Mambo ka Lesa o Abujila Kukumbwila Milombelo ya Bantu Bamo?

Shetu wa mwiulu aye Yehoba utemwa bingi kuteleka ku milombelo yetu ifuma panshi ya muchima. Pano bino, kuji bintu bimo byakonsha kumulengela kubula kukumbula milombelo yetu. Nanchi abino bintu byo bika? Kabiji twafwainwa kuba byepi inge tukeba Lesa kukumbula milombelo yetu? Monai bintu bimo byaambapo Baibolo byo twafwainwa kubula kuba pa kulomba.

Bantu mu chechi pa kulomba babena kutanga kya kutanga mu ka buku ka milombelo.

“Pa kulomba, kange mwambengatu bintu bimo ne.”—Mateo 6:7.

Yehoba kechi ukeba’mba tulombenga milombelo yo twalabijila ku mutwe nangwa kwiitanga mu buku wa milombelo ne. Pakuba aye ukeba atweba kwisambanga nanji kufuma panshi ya muchima. Nangwatu atweba kechi twakonsha kumvwa bulongo ne, inge kya kuba mulunda netu pa kwisamba nanji ubwezhabwezhapotu byambo bintutu bimo kimye kyonse. Balunda na muntu bekasulukila kwisamba ne kwibuula bintu byapusana pusana. Inge saka twingijisha byambo byetu pa kulomba kwi Shetu wa mwiulu, tumwesha’mba tubena kwisamba na mulunda netu.

Mwanamulume ubena kulomba saka abena kuteya ngyuka.

“Umvwe mwalomba kechi mutambula ne, mambo kechi mulomba na mulanguluko wawama ne.”—Yakoba 4:3.

Lesa kechi wakonsha kukumbula milombelo yetu inge twalomba bintu byo ashikwa ne. Twambe bino, inge muntu ubena kuteya ngyuka walomba kwi Lesa kuba’mba amukwashe kwikala na mali avula ne kukila bakwabo, abya Yehoba ukamukumbula nyi? Ine. Mambo Yehoba witubuula kubula kwikala na lwiso ne kubula kuketekela mu bintu byatutu. (Isaya 65:11; Luka 12:15) Kechi twafwainwa kuketekela Yehoba kukumbula ino milombelo ne. Inge tukeba Lesa kukumbula milombelo yetu, twafwainwa kulomba bintu byayilamo na byaamba Baibolo.

Ntangi wa bupopweshi ubena kulombelako bashilikale.

“Awa ukana kulondela mizhilo, ne lulombelo lwanji lo lwa bunya.”—Byambo bya Maana 28:9.

Kufumatu ne kala, Lesa kechi wakumbulanga milombelo ya bantu babulanga kukookela mizhilo yanji yaoloka ne. (Isaya 1:15, 16) Ne lunotu, Lesa kechi waaluka ne. (Malakai 3:6) Inge tukeba Lesa kukumbula milombelo yetu, twafwainwa kulondelanga mizhilo yanji. Pano twafwainwa kuba byepi inge kala twalengelepo mambo? Abya kino kibena kulumbulula’mba kyapwa Yehoba kechi uketumvwa inge twamulomba nenyi? Ine, kechi byobyo kiji ne. Lesa uketulekelako mambo inge twalapila ne kwibikako kubanga bintu bimutokesha ku muchima.—Byubilo 3:19.