Bakomvwa Byepi?
1. Mambo ka mwingilo wa busapwishi o akonsha kukatezha, kabiji mambo ka o tukoselako na kusapwila?
1 Juba ja Yehoba byo jibena kufwenya pepi, twafwainwa bukiji bukiji kukwasha bantu bavula kwikala na maana alumbuluka a kuyuka Lesa ne nkebelo yanji ku bantu. (Yoa. 17:3; 2 Pe. 3:9, 10) Kimye kimo, kino kyakonsha kukatazha bingi mambo a kuba bantu bavula baji na milengulwila kabiji betwendeleka na mambo a mwingilo wa busapwishi. (2 Pe. 3:3, 4) Bino twaketekela kuba’mba mu nyaunda yetu mo bakiji bantu bakonsha kutambwila mambo awama inge beomvwa. Pano bantu ba uno mutundu bakonsha kumvwa byepi kwa kubula wa kwibasapwila?—Loma 10:14, 15.
2. Nga byaubile mutumwa Paulo bitutundaika byepi?
2 Kumanyikwa: Na mambo a kuba kukiji bantu bakeba kumvwa mambo a Bufumu, kechi twafwainwa kwikileka kusapwila ne. Muzhi wa Filipai ku Europe ye wajinga mutanshi mo asapwijilenga mutumwa Paulo mambo awama. Kimye Paulo ne Silasa kyo bebapelemo mambo a bubela, bebapumine na tumama ne kwibataya mu kaleya. (Byu. 16:16-24) Nangwa byonkabyo, aya misongo ya bipumo kechi yamulengejile Paulo kwikala na moyo ne kuleka kusapwila ne. Byo ayile mu Tesalonika, muzhi mukwabo walondejilepo pa lwendo lwanji lwa bumishonale, ‘wachinchikile mwi Lesa wanji.’ (1 Tesa. 2:2) Byaubile Paulo bitukwasha kubula ‘kukoka.’—Nga. 6:9.
3. Ki ka kyakonsha kulengela bantu kupimpula michima yabo nangwa kya kuba kala bakananga?
3 Bantu bavula bakananga kala kumvwina mambo awama, luno bapimpula michima yabo. Lukatazho lwa mali, kukolwa, kufwisha wa mu kisemi, nangwa masawakya a binkunka bibena kubiwa panopantanda byakonsha kulengela muntu kupimpula muchima wanji. (1 Ko. 7:31) Bamo bajinga na bansemi bebakanyanga, pano luno babakome kabiji bakonsha kumvwa inge twibasapwila. Inge twatwajijila kusapwila kikalengela bano bantu ‘kwita pa jizhina ja Yehoba’ mema saka akiji mu kapokoso.—Loma 10:13.
4. Ki ka kitulengela kutwajijila mu mwingilo kwa ‘kubula kuleka’?
4 ‘Kwa kubula Kuleka’: Butemwe bo twatemwa Lesa ne bakwetu bwitutundaika kutwajijila kusapwila ne kulenga baana ba bwanga ‘kwa kubula kuleka’ byonka byaubile batumwa, mu myaka kitota kitanshi. (Byu. 5:42) Bantu bavula lelo jino babena ‘kwikizha byefu ne kubinza na mambo a bya bunya’ bibena kubiwa. (Ezi. 9:4) Bekala na luketekelo ne kwikizha michima umvwe baumvwa mambo awama! Nangwa kya kuba bantu bavula kechi bakeba kumvwa ne, Binembelo bitubula kuba’mba mingilo yetu imutokesha Yehoba ku muchima.—Hebe. 13:15, 16.