MUTWE WA KUFUNDA 5
LWIMBO 108 Butemwe bwa Lesa Bubula Kwaluka
Byo Tumwenamo mu Butemwe bwa Lesa
“Yesu waishile pano pa ntanda na kupulusha bandengamambo.”—1 TIMO. 1:15.
BYO TUSAKWISAMBAPO
Byo tumwenamo mu bukuzhi ne byo twakonsha kumwesha amba tusanchila Yehoba pa kwitupa bukuzhi.
1. Ñanyi bintu byo twafwainwa kuba pa kuba’mba tusangajike Yehoba?
FWANYIKIZHAI’MBA mwapa muntu ye mwatemwa bupe bwanema kabiji bwakonsha kumukwasha. Mwakonsha kumvwa kutama ku muchima inge uno muntu watulatu buno bupe mu nzubo kwakubula kwibwingijisha. Pano bino, mwakonsha kumvwa bingi bulongo inge uno muntu wimusanchila pa bupe bo mwamupa ne kwibwingijisha. Ñanyi kishinka kyo tubena kwambapo? Yehoba wapaine Mwananji kwiya na kwitufwila. Yehoba wakonsha kumvwa bingi bulongo inge ketumweshe’mba tumusanchila pa buno bupe bwanema bo etupa ne butemwe bwanji bwamulengejile kunengezha bukuzhi.—Yoa. 3:16; Loma 5:7, 8.
2. Ñanyi bintu byo tusakufunda mu uno mutwe?
2 Nangwa byonkabyo, pa kupitapo kimye, twakonsha kutendeka kumona’mba buno bupe bwa bukuzhi kechi bwanema ne. Kuba bino kijitu nobe kutuula buno bupe mu nzubo bwitupa Lesa kwakubula kulangulukapo nangwa kwibwingijisha. Pa kuba’mba kino kibule kwitumwekela, kimye kyonse twafwainwa kulangulukanga pa bintu bitubila Lesa ne Kilishitu. Uno mutwe usakwitukwasha kuba bino. Tusakufunda pa byo twakonsha kumwenamo mu bukuzhi pa kino kimye ne mu kimye kya kulutwe. Kabiji tusakufunda byo twakonsha kumwesha’mba tumusanchila Yehoba pa butemwe bwanji kikatakata mu kino kimye kya Kivuluko.
BYO TUMWENAMO PA KINO KIMYE
3. Ñanyi jishinda jimo jo tumwenamo mu bukuzhi pa kino kimye?
3 Nangwatu pa kino kimye, tubena kumwenamo mu kitapisho kya bukuzhi bwa kwa Kilishitu. Na mambo a buno bukuzhi, Yehoba witulekelako mambo etu. Aye kechi witulekelako mambo na mambotu a kuba’mba wafwainwa kuba bino ne. Pano bino, lusa lwanji lo lumulengela kwitulekelako mambo. Nyimbi wa Masalamo waimbile’mba: “Mambo anweba Yehoba mwawama kabiji mwaswila jimo kulekela mambo.”—Sala. 86:5; 103:3, 10-13.
4. Bañanyi Yehoba bo anengezhejile bukuzhi? (Luka 5:32; 1 Timoti 1:15)
4 Bantu bamo balanguluka’mba Yehoba kechi wakonsha kwibalekelako mambo ne. Ibyo kuba’mba atweba bonse kechi kitufwainwa kulekelwa mambo ne. Mutumwa Paulo wayukile’mba ‘kechi wafwainwe kutelwa’mba mutumwa ne.’ Nangwa byonkabyo, wanungilepo’mba: “Lusa lukatampe lwa Lesa, lo lwalengela’mba ngikale byonka bino byo nji.” (1 Ko. 15:9, 10) Inge twalapila, Yehoba witulekelako mambo etu. Mambo ka? Ke na mambo a kuba’mba witutemwa, kechi na mambo a kuba’mba kitufwainwa ne. Inge mulanguluka’mba Yehoba kechi wakonsha kwimulekelako mambo ne, vulukainga’mba Yehoba wanengezhejile bukuzhi bantu bandengamambo balapila, kechi babula bandengamambo ne.—Tangai Luka 5:32; 1 Timoti 1:15.
