Wamishai Lufunjisho Lwenu lwa pa Bunke

ENE MAMBO O KWANEMENA: Kufunda Mambo a Lesa pa bunke bwetu kwitukwasha “kukwatakanya bulongo mwayila bwipi ne bula ne kimino ne kuzhika” kwa bukine. (Ef 3:18) Kwitukwasha kwikala babula kaneneno kabiji babula bulema mu ino ntanda yatama ne ‘kukwachisha ku mambo apana bumi.’ (Fp 2:15, 16) Kufunda Mambo a Lesa pa bunke kwitulengela kusala bya kufunda bisakwitukwasha. Twakonsha kuba byepi pa kuba’mba tumwenemo pa kutanga ne kufunda Baibolo?

BYA KUBA:

• Shabulai pa byepelo ne kunemba bishinka mu Baibolo wenu, nangwa kunemba pa pepala nangwa pa kiñambañamba

• Ishikishainga ano mepuzho pa kutanga Mambo a Lesa: ‘Ñanyi? Ki ka? Kwepi? Kimye ka? Mambo ka? Mu ñanyi jishinda?

• Kebai bishinka. Ingijishai byo betunengezhezha pa kukeba bishinka pa mutwe ye mubena kukeba nangwa pa kyepelo kya mu Baibolo

• Langulukainga pa byo mubena kutanga pa kuba’mba muyuke byo mwakonsha kwibingijisha

• Ingijishainga byo mubena kutanga mu bwikalo bwenu.—Luka 6:47, 48

TAMBISHAI VIDYO WA KUBA’MBA LUFUNJISHO LWA PA BUNKE LWITUKWASHA KUMVWISHA MAMBO A LESA, APA BINO MUKUMBULE ANO MEPUZHO:

• Bantu bamo baambapo’mba ka pa kufunda Baibolo pa bunke?

• Mambo ka o twafwainwa kulombelanga saka tukyangye kutendeka kufunda Baibolo pa bunke?

• Ñanyi kintu kyakonsha kwitukwasha kumvwisha byo tubena kutanga?

• Ñanyi tuyukilo to twafwainwa kubika mu Baibolo pa kutanga?

• Mambo ka kulanguluka langulukapo o kwanemena pa kutanga Mambo a Lesa?

• Twafwainwa kuba byepi na bintu byo tubena kufunda mu Baibolo?