Bibaaba bya Kwitukwasha mu Mwingilo
1. Bibaaba bya kuba’mba “Kwisamba na Bantu” biji na ñanyi nkebelo ibiji?
1 Mu Kyamba kya Usopa kya bena kengi javula mwikala bibaaba bya kuba’mba “Kwisamba na Bantu.” Bino bibaaba biji na nkebelo ibiji ya kwisambilamo bifunjisha Baibolo ne kumwesha byo twafwainwa kuyuka bya kwisamba na bantu pa mitwe imo. (1 Pe. 3:15) Twakonsha kwingijishanga byepi bino bibaaba?
2. Twakonsha kwingijisha byepi bino bibaaba mu mwingilo?
2 Bingijishainga mu Mwingilo: Mwakonsha kulamapo magazini a Kyamba kya Usopa muji bino bibaaba. Umvwe mwina nzubo, ye mufunjisha Baibolo nangwa ukeba kufunda waipuzha bwipuzho nangwa waipuzha pa mutwe umo ye baambapo mu bino bibaaba, mupai kino Kyamba kya Usopa muji yewo mutwe ne kwisamba nanji. Umvwe kyakuba mufwaye uno magazini muji kino kibaaba, mwakonsha kukopolola pa keyala wa www.jw.org.
3. Twakonsha kwisamba byepi kino kibaaba na mwina nzubo?
3 Mwakonsha kwisamba byepi na muntu bino bibaaba? Bamo baambila muntu kutanga byambo bya mwinanzubo, abo batanga byambo bya kwa Kamonyi. Kwingijisha jino jishinda jingila bulongo mambo jilengela muntu kuyuka byo twaitabilamo mu jishinda jawama.—Mpitu. 32:2.
4. Twafwainwa kwingijisha byepi bino bibaaba pa kuba’mba tuyuke bya kusapwila?
4 Ifunjishainga ne Kufunjishako Bakwenu: Kimye kyo mubena kutanga bino bibaaba, tai muchima pa binembelo, byakumwenako, ne mikuku yo mwakonsha kwingijisha kwisamba nanji. Yukai bibena kwambiwamo. Esekai kwingijisha jino jishinda mu mwingilo. (Mana. 1:5; 9:9) Nyenga umo waambile’mba, “Kutanga bino bibaaba kujitu nobe ubena kufunda ku mukwenu painiya wayuka byambo bya kwamba pa kusapwila.”
5. Twakonsha kukwasha byepi bo tufunjisha Baibolo kuyuka bya kusapwila?
5 Mwakonsha ne kwingijisha bino bibaaba kukwasha bo mufunjisha Baibolo kuyuka bya kusapwila. Tangilai pamo bino bibaaba, ye mufunjisha Baibolo ekale musapwishi. Kwingijisha jino jishinda, mukakwasha bo mufunjisha Baibolo kuyuka bulongo bya kulumbulula byo baitabilamo. (Kolo. 4:6) Bino bibaaba ke jishinda jimo mo etukwashisha “kupwisha bulongo” mwingilo wetu.—2 Timo. 4:5.