Yehoba Watemwa Bantu ba Butooto

“Owa ku maboko. Wamisha mu kibamba. Pyanga mu nzubo. Kataye ndochi mu kimbo.” Abino byo byamba bansemi bavula pa kufunjisha baana babo kwikala ba butooto. Nangwa byonkabyo, Lesa ye wapana mafunde aamba pa butooto. (Lup 30:18-20; Mpi 23:14; 2Ko 7:1) Inge bipe byetu ne mibiji yetu byaikala bya butooto, tunemeka bingi Yehoba. (1Pe 1:14-16) Nanchi muwamisha pa nzubo penu ne lubanza nyi? Bantu bavula batemwa kutaya ndochi mu mikwakwa ne mu mapunzha mwa kukokolokela, bino atweba bena Kilishitu twibikako bingi kulama ntanda ya butooto. (Sl 115:16; Lum 11:18) Twakonsha kumwesha’mba twi ba butooto ne mu bintu bicheche nabiji ko tutaya mapepala a maswiti, mabotolo ne bintutu bikwabo. Mu bintu byonse byo tuba, tukeba ‘kwilumbulula kuba’mba twi ba mingilo ba Lesa.’—2Ko 6:3, 4.

TAMBISHAI VIDYO WA KUBA’MBA LESA WATEMWA BANTU BA BUTOOTO, APA BINO MUKUMBULE ANO MEPUZHO:

• Ñanyi bintu bilengela bantu bamo kubula kulama bipe byabo na butooto?

• Mizhilo ya Mosesa yamwesheshe byepi Lesa byo amona butooto?

• Twakonsha kushimuna byepi bukamonyi pe Yehoba kwa kubula kwamba?