Kuwamishako Busendwe Bwetu bwa Kusapwila—Pimpulainga Mashinda Mwakwisambila na Bantu

ENE MAMBO O KWANEMENA: Bashingwa ne mikooko ikwabo babena kwita bantu bonse kwiya na kutambula “mema a bumi a bupetu.” (Lum 22:17) Ano mema a kifwanyikizho emenako bintu byanengezha Yehoba bya kupokolwelako bantu ku bundengamambo ne lufu. Pa kuba’mba tukwashe bantu ba mu bisho ne bupopweshi bwapusana pusana, twafwainwa kusapwilanga “mambo awama a myaka ne myaka” mu jishinda jifika bantu pa muchima.—Lum 14:6.

BYA KUBA:

• Salai kinembelo ne mutwe usakufika bantu pa muchima mu nyaunda yenu. Mwakonsha kusalapo jishinda jimo pa mashinda a kwisambilamo na bantu nangwa jishindatu jikwabo jo mwamona’mba jingila bulongo. Ñanyi binembelo ne mitwe yatemwa bantu? Nanchi kujipo kyamweka katataka kibena kulangulukapo bantu nyi? Ñanyi mitwe yakonsha kutemwa banabalume nangwa banabakazhi?

• Tendekainga misambo na lwimu kwesakana na byo bemuna ku yoyo mpunzha.—2Ko 6:3, 4

• Yukai bya kwingijisha bulongo mabuku ne mavidyo aji pa Byo Twingijisha mu Mwingilo pa kwisamba na muntu watako muchima

• Kopololai mavidyo ne mabuku a mu milaka yamba bantu mu yoyo nyaunda

• Pimpulainga byo mubena kwambapo kwesakana na byatemwa mwina nzubo. (1Ko 9:19-23) Akilangulukai pa kino, mwakonsha kuba byepi inge mwaumvwa’mba muntu ye mubena kwisamba nanji wafwishapo mulongo wanji katataka?

TAMBAI VIDYO, APA BINO MUKUMBULE ANO MEPUZHO:

• Ñanyi mutwe musapwishi ye aji kutendeka kwisamba na mwina nzubo?

• Ñanyi makatazho ajinga na mwina nzubo?

• Ñanyi kinembelo kyaji kuwama kutanga pa kyokya kimye, kabiji mambo ka?

• Mupimpula byepi misambo pa kuba’mba mufikenga bantu ba mu nyaunda yenu pa muchima?