Inengezhai Kusapwila ku Sukulu
1. Ñanyi mashuko o mwikala na o ku sukulu?
1 Anweba bena Kilishitu bakyanyike mupita mu makatazho ne mikiika imo pa sukulu kikale ye mwaka mutanshi nangwa ne. Bino mwikala ne na bimye bimo byawama bya ‘kushimuna bukine.’ (Yoa. 18:37) Nanchi mwinengezha kusapwila nyi?
2. Bi ka byakonsha kwimukwasha kusapwila bulongo ku sukulu?
2 Yehoba, bansemi benu ne kalume wa kishinka kabiji wa maana bemufunjisha byavula bya kwimukwasha kuba bulongo mu bwikalo bwenu. (Mana. 1:8; 6:20; 23:23-25; Efi. 6:1-4; 2 Timo. 3:16, 17) Kwakubula nangwa kuzhinauka ne, mwayuka makatazho o mwakonsha kupitamo ku sukulu. Byo mwayuka bikeba Lesa ne mpunzha byo iji, inengezhezhai jimo kusapwila. (Mana. 22:3) Taipo muchima kuyuka mikambizho ne mafunde a mu Binembelo aji mu mabuku abiji a “Young People Ask” ne mitwe ikwabo inembwa mu Awake!
3. Ñanyi mashinda amo o mwakonsha kwingijisha pa kusapwila?
3 Mwakonsha kusapwila mu mashinda avula ku sukulu. Bakwenu umvwe bamona mvwajilo ne mwekelo yenu, byubilo ne ñambilo yawama, byo mwashingika bakwenu mo mufunjila ne bafunjishi, ne kumona byo bemukomesha bulongo, bamo bakonsha kwimushikisha’mba, “Mambo ka o wapusena na bakwenu? (Mala. 3:18; Yoa. 15:19) Kino kyakonsha kwikala kimye kyawama kusapwila ne kulondolola pa mambo a lwitabilo lwenu. (1 Timo. 2:9, 10) Kimye kyonse kyo muji ku sukulu mu katalañananga na lweseko nabiji lwa kuba bintu bimo byo boba mu kyalo nangwa kusekelela moba. Umvwe bemwipuzha kyo mubujila kwitumpilamo mu bino bintu, nanchi mwakonsha kwamba’mba, “Bupopweshi bwetu bukanya; ne Kamonyi wa kwa Yehoba nyi,” inyi mukekimona kwikala kimye kya kusapwila pe Shetu wa butemwe aye Yehoba? Kunengezhezha jimo bulongo na bukwasho bwa Yehoba kukemulengela kusapwila bulongo ku bakwenu mo mufunjila, bafunjishi ne bantutu bakwabo.—1 Pe. 3:15.
4. Mambo ka o mwaikela na luketekelo amba mwakonsha kufunda bulongo sukulu?
4 Nangwa kya kuba kimye kimo mwakonsha kumvwa moyo pa sukulu, yukai amba bantu bavula bakeba’mba mufunde bulongo sukulu. Kabiji kituletela bingi lusekelo kuyuka’mba muji na luketekelo lwa kusapwila ku bakwenu ku sukulu. Onkao mambo kosai ne kwinengezha kusapwila ku sukulu!