Ñanyi Ukapwisha Nkondo ne Malwañano?

LESA UKAFUMYAPO MAKAFULUMENDE ONSE A BANTU

Lesa ukafumyapo makafulumende onse a bantu pa nkondo yatongola Baibolo amba Amagedonyi.a (Lumwekesho 16:16) Pa kyokya kimye, “bamfumu ba pano pa ntanda ponse” bakebakonkenya pamo ku “nkondo ya aja juba jikatampe ja Lesa wa Bulume Bonse.” (Lumwekesho 16:14) Amagedonyi ke nkondo ya Lesa yo akengijisha kupwishishamo makondo onse.

Kabiji Lesa ukafumyapo makafulumende a bantu ne kupingizhapo Bufumu bwanji nangwa’mba kafulumende wanji ukalaminanga mwiulu. Kabiji kafwako ukonauna buno bufumu ne. (Danyela 2:44) Lesa wasala Mwananji aye Yesu Kilishitu kwikala mfumu wa buno bufumu. (Isaya 9:6, 7; Mateo 28:18) Uno kafulumende bo Bufumub Yesu bo afunjishe baana banji ba bwanga kulombangapo. (Mateo 6:9, 10) Bantu bonse pano pa ntanda bakakwatankana na mambo a kuba’mba kukekalatu kafulumende umo ntanda yonse kabiji Yesu ye ukekala kalama.

Kupusanako na bakalama ba bantu bengijisha bulume bwabo kumwenamo bintu abo bene, Yesu aye ukengijisha bulume bwanji kukwashishamo bantu. Onkao mambo, byo aji kalama wabula misalululo, kafwako muntu nangwatu umo ye akabula kuta muchima na mambo a mukoka, kyalo nangwa na mambo a nkomeno yanji ne. (Isaya 11:3, 4) Kabiji kafwako muntu nangwatu umo ukajilakananga’mba bamwikazha bufinda ne. Mambo ka o bakabujila kuba bino? Mambo Yesu ukata muchima ne kukwasha muntu yense. Baibolo waamba’mba: “Aye ukapokolola muyanji ukeba bukwasho, ne mulanda ne yense wabula wa kumukwasha. . . . Ukebapokolola ku lumanamo ne ku bukapondo, ne mashi abo akekala anema kwi aye.”​—Salamo 72:12-14.

Bufumu bwa Lesa bukafumyapo bilwilo byonse bya nkondo pano pa ntanda. (Mika 4:3) Kabiji bukafumyapo bantu bonse batama bakana kusankilapo muchima wa kulwa nkondo ne kwipaya bakwabo. (Salamo 37:9, 10) Onkao mambo, mwanamulume yense, mwanamukazhi ne banyike bonse bakekalanga mu mutende pano pa ntanda.​—Ezikyo 34:28.

Kine, bantu bakekalanga bwikalo bwawama bingi mu kafulumende wa Lesa pano pa ntanda. Mambo kafulumende wa Lesa ukafumyapo byonse bilengela bantu kulwa nkondo nabiji buyanji, nzala ne kubula mazubo. Muntu yense ukekalanga na kajo kavula kabiji kakwasha mubiji ne kwikala na mazubo awama.​—Salamo 72:16; Isaya 65:21-23.

Kabiji Bufumu bwa Lesa bukafumyapo bintu byonse byatama byaiyako na mambo a nkondo. Kechi bukafumyapotu bulema ne, pakuba bukafumyapo ne bijikila byashala mu milanguluko ya bantu na mambo a nkondo. Lesa ukasangula bantu bafwa ne kwikala na bumi jibiji ponka pano pa ntanda. (Isaya 25:8; 26:19; 35:5, 6) Kabiji bantu kechi bakavulukapo jibiji bintu byatama byo bapichilemo ne, mambo “bintu bya kala byapichijila.”​—Lumwekesho 21:4.

LESA UKAFUMYAPO BUNDENGAMAMBO

Bufumu bwa Lesa byo bukatendeka kulama ino ntanda, bantu bonse bakengijilangatu Lesa umo wa kine aye Yehoba,c “Lesa wa butemwe kabiji wa mutende.” (2 Kolinda 13:11) Bantu bakafunda bya kwikala mu mutende na bakwabo. (Isaya 2:3, 4; 11:9) Aba bonse bakakookelanga Lesa bakebakasulula ku bundengamambo kabiji bakekala baoloka.​—Loma 8:20, 21.

LESA UKAFUMYAPO SATANA NE BANDEMONA BANJI

Bufumu bwa Lesa bukonauna batundaika bantu kulwa nkondo, ko kuba’mba Satana ne bandemona banji. (Lumwekesho 20:1-3, 10) Lesa byo akafumyapo Satana ne bandemona banji, mutende po po akakumbana pano pa ntanda ponse.​—Salamo 72:7.

Mwane shiinwa kuba’mba byalaya Lesa kuba’mba ukafumya nkondo ne malwañano bikafika. Mambo uji na bulume kabiji wakebesha kufumyapo nkondo.

• Lesa uji na maana ne bulume bwa kupwisha nkondo ne malwañano onse. (Yoba 9:4) Kafwako kintu nangwatu kimo Lesa kyo afwainwa kukankalwa kuba ne.​—Yoba 42:2.

• Lesa kimukola bingi ku muchima kumona bantu na kuyanda. (Isaya 63:9) Kabiji “washikwa muntu yense watemwa bukapondo.”​—Salamo 11:5.

• Lesa ufikizha bintu byonse byo alaya kabiji kechi ubepa ne.​—Isaya 55:10, 11; Titusa 1:2.