Bya Kunengezha Ntatwilo Yawama Kwisambilamo
1. Mambo ka ntatwilo yawama kwisambilamo na bantu o yanemena?
1 Byonkatu bwema bwawama bwa kajo byo bulengela mujojo wa kukeba kuja, ntatwilo yawama nayo yakonsha kulengela muntu kukeba kwisamba nanji byambo bya mu Baibolo. Ntatwilo yakonsha kupusana kwesakana na bintu bibena kwambiwapo. Byonkatu biwama kajo ko banengezha bulongo, byobyo twafwainwa ne kunengezha ntatwilo ya kwisambilamo na bantu. Kikebewa kwinengezhezha jimo. (Mana 15:28) Ki ka kyakonsha kulengela ntatwilo ya kwisambilamo na bantu kuwama?
2. Twakonsha kunengezha byepi ntatwilo yakonsha kuzakula bantu?
2 Salai Mitwe Yakonsha Kuzakula Bantu: Ntatwilo yetu yakonsha kuzakula bena nzubo nangwa kwibalengela kuchibikizha mwisambo. Onkao mambo, kimye kyo mubena kunengezha, langulukai pa bintu byakonsha kuzakula bantu baji mu nyaunda yenu. Nanchi bantu baji mu nyaunda yenu batemwa kafulumende wawama, kwikala ba lusekelo mu kisemi nangwa kupwa kwa nkondo nyi? Javula bantu batemwa kwamba byo bakeba pa bino, onkao mambo kimye kyo mubena kunengezha, salai mepuzho akonsha kwibalengela kulangulukapo. Nanchi mwakonsha kwingijisha mashinda a kwisambilamo na bantu aji mu Mwingilo Wetu wa Bufumu aesakana na biji nyaunda yenu nyi? Kimye kya Kupopwela kwa Kisemi, mwakonsha kweseka kwingijisha ano mashinda a kwisamba na bantu.
3. Twakonsha kwingijisha byepi ntatwilo yafwainwa kwisambilamo na bantu kwesakana na bisho ne nkomeno ya baji mu nyaunda yetu?
3 Yukai Bisho ne Nkomeno ya Bantu: Mu mapunzha amo, kikebewa kwamba bukiji kintu kyo twaendela. Ku mapunzha akwabo, umvwe kya kuba mwenyi wabula kwimuna bena nzubo ne kwisambako nabo pacheche ne, bamumona kuba’mba kechi uji na mushingi ne. Ku akwabo, kwesakana na bupopweshi bo bakomenamo, bantu betuswisha kwingijisha Baibolo pa kutatula kwisamba nabo. (Byubilo 2:14-17) Nangwa byonkabyo, ku bantu babula kwitabila mu bupopweshi bwa bena Kilishitu nangwa babula kwitabila mu bupopweshi buji bonse ne, kyakonsha kuwama kwamba pa Baibolo kimye kyo mukabwelako kukila kimye kitanshi.—Byubilo 17:22-31.
4. Ñanyi bintu byo twakonsha kuteshako muchima ku byambo bya kutatwilamo kwisamba na bantu?
4 Byambo bya Kutatwilako: Nengezhai bulongo byambo bya kutatwilako. Kwisamba byambo bichechetu kwawama. Jishinda jo tutatwilamo kwisamba na bantu janema bingi. Isambainga nabo na kizaku. Mwemweselainga ne kumwesha kuba’mba mwibata muchima bena nzubo. Kwingijisha ano mashinda kuketukwasha kunengezha ntatwilo ya kwisambilamo na bantu yawama ikatundaika ba mu nyaunda yetu kwikala na kizaku kya kuja pa “tebulu wa Yehoba.”—1 Kolinda 10:21.