Totainga Yehoba Moba Onse
1. Bakalume ba Lesa batundaikwa kuba ka, kabiji mambo ka?
1 Mfumu Davida wamwesheshe byo akebanga kutota Yehoba “moba onse,” kabiji myaka ne myaka. (Sala. 145:2, 7, 21) Ne atweba tuji na bishinka byavula bingi bya kwitulengela kutota Yehoba moba onse.—Sala. 37:10; 145:14, 18; 2 Pe. 3:13.
2. Bisemi byakonsha kutota byepi Yehoba pa juba pa juba?
2 Mu Nzubo Yetu: Tuji na mabuku awama bingi a kwitukwasha kwisambanga pe Lesa ne pa Baibolo kimye kyo tubena kubalaula binembo moba onse, kimye kya kwiyowa Kupopwela kwa Kisemi kabiji ne pa kunengezha kupwila kwa kipwilo. Bisemi byavula bibikila kikonkwanyi kya kujiila pamo bonse pa juba pa juba. Kujiila pamo kwibalengela kubula kwikala na misambo ya lubilo lubilo kabiji kwibakwasha ne kwikala na jishuko ja kutota Yehoba. Mitwe yawama isala bansemi ya kwisamba na baana babo yakonsha kwibakwasha kukomesha baana babo ne “kwibafunjisha ne kwibajimuna monka mwaswila aye Nkambo.”—Efi. 6:4; Mpitu. 6:5-7.
3. Mashuko ka o tuji nao a kutotelamo Yehoba umvwe tuji pamo na balongo betu?
3 Na Balongo Betu: Umvwe tuji mu mwingilo wa mu bujimi nangwa mu kupwila kwa kipwilo, twikala na mashuko avula bingi a kutotelamo Yehoba pamo na bakwetu ba mu lwitabilo. (Mana. 15:30; Fili. 4:8; Hebe. 13:15) Byo kiji kuba’mba atweba bonse twamutemwa Yehoba, kyafwainwa kwitupelela bingi kusanchilanga Yehoba pa buwame bwanji kimye kyo tubena kwisamba na bakwetu.—Sala. 106:1.
4. Mu ñanyi mashinda mo mwakonsha kutotelamo Yehoba umvwe kechi mwaya mu mwingilo ne?
4 Pa Kwisamba na Bantu Babula Kwitabila: Nangwa kya kuba kimye kimo kechi twakonsha kwingilako mu mwingilo pa juba pa juba ne, kwisambako pacheche na bakwetu mo twingijila, mo tufunjila ne bantutu bakwabo pe Yehoba ne nkebelo yanji, kwakonsha kukwasha bantu ba michima ya kishinka kwikala na luketekelo. (Sala. 27:14; 1 Pe. 3:15) Nyenga umo byo ajinga mu ndeke, wasapwijile mukwabo mo bayijilenga pamo, wamutekeneshe ne kumutundaika na mambo a byo amwambijile, kabiji kino kyalengejile uno mukwabo kumupa keyala ne nambala yanji ya foni pa kuba’mba bakatwajijile kwisambanga. Makatazho a panopantanda byo abena kuvujilakotu, bantu ba Yehoba batwajijila kusapwila bantu “mambo awama a lusekelo.” Kino kikwasha bantu kwikala na luketekelo ne kwibalengela nabo kutota Yehoba.—Isa. 52:7; Lo. 15:11.
5. Mambo ka o tukebela kutota Yehoba, kabiji kuba bino mwakonsha kufuma ka?
5 Byo kimusangajikapo Yehoba kumona bakalume banji na kumutota pa juba pa juba! Byonka byuba bilengwa bya Yehoba byo tumona na meso, ne atweba twakonsha kumutota pa juba pa juba mu mazubo etu, mu kipwilo kabiji ne pa kwisamba na bakwetu aba bakyangye kutendeka kumutota Yehoba.—Sala. 19:1-4.