Kuwamishako Busendwe Bwetu bwa Kusapwila—Kukwasha bo Tufunjisha Baibolo Kwipana ne Kubatizhiwa

ENE MAMBO O KWANEMENA: Pa kuba’mba bekale na bulunda bwakosa na Yehoba, bantu bafunda Baibolo bafwainwa kwipana ne kubatizhiwa. (1Pe 3:21) Aba bekala mwayila lubatizhilo lwabo bazhikijilwa ku mupashi. (Sl 91:1, 2) Mwina Kilishitu wipana kwi Yehoba, kechi ku muntu, ku mwingilo nangwa ku jibumba ne. Onkao mambo, babena kufunda Baibolo bafwainwa kutemwa Lesa ne kumusanchilanga.—Lo 14:7, 8.

BYA KUBA:

• Kimye kyo mubena kufunda nanji, isambainga pa bintu bimwesha kuba’mba Yehoba koaji. Mutundaikainga kutanga Baibolo ne kulomba kwi Yehoba “kimye kyonse.”—1Te 5:17; Ya 4:8

• Tundaikainga ye mufunjisha Baibolo kwibikila bikonkwanyi bya kwipana ne kubatizhiwa. Mwakonsha ne kumukwasha kufikizha bikonkwanyi nabiji kukumbulapo pa kupwila nangwa kusapwila ku bantu bo ekala nabo kinkalankulo nangwa ku bantu bo engila nabo. Vulukai kuba’mba Yehoba kechi ukanjikizha bantu kumwingijila ne. Muntu mwine ye wifuukwilapo kwipana.—Mpi 30:19, 20

• Tundaikainga ye mufunjisha Baibolo kupimpula byubilo byanji pa kuba’mba atokeshe Yehoba ne kufikilamo kubatizhiwa. (Man 27:11) Na mambo a kuba’mba byubilo bimo byakonsha kukatazha kuleka, mwafwainwa kutwajijila kukwasha ye mufunjisha Baibolo kuvuula bumuntu bwa kala ne kuvwala bupya. (Ef 4:22-24) Isambainga nanji bibaaba bya mu Kyamba kya Usopa bya kuba’mba “Baibolo Upimpula Bwikalo bwa Bantu”

• Mubulaingako bintu byawama byo mwamwenamo mu kwingijila Yehoba.—Is 48:17, 18