Byubilo Bitumbijika Lesa
1. Ñanyi bintu bilengela bantu kuyuka’mba bakamonyi ba kwa Yehoba babena kushonkena?
1 Bantu bavula bayuka umvwe tubena kushonkena. Mu mapunzha amo babijika pa mwela kimye kyo tukatatula kushonkena. Bantu bavula bamona bakamonyi saka bavwala mabaji ko bafikila ne kimye kyo babena kupota bya kuja. Bishinka byalondelapo biketukwasha kutumbijika Lesa kimye kyo tuji ku mpunzha kwaikela kushonkena.—1 Pe. 2:12.
2. Twakonsha kutumbijika byepi Lesa kimye kyo tuji ku mpunzha kwaikela kushonkena kwa nkambi?
2 Kuvwala Bulongo: Kuvwala bulongo kimye kya kushonkena kulengela bantu kwitunemeka. Twafwainwa kumwekanga bulongo ne pa bimye bikwabo. Kimye kyo tuji pa mpunzha po twafikila, pa kupota bya kuja, pa kisankanyi ne bimyetu bikwabo. Kino kyakonsha kulengela bantu kwitunemeka kya kine kine. Nangwa kechi tubena kushonkena ne, twafwainwa kuvwalanga bulongo. Bantu betumona bafwainwa kumona lupusano luji pa bantu bapopwela Lesa ne babula kumupopwela. (Loma 12:2) Kabiji twafwainwa kuvwalanga mabaji pa kuya na kushonkena mambo kino kikalengela bantu kwituyuka, kuyuka amba tubena kushonkena ne kumonapo mashinda amo pa kuba’mba twibasapwile.
3. Twakonsha kumwesha byepi amba twatekanya ne kunemeka bantu?
3 Kutekanya ne Kunemeka Bantu: Tubena kwikala mu ntanda muji bantu betemwa bene ne babula kusanta. Bantu bomvwa bingi bulongo umvwe twibanemeka ne kwibatekenya, ku mapunzha ko twafikila ne kimye kyo tubena kupota bya kupota pota. (2 Timo. 3:1-5) Twafwainwa kulangulukilako bakwetu kimye kyo tubena kukwachila pa kwikala nangwa pa kutambula mabuku. (1 Ko. 10:23, 24) Mwana mulume umo kimye kitanshi kyo atainwe ku kushonkena kumo kwa nkambi waambile’mba, “Nalubamo majashi o baambile pa joja juba, pano bino kechi nkalubamo byubilo byawama bakamonyi byo bamwesheshe ne.”
4. Mambo ka o twafwainwa kwipana kwingilako pa kushonkena kwa nkambi?
4 Kwipana: Kwipana ke kayukilo ka bwina Kilishitu. (Sala. 110:3) Nanchi mwakonsha kwipana kwingilako pa kushonkena nyi? Pa kushonkena kumo kwajingako balongo ne banyenga 600 bepaine kuwamisha pa mpunzha paikejile kushonkena. Muntu umo waambaile amba: “Nkyangye kumonapo kintu kya uno mutundu. Nakumya pa kumvwa’mba abe bantu bonse babena kwingilatu kyatu.” Byo tubena kutengela kushonkena kwa nkambi kwa uno mwaka wa 2013, tubena kukeba tukomvwishe byo tukafunda ne kutumbijika Yehoba.