kikonkwanyi kya kufunjisha lufunjisho lwa Baibolo kimye kyonse. Langulukainga pa kino kikonkwanyi kimye kyo muji mu mwingilo wa mu bujimi. Mwingilo wetu wa bwina Kilishitu byo avwangamo kufunjisha ne kusapwila, twafwainwa atweba bonse kwibikishangako bingi kwingilako pakatampe mu mwingilo wa kufunjisha bantu Baibolo.—Mat. 24:14; 28:19, 20.
4 Bishinka Bikwabo bya Kuvulukanga: Lulombelo ke kintu kikebewa bingi ku basapwishi ba Bufumu. Kimye kimo tutana bantu babalombenga bukwasho bwa ku mupashi. Byo jikalapo jishuko kwingijishiwa ne Yehoba kutana bantu ba uno mutundu ne kutendeka kwibafunjisha!—Hagai 2:7; Byubilo 10:1, 2.
5 Nyenga umo walombelepo kwikala na muntu wa kufunjishanga Baibolo, apa bino wabwela watanchika ne pa nkito makope a talakiti ya Nanchi Mukeba Kuyuka Byavula pa Mambo a Baibolo Nyi? Mwanamukazhi umo byo atolelepo talakiti imo ne kwiitangatu yonse wabwela keanembe ne mu kakupashi, uno nyenga wisambile nanji ne lufunjisho lwa Baibolo lwatendekele.
6 Basapwishi bakwenu bayuka bya kutendeka ne kufunjisha mafunjisho a Baibolo bakonsha kwimukwasha kufikizha kikonkwanyi kyenu kya kwikalapo na muntu wa kufunjisha Baibolo. Lombaingapo kwi Lesa pa mambo a kikonkwanyi kyenu kya kutanapo muntu wa kufunjisha Baibolo kabiji ingijishainga bukwasho bonse bujipo bwa kwimukwasha kufikizha kino kikonkwanyi. Kampe bukumotu mukekalepo na muntu wa kufunjisha Baibolo.