Ñanyi Kintu Kitulengela Kusapwila Mambo Awama?
1. Butemwe ne mwingilo wa kusapwila bya kwatankana byepi?
1 Kusapwila mambo awama a Bufumu ke mwingilo wanema bingi ye twafwainwa kwingila lelo jino. Kuba bino kumwesha’mba twatemwa Yehoba ne bantu. (Mako 12:29-31) Butemwe bo bwitulengela kupayankana mu uno mwingilo.—1 Yoano 5:3.
2. Mwingilo wa kusapwila umwesha byepi amba twatemwa Yehoba?
2 Kutemwa Yehoba: Kutemwa Yehoba kwitulengela kumwambilako. Yehoba baamubepela bubela pa myaka nobe 6,000 kwi Satana. (2 Ko. 4:3, 4) Walengela bantu bavula kulanguluka amba Lesa usoka bantu mu mujilo wa helo, kuji balesa basatu ne kuba’mba Lesa kechi wata muchima bantu ne. Bavula balanguluka ne kuba’mba ufwako. Onkao mambo, tukeba kukwasha bantu kumuyuka Yehoba. Kwingila na ngovu mu mwingilo wa kusapwila mambo awama kutokesha Yehoba pa muchima, bino Satana kechi umvwa bulongo ne.—Mana 27:11; Hebe. 13:15, 16.
3. Tumwesha byepi amba twatemwa bantu?
3 Kutemwa Bantu: Kimye kyo tubena kusapwila muntu tumwesha’mba twamutemwa. Mu ano moba akatazha bantu bakebesha bingi kumvwa mambo awama. Bantu bavula bajitu nobe bena Ninevwa bajingako mu moba akwa Yona ‘babujile kuyuka mwapusena kuboko kwa kilujo na kwa kipiko.’ (Yona 4:11) Mwingilo wetu ukwasha bantu kuyuka bwikalo bwawama. (Isa. 48:17-19) Wibalengela kuketekela bintu bya kulutwe. (Loma 15:4) Umvwe saka balondela byo bafunda ‘bakapuluka.’—Loma 10:13, 14.
4. Ñanyi kintu Yehoba kyo akabula kulubako?
4 Mwana watemwa bansemi yanji kechi wibatemwatu kana pa kintu ne. Bino wibatemwa moba onse. Po pamotu, kutemwa Lesa ne bakwetu kwitulengela kumonapo mashinda akonsha kwitukwasha kusapwilanga kimye kyonse, kechi kusapwilatu pa kibelushi ne pa mulungu ne. Tukasapwilanga moba onse kwakubula kuleka. (Byu. 5:42) Yehoba kechi ukalubako butemwe bo tumwesha ne.—Hebe. 6:10.