5. Nanchi twafwainwa kulangulukanga’mba kitufwainwa Yehoba kwitulekelako mambo nyi? Lumbululai.
5 Kafwako wafwainwa kulangulukanga’mba Yehoba wafwainwa kwitulekelako mambo etu na mambo a kuba’mba twamwingijila pa myaka yavula ne. Pano bino, Yehoba usanta bingi pa bukishinka bwetu. (Hebe. 6:10) Kechi witupele bukuzhi kuba’mba etufwete pa mingilo yo twamwingijila ne, pakuba witupele bukuzhi kyatutu. Onkao mambo, inge ketulanguluke’mba kitufwainwa Yehoba kwitumwesha lusa na mambo a bintu byo twauba, kijitu nobe tubena kwamba’mba Kilishitu kechi wafwainwe kwitufwila ne.—Esakanyaiko Ngalatiya 2:21.
6. Mambo ka Paulo o aingijilanga na mukoyo mu mwingilo wa Yehoba?
6 Paulo wayukile’mba kechi kyamufwainwe Lesa kumulekelako mambo ne. Pano mambo ka o atwajijile kwingila na mukoyo mu mwingilo wa Yehoba? Kechi waubilenga bino pa kuba’mba amweshe’mba kyamufwainwe Lesa kumulekelako mambo ne, pano bino waubilenga bino pa kuba’mba amweshe lusanchilo pa lusa lukatampe lwamumwesheshe Yehoba. (Efi. 3:7) Byonka byaubile Paulo, ne atweba tutwajijila kwingijila Yehoba na mukoyo kechi na mambo a kuba’mba etubile lusa ne, bino ke na mambo a kukeba kumusanchila pa lusa lwanji.
7. Ñanyi jishinda jikwabo jo tumwenamo mu bukuzhi pa kino kimye? (Loma 5:1; Yakoba 2:23)
7 Jishinda jikwabo jo tumwenamo mu bukuzhi pa kino kimye ke ja kuba’mba twakonsha kwikala na bulunda bwakosa ne Yehoba.a Byonka byo twaambapo kala mu mutwe wafumako, byo twasemekelwe kechi twajinga balunda ne Yehoba ne. Pano bino, na mambo a bukuzhi, twakonsha kwikala mu “mutende ne Lesa” ne kufwenya kwipi ne aye.—Tangai Loma 5:1; Yakoba 2:23.
8. Mambo ka o twafwainwa kusanchila Yehoba pa kwituswisha kulomba kwi aye?
8 Kulomba kwi Yehoba ke kintu kimo kyanema bingi kitulengela kwikala na bulunda bwakosa ne Yehoba. Yehoba kechi umvwatu milombelo yo tulomba inge tubena kupwila pamo na bena Kilishitu bakwetu ne, bino umvwa ne milombelo yo tulomba atweba bonse pa muntu pa muntu. Inge twalomba, bijikila byo twajinga nabyo bipwa kabiji twikala na mutende wa mu milanguluko. Nangwa byonkabyo, abino kechi byo bintu byonka byawama bifumamo inge twalomba ne. Kulomba kukosesha bulunda bwetu ne Lesa. (Sala. 65:2; Yako. 4:8; 1 Yoa. 5:14) Byo ajinga pano pa ntanda, Yesu walombanga bimye byavula mambo wayukile’mba Yehoba watelekelenga ku milombelo yanji kabiji kulomba kwakoseshanga bulunda bwanji na Shanji. (Luka 5:16) Kitusangajika bingi kuyuka’mba na mambo a kitapisho kya bukuzhi bwa kwa Yesu, twakonsha kwikala balunda ne Yehoba ne kwisamba nanji mu lulombelo.
BYO TUKAMWENAMO MU KIMYE KYA KULUTWE
9. Bapopweshi ba Yehoba ba kishinka bakamwenamo byepi mu bukuzhi mu kimye kya kulutwe?
9 Bapopweshi ba Yehoba ba kishinka bakamwenamo byepi mu bukuzhi mu kimye kya kulutwe? Yehoba ukebapa bumi bwa myaka ne myaka. Bantu bavula balanguluka’mba kino kechi kyakonsha kubiwa ne, mambo bantu bavula babena kufwa kufumatu ne kala. Pano bino, Yehoba wakebelenga’mba bantu bakekalenga myaka ne myaka. Inge Adama kechi walengele mambo ne, inge kafwako uzhinauka’mba bantu bakekala myaka ne myaka ne. Nangwa kya kuba pa kino kimye bantu bazhinauka’mba kechi kyakonsheka kwikala myaka ne myaka ne, bino twashiinwa’mba tukekala myaka ne myaka mambo twayuka’mba Yehoba wapaine bupe bwanema bingi, ko kuba’mba Mwananji waishile na kwitufwila.—Loma 8:32.
10. Ñanyi bintu bitengela bashingwa ne mikooko ikwabo?
