Juba Jiikajila ja Kutendekelamo Mafunjisho a Baibolo

¹ Kutendeka mu January, kipwilo kyonse kikamonapo juba jimo ku mpelo ya mulungu pa ñondo pa ñondo, kampepo mulungu mutanshi ja kutendekelamo mafunjisho a Baibolo. Jino juba jakonsha kwikala pa Kibelushi nangwa pa Mulungu, kwesakanatu na byo kiji koko kwenu. Pa jojo juba inge mwina nzubo wakana lufunjisho lwa Baibolo, basapwishi bakonsha kumushila buku wa Baibolo Ufunjisha nangwa kumupa magazini akatataka. Bakulumpe ne bankwasho bonse mu kipwilo bafwainwa kwingilangako pakatampe mu uno mwingilo ne kukwasha basapwishi kutendeka mafunjisho a Baibolo.

² Kometi ya Mwingilo mu Kipwilo yo ikamona juba ja kumpelo ya mu yewo mulungu jawama kutendekelamo mafunjisho a Baibolo. Pa kimye pa kimye basapwishi bafwainwa kwibavululako pa kuba’mba bakenengezhenga ne kwesekesha na ngovu kutendeka mafunjisho a Baibolo ku nzubo ku nzubo kabiji ne pa kuya na kumona bantu bamwesheshe lusekelo kimye kitanshi.

³ Bya Kunengezha: Twakosha kutana mashinda a kutendekelamo mafunjisho a Baibolo mu kya mukachi kya Mwingilo Wetu wa Bufumu wa January 2006. Bamo bakonsha kukeba kwingijisha talakiti, nabiji wa kuba’mba Nanchi Mukeba Kuyuka Bukine Nyi? Kabiji Mwingilo Wetu wa Bufumu wa August 2007 peja 3, wamweshapo mashinda amo a kutendekelamo mafunjisho a Baibolo umvwe tubena kufwakesha bantu batambwile magazini etu. Bakulumpe ne bankwasho mu kipwilo bakebatanchikanga kutangijila kupwila kwa kuya mu mwingilo kwa maminiti 10 kufika ku 15 po bakambanga nangwa kumweshapo kimwesho kya jishinda jimo nangwa abiji a kutendekelamo mafunjisho a Baibolo.

⁴ Pano bino, kechi bonse bakaswa lufunjisho lwa Baibolo nangwa kutwajijila na kufunda kimye kyabaya ne. Kino kechi kyakonsha kwitulengela kubula kutendeka mafunjisho ne, mambo Yehoba ye ukokela bantu ba bumukooko mu jibumba janji. (Yoa. 6:44) Mwingilo wetu kechi wa kubyalatu nkunwa ya bukine ne, ukebewa ne kujimauna kabiji ne kutekezha byaikizha mizhazhi panshi. Kino kyavwangamo ne kufunjisha Baibolo bantu bamichima yawama. Umvwe ketube bino, ko kuba’mba tuji mu mwingilo umo ne Lesa.—1 Ko. 3:9.