Nanchi Mwingijisha Mashinda Apusana Pusana Nyi?
1. Kwaluka kwa bintu mu ntanda kwakonsha kwitulengela kuba ka?
1 Pa 1 Kolinda 7:31 paamba kuba’mba bintu bibena kumweka pano pa ntanda bibena kwaluka. Bintu byo bibena kwaluka mu ntanda, byakonsha kwitulengela kusapwila mu mashinda apusana pusana, kupimpulako mutanchi wetu ne mashinda a kusolomokelamo bantu. Nanchi mwingijisha mashinda apusana pusana nyi?
2. Twafwainwa kubanga byepi pa kuba’mba twendelenga pamo na jibumba ja Yehoba?
2 Mashinda a Kusapwilamo: Kufumatu ne kala, bena Kilishitu bengijisha mashinda apusana pusana. Yesu kimye kitanshi kyo atumine baana banji ba bwanga, wibambijile kubula kusenda kajo nangwa mali. (Mat. 10:9, 10) Kimye kikwabo wapimpwile mukambizho pa kuba’mba bana banji ba bwanga bengile bulongo mwingilo wa kusapwila mambo awama mu manyaunda akwabo. (Luka 22:36) Kwesakana na bintu byo byajinga kala, Jibumba ja Yehoba jaingijishanga mashinda apusana pusana pa kusapwila nabiji, bikachi panembwanga mambo awama, kusapwila kwingijisha myotoka ne kusapwila pa waileshi. Lelo jino bantu bavula kechi batanwa pa mazubo ne. Onkao mambo, twingila busapwishi bwa mu mukwakwa ne bwa kushukilwa mu kifulo kya kusapwilangatu ku nzubo ku nzubo. Kabiji umvwe bantu bavula baya ku mingilo mu kimye kya mute, tubena kutundaikwa kusapwilanga ku nzubo ku nzubo mabanga. Umvwe kalaki wa Yehoba waaluka, nanchi tumulondela nyi?—Ezi. 1:20, 21.
3. Twakonsha kuba byepi pa kuba’mba tufike bantu pa muchima mu nyaunda yetu?
3 Mashinda a Kusolomokelamo Bantu: Ñanyi bintu byatemwa kwambapo bantu baji mu nyaunda yenu? Pa bukomo nyi? Inyi pa bisemi nangwa bumbanzhi? Kiwama bingi kuyuka makatazho apitamo bantu baji mu nyaunda yenu pa kuba’mba muyuke bya kwisamba nabo. (1 Ko. 9:20-23) Umvwe mwina nzubo waambapo bintu bimo, mu kifulo kya kwamba pa bintu byo twaji kunengezha, kyawama kupimpula mwisambo ne kwamba pa kintu kiji ku muchima wanji.
4. Mambo ka o twafwainwa kwingijishanga mashinda apusana pusana kwa kubula kukankazhama?
4 Katatakatu “bintu bibena kumweka” pano pa ntanda bikapwe ne malwa akatampe akatatule. “Kimye kyashalako bekikepesha.” (1 Ko. 7:29) Kyanema bingi kwingijisha mashinda apusana pusana pa kuba’mba twingileko na ngovu mu kimye kicheche kyashalako. Kechi twafwainwa kukankazhama ne.