Mwakonsha Kutundaika Mwina Kilishitu Wakooka

Pa Kibiji pa 11 April, bena Kilishitu bavula bakooka bakatanwa ku Kivuluko. Batendekele kunyema kapeela ka ku bumi, bino bakooka kunyema na mambo a makatazho apusana pusana, nabiji o baambapo mu buloshuwa wa Bwelai kwi Yehoba. (Heb 12:1) Nangwa byonkabyo, bano bena Kilishitu bakooka banema bingi kwi Yehoba mambo wibapotele na mashi a Mwananji. (By 20:28; 1Pe 1:18, 19) Twakonsha kwibakwasha byepi kubwela mu kipwilo?

Bakulumpe mu kipwilo bakeba bena Kilishitu bakooka ne kukeba kwibakwasha byonkatu byuba kafunga ubena kukeba mukooko wafuma mu jitanga. (Luk 15:4-7) Kino kimwesha Yehoba byo ebata muchima. (Ye 23:3, 4) Atweba bonse twafwainwa kutundaika bena Kilishitu bakooka, kechi mwingilo wa bakulumpetu ne. Kwibamwesha butemwe ne kifyele kutokesha Yehoba pa muchima bingi kabiji mwakonsha kufuma byawama. (Man 19:17; By 20:35) Onkao mambo, langulukai pa bena Kilishitu bo mwakonsha kutundaika, kabiji kange mukankazhame kuba bino ne!

TAMBAI VIDYO WA KUBA’MBA TUNDAIKAINGA BAKOOKA, APA BINO MWISAMBE PA MEPUZHO ALONDELAPO:

• Ba Abbey baubile byepi byo bataine Kamonyi ye babujile kuyuka?

• Mambo ka o twafwainwa kwisambila na bakulumpe mu kipwilo inge tubena kukeba kukwasha mwina Kilishitu wakooka?

• Ba Abbey banengezhezhe byepi pa kuya na kufwakesha ba Laura kimye kya bubiji?

• Ba Abbey bamwesheshe byepi mukoyo, kutekanya ne butemwe byo bakebelenga kutundaika ba Laura?

• Twakonsha kufunjilako ka ku kishimpi kya kwa Yesu kiji mu Luka 15:8-10?

• Ñanyi bintu byawama byafumine mu kwibikako kukwasha ba Laura?