10 Nangwa kya kuba bantu bakekala na bumi bwa myaka ne myaka kulutwe, bino Yehoba ukeba’mba tulangulukengapo pa kino kimye. Bashingwa batengela kukekala myaka ne myaka mwiulu ne kulama ino ntanda pamo ne Kilishitu. (Lum. 20:6) Mikooko ikwabo batengela kukekala myaka ne myaka mu Paladisa pano pa ntanda kwakubula misongo nangwa kumanama. (Lum. 21:3, 4) Nanchi muji pa ba mikooko ikwabo babena kutengela kukekala pano pa ntanda myaka ne myaka nyi? Kwikala pano pa ntanda nako kwanema byonkatu byo kiji ku boba bakekala mwiulu. Yehoba walengele bantu kuba’mba bakekalenga pano pa ntanda. Onkao mambo, kwikala pano pa ntanda myaka ne myaka kukebalengela kwikala bingi na lusekelo.
11-12. Ñanyi bintu byawama byo tubena kutengela bikekala mu Paladisa? (Monai ne bipikichala.)
11 Fwanyikizhai bwikalo byo bukawama mu Paladisa pano pa ntanda. Kechi mukalangulukangapo’mba mwakonsha kukolwa nangwa kufwa ne. (Isa. 25:8; 33:24) Yehoba ukemubila bintu byonse byawama byo mukeba. Ñanyi bintu bimo byo mukakebanga kufunda mu ntanda ipya? Nanchi mukakebanga kufunda pa banyama, tuñonyi ne bilengwatu bikwabo nyi? Abya mukakeba kufunda bya kwimba kidali nangwa bya kulengalenga nyi? Kukakebewanga ne bantu bayuka bya kulenga bikekala bishimikwa, bayuka kushimika ne banjimi. Kabiji kukakebewanga bantu ba kujima ne kunengezha kajo, kubunda byela bya kwingijisha, kujima bijimwa byapusana pusana ne kwibilama bulongo. (Isa. 35:1; 65:21) Byo mukekalanga myaka ne myaka, mukekala na kimye kyabaya kya kuba bino bintu byonse byo mukakebanga kuba.
12 Tukekala bingi na lusekelo kutambwila bantu bo bakasangula. (Byu. 24:15) Kabiji fwanyikizhai byo mukekala na lusekelo byo mukafunjilapo byavula pe Yehoba kupichila mu bintu byapusana pusana byo alenga. (Sala. 104:24; Isa. 11:9) Kabiji kyakilapo kuwama ke kya kuba’mba tukapopwelanga Yehoba bulongo mambo kechi tukalenganga mambo nangwa kulomba kwitulekelako mambo etu ne. Nanchi mwafwainwa kushalapo pa bino bintu byawama bikekala mu Paladisa na mambotu a kukeba “kusekela kwa pa kakimye kacheche kwa bundengamambo” nyi? (Hebe. 11:25) Ine kwalepeshatu. Bino bintu byawama byo twaambapo byanema bingi kukila bintu bya mu ino ntanda byo twakonsha kwikala nabyo pa kino kimye. Vulukainga’mba Paladisa wa pano pa ntanda ukafika, kechi ukekala nobe lwimbotu ne. Abino byonse bikobiwa mambo Yehoba witutemenwe ne kwitupa Mwananji kwiya na kwitufwila.
Ñanyi mapesho akekala mu ntanda ipya o mutengela bingi? (Monai mafuka 11-12)
BYO TWAKONSHA KUMWESHA’MBA TUSANCHILA YEHOBA PA BUTEMWE BWANJI
13. Twakonsha kumwesha byepi’mba tusanchila Yehoba pa butemwe bwanji? (2 Kolinda 6:1)
13 Twakonsha kumwesha byepi’mba tusanchila Yehoba pa kwitupa bukuzhi? Twakonsha kuba bino inge ketumone’mba kwingijila Yehoba kyo kintu kyanema mu bwikalo bwetu. (Mat. 6:33) Kiji bino mambo Yesu witufwijile pa kuba’mba “aba baji na bumi babule kwikelanga mwayila bikeba michima yabo, kana kwikela mwayila bikeba yewa wibafwijile kabiji ye basangwile.” (2 Ko. 5:15) Ibyo, twafwainwa kwingijilanga Yehoba na mukoyo pa kuba’mba tumweshenga’mba tusanta pa lusa lwanji lukatampe—Tangai 2 Kolinda 6:1.
