BYAFWAINWA KWIKALA BENA KILISHITU
Inengezhezhai Jimo ku Misongo Ipulumukatu
Mambo ka o twafwainwa kwinengezhezha jimo? Mambo twakonsha kukolwa kwakubula kuketekela. Mwafwainwa kwinengezhezha jimo lonka luno pa kuba’mba muyukile jimo mashinda awama a kubukilwamo inge mwakolwa. Inge mwauba bino mukamwesha’mba mwanemeka bumi ne mizhilo ya Yehoba yaamba pa mashi.—By 15:28, 29.
Ñanyi bintu byo mwafwainwa kuba pa kwinengezha?
Saka mukyangye kunemba kikachi kya mizhilo ya kwimwimenako ku kipatela kya (DPA), mwafwainwa kulomba ne kulangulukapo bulongo.a Basapwishi babatizhiwa bafwainwa kwambila mulongo wingijila ku mabuku kwibapa kikachi kya DPA ne kikachi kya Identity Card (ic) kya baana babacheche
Umvwe mwanema pa muchima, mwafwainwa kwambila bakulumpe mu kipwilo kwimupa pepala wa Information for Expectant Mothers (S-401). Mikambizho iji pa uno pepala ikemukwasha kufuukulapo bulongo pa makatazho akonsha kumweka inge mwanema pa muchima nangwa kimye kya kupaapa
Inge bakeba kwimubuka kwingijisha jishinda javwangwamo kwingijisha mashi nangwa bemubika mu mwanya mu kipatela, mwafwainwa kubuujila jimo bakulumpe mu kipwilo ne kubuula dokotala kuba’mba bakeya na kwimufwakesha ku Kamonyi wa kwa Yehoba
Bakulumpe mu kipwilo bakonsha kwimukwasha byepi? Bakemukwasha kunemba kikachi kyenu kya DPA. Nangwa byonkabyo, bakululmpe mu kipwilo kechi bakemufuukwilako nangwa kwimubuula byo mwafwainwa kuba pa bintu byafwainwa kwifuukwilapo muntu mwine ne. (Lo 14:12; Nga 6:5) Umvwe mwabuula bakulumpe mu kipwilo kuba’mba mwakolwa kikola kyavwangwamo kwingijisha mashi pa kubukwa, ponkapotu bakabuula ba mu kavoto ka Hospital Liaison Committee (HLC).
Kavoto ka HLC byo Kakwashañana? Balongo baji mu kavoto ka HLC bebafunjisha bya kwisamba na badokotala ne bashabyambo pa byo twaitabilamo pa mashi. Bakonsha kwisamba na badokotala pa mashinda akubukilwamo abula kuvwangamo kwingijisha mashi. Kabiji inge kibena kukebewa, bakonsha ne kwimukwashako kukeba dokotala wakonsha kwimubuka kwakubula kwingijisha mashi.
TAMBAI VIDYO WA KUBA’MBA BYA KUFUUKULAPO KUBUKWA PA KWINGIJISHA MASHI, APA BINO MUKUMBULE ANO MEPUZHO:
Nanyi bintu byo mwafunda mu vidyo byakonsha kwimukwasha kwinengezha ku misongo ipulumukatu yakonsha kumvwangamo kubukwa kwingijisha mashi?
a Lufunjisho 39 mu buku wa Mukekala Myaka ne Myaka! lukemukwasha kufuukulapo bulongo pa mashinda akubukilwamo avwangamo kwingijisha mashi.