Mukwekele wa Kwita Bantu ku Kushonkena
1. Mukwekele wa kwita bantu kwiya na kutanwa ku kushonkena kwa mu 2014 ukatendeka ñanyi kimye?
1 Inge mubena kunengezhapo kijilo kikatampe ko muketa balongo benu nangwa balunda nenu, mwikala bingi na lusekelo kimye kyo mubena kwibeta. Kyo kimotu ne kushonkena. Babena kunengezha kushonkena kwa nkambi ne kukonkana kwa byalo kwa mu 2014 baingila mingilo yavula bingi. Inge kwashala milungu isatu kufika kimye kya kuno kushonkena, tukekala na mukwekele wa kwita bantu kwiya na kutanwako. Ñanyi bintu biketukwasha kwita bantu na mukoyo ku kuno kushonkena?
2. Ñanyi bintu biketutundaika kwingilako pakatampe mu mukwekele wa kwita bantu ku kushonkena?
2 Tukatundaikwa kwingilako pakatampe mu mwingilo wa kwita bantu inge twalanguluka pa byo tumwenamo mu kajo ka ku mupashi ketunengezhezha Yehoba kimye kya kushonkena. (Isa. 65:13, 14) Twafwainwa ne kuvuluka kuba amba, mu mukwekele wetu wa kwita bantu ku kushonkena mufuma byawama bingi. Bantu bamo botuketa bakeya na kushonkena. Nangwa kya kuba kechi bonse botuketa bakeya ne, inge twaingilako pakatampe mu mukwekele wa kwita bantu, tukaleta lukumo kwi Yehoba ne kumwesha byubilo byanji bya bumpanyi.—Sala. 145:3, 7; Lum. 22:17.
3. Tukashajikanga byepi tupepala twa kwichilapo bantu ku kushonkena?
3 Jibumba ja bakulumpe mu kipwilo jikamona byafwainwa kwingila bulongo mu kipwilo kyabo pa kusha tupepala twa lwito mu nyaunda ya kipwilo yonse. Kabiji bakamona inge bakonsha kusha tupepala pa mazubo pabula bantu nangwa kupana tuno tupepala mu busapwishi bwa kuvula bantu. Pa Kibelushi, mwafwainwa kusha magazini pamo na tupepala twa lwito inge kyakonsheka. Bino, inge Kibelushi kitanshi kya ñondo kyaikela mu moba a mukwekele wa kwita bantu ku kushonkena, twafwainwa kutesha maana pa kusha tupepala, kechi pa kutendeka mafunjisho a Baibolo ne. Byo akapwa uno mukwekele, tukekala bingi na lusekelo lwa kuyuka’mba twaingijileko na mukoyo mu mukwekele wa kwita bantu bavula kwiya na kushonkena pamo ku kijilo kitunengezhezhe Yehoba.