14. Twakonsha kumwesha byepi’mba twaketekela Yehoba ne kulondela byo etukambizha?
14 Kabiji twakonsha kumwesha’mba tusanchila Yehoba pa butemwe bwanji inge twamuketekela ne kulondela byo etukambizha. Mu ñanyi jishinda? Inge tubena kukeba kufuukula pa bintu nabiji kuyuka po twafwainwa kupelelela kufunda sukulu wa ku mubiji nangwa nkito yo twafwainwa kutwela, twafwainwa kuyuka Yehoba byo akeba’mba tube pa bino bintu. (1 Ko. 10:31; 2 Ko. 5:7) Kuketekela Yehoba ne kulondela byo etukambizha pa kufuukula bintu kukosesha bulunda bwetu ne Yehoba ne luketekelo lwa kukekala myaka ne myaka.—Loma 5:3-5; Yako. 2:21, 22.
15. Twakonsha kumwesha byepi’mba tusanchila Yehoba mu kimye kya Kivuluko?
15 Kuji ne jishinda jikwabo jo twakonsha kumwesheshamo’mba tusanchila Yehoba pa butemwe bwanji. Ke kwingilako na mukoyo mu kino kimye kya Kivuluko pa kuba’mba tumweshe’mba tusanchila Yehoba pa kwitupa bukuzhi. Byo tubena kunengezha kutaanwa ku Kivuluko, twafwainwa ne kwitako bakwetu pa kuba’mba nabo bakataanweko. (1 Timo. 2:4) Lumbulwilai bantu bo muketako bintu byubiwa pa Kivuluko. Mwakonsha kwibamwesha mavidyo aji pa jw.org a kuba’mba Mambo ka Yesu o Afwijile? ne Kuvuluka Lufu lwa kwa Yesu. Bakulumpe mu kipwilo bafwainwa kwitako baleka kupwila kwiya na kutaanwa ku Kivuluko. Mwiulu ne pano pa ntanda pekala bingi lusekelo inge mukooko wa Yehoba waelekele wabwela mu jitanga. (Luka 15:4-7) Pa juba ja Kivuluko, twafwainwa kwimuna bantu bonse bakeya na kupwila kikatakata boba baiya na kutaanwako kimye kitanshi nangwa boba batainweko kala. Twafwainwa kwibatambwila ne kwibakasulukila.—Loma 12:13.
16. Mambo ka o twafwainwa kwingijilako pakatampe mu kimye kya Kivuluko?
16 Nanchi mwafwainwa kwingilako pakatampe mu kimye kya Kivuluko nyi? Jino ke jishinda jawama bingi jo twakonsha kumwesheshamo’mba tusanta pa bintu bitubila Lesa ne Kilishitu. Yehoba uketukwasha inge ke twingileko pakatampe mu mwingilo kabiji kino kiketulengela kumuketekela bingi. (1 Ko. 3:9) Kabiji mwafwainwa kulondela mutanchi wa kutanga Baibolo mu kimye kya Kivuluko uji mu kabuku ka Kubalaula Binembelo Moba Onse nangwa chati uji mu mutanchi wa kupwila kwa mukachi ka mulungu. Kabiji mwakonsha kwingijisha bino byepelo bya mu Baibolo pa kufunda Baibolo pa bunke bwenu.
17. Ñanyi kintu kisangajika Yehoba? (Monai ne kakitenguluzha ka kuba’mba “Mashinda a Kumwesheshamo’mba Tusanchila Yehoba pa Butemwe Bwanji.”)
17 Nangwa byonkabyo, kechi mwakonsha kuba bintu byonse byo twaambapo mu uno mutwe ne. Yukai’mba Yehoba kechi ukeba anweba kwiesakanya na bintu byuba bakwenu ne, bino utala biji mu muchima wenu. Usekela bingi inge wamona bintu byo muba bimwesha’mba mumusanchila pa bupe bwanji bwanema bwa bukuzhi.—1 Sam. 16:7; Mako 12:41-44.
18. Mambo ka o twafwainwa kusanchila Yehoba Lesa ne Yesu Kilishitu?
18 Bukuzhi bo bwalengela Yehoba kwitulekelako mambo, kwikala na bulunda bwawama ne aye ne luketekelo lwa kukekala na bumi bwa myaka ne myaka. Twayai tutwajijile kumwesha’mba tusanchila Yehoba pa butemwe bwanji bwamulengejile’mba etubile bino bintu byawama. (Yoa. 4:19) Kabiji twayai tutwajijile kumwesha’mba tusanchila Yesu witufwijile na mambo a kwitutemwa.—Yoa. 15:13.
LWIMBO 154 Butemwe Bubula Kupwa