Kabokoshi Ka Mepuzho

◼ Nanchi kyawama Kamonyi wa kwa Yehoba kuya ku kipatela kya mishonyi nyi?

Machechi avula aji na bipatela nangwa mapunzha ko balamina bantu baji na bikola bibula kupwa. Javula, bino bipatela kechi byashimikilwa kukeba kutundaika Babilona Mukatampe ne. (Lum. 18:2, 4) Javula bebitungatu na mulanguluko wa kukeba kumwenangamo mali. Lelo jino, bipatela bimo byashalatu na jizhina ja kuba’mba bya mishonyi, pa kuba bikwabo nabyo bikiji mu maboko a bamingilo ba bupopweshi.

Umvwe Kamonyi wa kwa Yehoba keakebe kuya ku kipatela kya mishonyi, kiji ko aji mwine. Jiwi ja mu muchima ja muntu umo jakonsha kumuswisha kuya, pa kuba ja muntu mukwabo jakonsha kumukanya. (1 Timo. 1:5) Kuji bintu bimo bilengela muntu kuya nangwa kubula kuya ku kipatela kya mishonyi, kabiji kyanema bingi kwibilangulukapo.

Kya kumwenako, kipatela kya mishonyi kampe kyo kyonkatu kiji kwipi na komwikela. Nangwa inge kya kuba kuji ne kipatela kikwabo kiji pepi, bino akyo kya mishonyi kyo kyayukanyikwa’mba kyo kipana muchi wawama. Akyo kipatela kya mishonyi kampe kyo kyonkatu kiji na biñambañamba bibena kukebewa nangwa kampe dokotala wenu koko emubula’mba mukaye mukamonañeneko nanji. Kimye kimo bipatela bya mishonyi byakonsha kunemeka mulanguluko wenu wa pa mambo a mashi, pa kuba bipatela bimo nangwatu byobya bya kafulumende byakonsha kumukana. Abye byo bintu bimo byo mwakonsha kulangulukapo bulongo umvwe kemukebe kumona kipatela ka kyo mwakonsha kuyako.

Umvwe mwasalapo kuya ku kipatela kya mishonyi, mwakonsha kwikimona nobe kufwetatu muntu pa byo emwingijila. Mwakonsha kwikimona nobe abo bupopweshi bubena kubatu busulu, kabiji kuya na kupotako muchi kechi kibena kulumbulula’mba mubena kutundaika bupopweshi bwa bubela ne. Mubena kupotatu muchi nangwa kulipilatu mali amba mubukwe.

Pano bino, byo muji mwina Kilishitu, mwafwainwa kumona’mba mu bimye bya uno mutundu kechi mwivwanga mu byubilo bya mpopwelo ya bubela ne. Kabiji kechi mwafwainwa kwingijishanga mazhina a bupopweshi a mushingi nabiji a kuba’mba “Fwaza” nangwa’mba “Shishita” kutelelamo bamingilo bajipo nangwa beyatu na kwingijilapo ne. (Mat. 23:9) Mwafwainwa kumona’mba kuno ku kipatela ko mwaya, mwanangakotu muchi, kechi pajipo kintu kikwabo ne.

Umvwe bemubika mu mwanya, mwakonsha kwibabula’mba mwi Kamonyi wa kwa Yehoba kabiji ne kuba’mba mukeba bakulumpe mu kipwilo kyenu bakeyanga na kwimupempula. Kino kikemukwasha kutambula bukwasho bwa ku mupashi kimye kyo muji mu kipatela.—1 Tesa. 5:14.

Balongo ba mu kisemi baitabila, bakulumpe ne bakwabotu mu kipwilo bafwainwa kumona’mba babena kukwasha ku mupashi mulongo nangwa nyenga yense wa kikulumpe uji mu kipatela kya mishonyi ko basungila bakikote. Kwibata muchima bano bakikulumpe kukebatundaikanga bingi, kabiji kukebakwashanga kubula kwivwanga mu milombelo ya bupopweshi, bivuluko nangwa mu bintutu bikwabo byubiwa pa bino bipatela.

Umvwe satulanguluka pa bino bintu, atweba bonse pa muntu pa muntu tukalangulukishangapo bulongo ne kumona kipatela ka kyo twakonsha kuyako umvwe twabela.—Nga. 6:5.