Tai Muchima pa Kufunjisha Bantu Kwikala Baana ba Bwanga
1. Pa kuba’mba bantu bakapuluke, twafwainwa kuba byepi?
1 Sawakya wa mwingilo wa mwaka wa 2014 wamwesha kizaku ne mukoyo wa bantu ba Lesa wa kusapwila mambo awama a Bufumu. (Mat. 24:14) Mwingilo wa kusapwila ku nzubo ku nzubo, mukwekele wa kusha matalakiti ne tupepala twa lwito ne kwingijisha mashinda akatataka a kusapwilamo ku mvula bantu abena kwitulengela kusapwila bantu bavula. Pano bino, pa kuba’mba bantu bakapuluke, twafwainwa kwibakwasha kwikala baana ba bwanga ba kwa Yesu kupichila mu kufunda nabo Baibolo.—1 Timo. 2:4.
2. Ñanyi mepuzho o twakonsha kwishikisha a kwitukwasha kwinengezha kufunjisha bantu Baibolo?
2 Inengezhainga Kufunjisha Bantu Baibolo: Inge muntu ukeba kufunda Baibolo, nanchi munemba jizhina janji, ko ekala, nambala ya foni nangwa keyala pa kuba’mba mukabweleko na kutendeka kufunda nanji Baibolo nyi? Ñanyi kimye kyapeleleko kumwesha muntu bya kufunda Baibolo kimye kitanshi kyo mwamutaaine? Ñanyi kimye kyapeleleko kumwesha bya kufunda Baibolo muntu ye mutwajila magazini? Nanchi mwakitambishako vidyo wa kuba’mba Mambo ka a Kufunjila Baibolo? ne wa kuba’mba Kikala Byepi pa Kufunda Baibolo? ku bantu bo mwingila nabo nkito, bo mufunda nabo ku sukulu, bo mwikala nabo kipikipi, ne bayukane nyi? Inge mubena kwingijisha tebulu po batanchika mabuku, nanchi mubuula bantu bo mupa mabuku kuba’mba bakonsha ne kufunda Baibolo kyatu nyi?
3. Pa kuba’mba tufunjishe bulongo bukine, twafwainwa kuba byepi?
3 Yehoba ne Yesu Betukwasha: Yesu byo apaaine mukambizho wa kufunjisha bantu kwikala ke ‘baana ba bwanga’ waingijishe kyambo kya kuba’mba “yainga,” kumwesha’mba twafwainwa kwibikako bingi kwingijisha mashinda apusana pusana. Nangwa byonkabyo, kechi witushile bunke ne, bino walayile’mba ukekala ne atweba moba onse. (Mat. 28:19, 20) Kabiji Yehoba witupa mupashi wanji wazhila ne bingijisho, kabiji witufunjisha byo twafwainwa kufunjisha bantu bukine. (Zeka. 4:6; 2 Ko. 4:7) Onkao mambo, twafwainwa kulomba kuba’mba Lesa etupe “kizaku ne bulume bwa kwingila” uno mwingilo wanema.—Fili. 2:13.
4. Mambo ka o twafwainwa kutela muchima pa kufunjisha bantu kwikala baana ba bwanga?
4 Kusapwila mambo awama kwituletela bingi lusekelo. Pano bino, lusekelo lwetu lubaya inge twafunjisha muntu bukine ne kumukwasha kwendela pamo ne atweba mu jishinda “jitwala ku bumi.” (Mat. 7:14; 1 Tesa. 2:19, 20) Kyakilamo kunema ke kya kuba’mba, kuta muchima pa kufunjisha bantu kwikala baana ba bwanga, kusangajika muchima wa Yehoba mambo “kechi usaka muntu nangwa umo amba akafwe ne, bino ukeba’mba bonse balapile.”—2 Pe. 3:9.